Home Gobierno Secretario di Estado di Reino a reconoce cu supervision di CAft na...

Secretario di Estado di Reino a reconoce cu supervision di CAft na Aruba a faya

50
0
SHARE
- Advertisement -

Minister Xiomara Ruiz-Maduro

ORANJESTAD (AAN) – Minister di Finanza, Economia y Cultura señora Xiomara Ruiz-Maduro, a señala den conferencia di prensa, cu e bishita di mas importante y mas comenta, na Hulanda, ta esun cu e delegacion di Aruba encabeza pa su persona a haci na e Secretario di Estado di Reino, sr. Knops.

Esaki ta un bishita cu tambe a bay den bon esfera, y den conversacion cune sr. Knops a trece dilanti cu e supervision di CAft na Aruba no a duna su fruto manera Hulanda tambe a spera di dje. Cu otro palabra, por destila di e comentario di e funcionario cu e supervision di CAft na Aruba a faya.

“A faya pasobra bao di nan supervision na Aruba e situacion no a bira mihor sino peor. Esey debi na e falta di responsabilidad di Gabinete Eman, cu a goberna e pais aki y a hiba un mal maneho financiero unda cu pueblo a kere cu CAft lo brinda un seguridad cu e situacion lo bira mihor, pero cu hopi tolerancia a resulta cu awor di cada Florin 93 cen ta bay pa cubri e debe”, segun e dignatario.

E ta conciente cu e situacion aki ta hopi fastioso y cu cual e gobierno aki a bin dilanti pa splica pueblo, y Minister Presidente a bin dilanti y bisa Aruba cu a yega momento pa como pais, mustra e madurez politico y cu nos no por keda culpa tur hende pa e fayonan cu algun a comete den nos pais, refiriendo na e gabinete di Mike Eman.

El a reitera cu e gabinete anterior a hiba un maneho financiero desastroso den cual tabata tin tres minister di finanza, tres hende cu e no por compronde con nan por a drumi anochi mirando e situacion cu nan tabata hibando nos pais. E dignatario a subraya cu cada esfuerzo cu por a mira durante e ocho añanan di e gobierno anterior pa hiba nos pais den un direccion corecto, a worde bombardea pa falta di liderazgo di sr. Eman.

“Asina e ta! Pasobra si bo mira cu di cada un di e ministernan ey algun a purba di bin cu un direccion caminda nos mester a bay, toch na final di dia por a mira cu e reformanan fiscal cu mester a bin no a sosode, pasobra sr. Eman no tabata tin e curashi ni e vision pa e pais aki, y no a importa su persona kico ta e legado cu el a laga pa e generacion aki pero bao di su man a redobla un debe y a bin cu proyectonan PPP di cual no solamente e generacion aki y e gobernacion aki, pero e gobernacion y generacion nos dilanti ta endeuda!” Minister señora Xiomara Ruiz-Maduro a señala.

 

- Advertisement -

DUNA COMENTARIO

Please enter your comment!
Please enter your name here