Home Enseñanza SEPPA cu claridad tocante situacion na Bureau Multidisciplinario

SEPPA cu claridad tocante situacion na Bureau Multidisciplinario

176
0
SHARE
- Advertisement -

ORANJESTAD(AAN): Diabierna ultimo, 20 di april, Minister di Enseñansa a toca e tema di Bureau Multidisciplinair Centrum (MdC) den Parlamento di Aruba. Nos por scucha con e a papia riba e decision riba MDC, algun pregunta cu a worde haci tocante MDC pero e contestanan mes no tabata claro. Tin hopi trahado di MdC cu no ta para tras di e cambionan cu e Minister kier trece y ta bon pa nos aclaria algun cos riba e situacion.

MdC tin tres seccion, Expertisecentrum, Observatiecentrum y Teacher Care.

E Expertisecentrum ta brinda servicio na tur school preparatorio y basico subsidia na Aruba cu a pidi ayudo pa muchanan cu tin problema cu nan desaroyo, comportacion, siñamento y/of habla o dia cual mayornan mes a pidi ayudo.

Minister Lampe kier bin cu multidisciplinaire zorgteams cu lo cay bou di directivanan di schoolnan y cu ta haci mesun trabao cu Expertisecentrum pasobra e ta di opinion cu asina por traha na nivel nacional y e profesionalnan por traha mas directo cu e schoolnan.

Sinembargo e Expertisecentrum ta duna su servicio diariamente caba na y den e schoolnan preparatorio y basico mes. E profesionalnan di e Expertisecentrum ta observa na school, ta test na school, ta duna guia logopedico na school y ta guia y conseha maestra/o con nan por yuda e alumno mas mihor den klas. Esey kiermen MdC ta traha na nivel nacional y e ayudo ta directamente na e schoolnan caba. E ayudo y experticio di MdC ta centralisa y e team multidisciplinario ta traha pa duna servicio riba un liña pa asina mantene y keda desaroya e calidad di e servicio aki. E cambio cu Minister Lampe kier trece, poniendo e servicio aki cay bou di derectivanan di schoolnan, lo nifica un decentralisacion di e servicio y perdida di bista general, cual lo afecta e calidad negativamente.

Lo cual e schoolnan tin necesidad na dje y ta pidi p’e ta mas trahado social den zorgteams existente cu por brinda sosten, guia y conseho na mayornan den e educacion di nan yiu na cas; manera “disciplina consciente”. Esaki ta yuda mehora e relacion y contacto cu maestro y mayor, e mucha coopera mihor, pa e mucha por compronde regla mas mihor y asina por siña mas mihor na school tambe. Banda di esey tin schoolnan cu no tin un of no por haci uso (p.e. debi cu e tin cu reemplasa maestro/a malo) di nan guia interno cu ta coordina e cuido interno di school y un guia cu por yuda mucha extra riba tereno di lesa of matematica.

Trahado social, guia interno y un guia pa lesamento o matematica ta actornan esencial, banda di un cabesante y e maestranan, den zorgteams pa por traha na nivel preventivo. Si amplia zorgteams di directiva di school cu e actornan aki, cu ta traha na nivel preventivo lo yuda pa minimalisa e peticionnan pa ayudo curativo cu ta worde duna na MdC.

Den cuandro di formacion di un zorgteam multidisciplinario, Minister Lampe a indica na personal di MdC cu esnan cu ta interesa por bay ter beschikking di un zorgteam y ja a efectua algun ter beschikking stelling caba di diferente profesionalnan di MdC na un zorgteam di un directiva di school. Pero e consecuencia di haci esaki, yta cu e propio Dienst MDC di Pais Aruba mes e no ta reemplasa e buraco cu e ta keda habri pa motibo di e personal cu a bay.

Na MdC e ayudo ta centralisa, sistema di traha ta uniforme y tin control central di calidad. Ademas MdC no ta cay bou di niun directiva di school y ta traha y haci investigación, diagnostico, indicacion y conseho e.o. riba cual tipo di enseñansa ta indica y ta mas adecua pa un mucha, independientemente di e schoolnan y directiva di school.

E peliger di eherce e tareanan aki directamente bao di un directiva di school y door di diferente zorgteams ta influencia e imparcialidad y confiabilidad, debi na conflicto di interes, diferencia den traha entre e zorgteams y e falta di control di calidad.

Tambe Minister Lampe ta bisa di lo kier bin cu un comision independiente cu ta haci e indicacion di tipo di enseñansa cu ta mas adecua pa un mucha. Esey sin embargo tambe ta un di e tareanan cu MdC ta haci caba.

E Observatiecentrum tambe ta un seccion di MdC. Muchanan dentro edad di 4 pa 8 aña cu tin problema difuso, severo, compleho cua ta sobrepasa e ayudo cu dentro di school na momento por worde brinda, por drenta Observatiecentrum. Meta di e Observatiecentrum ta pa haya un bon

bista di e probleman di e muchanan, determina e necesidadnan di ayudo di e muchanan, brinda e ayudo pa e muchanan por reintegra den enseñansa indica.

Den e Observatiecentrum e gruponan ta mas chikito y tin un team di diferente profesionalnan cu ta ofrece ayuda central, integral y dirigi.

E programa di mainta ta consisti di ayudo terapeutico integra cu enseñansa y despues di merdia ta traha dirigi riba diferente area di desaroyo, e.o. abilidadnan social-emocional. Mayornan ta ricibi sosten y guia di trahador social y ta haya mensual un workshop.

Na mesun momento cu e Observatiecentrum ta draai sin algun profesional cu a bay ter beschikking di un zorgteam y pa entrante aña escolar nobo, augustus ’18, Minister Lampe a dicidi tambe di reduci e Observatiecentrum di 3 klas (2 kleuter y 1 eerste klas) pa 1 klas (un kleuter) y realoca e klas pa un espacio di observacion y terapia den e edificio di Expertisecentrum.

Na e momento aki e Observatiecentrum tin dos kleuterklas y un 1ste klas cu ta ubica den un propio edificio diseña y ekipa pa e grupo specifico di e Observatiecentrum. Encuanto di e decision di Minister tin hopi preocupacionnan. Ta premira cu tin mucha cu lo tin cu bay back nan school cu no ta cla of di cual school no tin e condicionnan pa por yud’e debidamente. E grupo y cuponan lo ta hopi limita. E localidad pa e klas, cu ta e ‘speltherapiekamer’ di e Expertisecentrum, ta mucho chikito pa un klas di 8 mucha. E espacio ta ademas den cercania di oficina, caminda tin espacio pa test mucha y pa reuni cu mayor, cu lo bay experiencia estorbo di e klas cu kleuters.

No tin baño y lugar pa hunga pafor adecua pa mucha di edad di school preparatorio. E decision pa kico ta minimalisa e Observatiecentrum y laga otro school opera den e edificio actual di e Observatiecentrum, no tin rason valido pero ta trece si hopi consecuencia negativo cu ne pa e muchanan.

Ta mustra mas logico y responsabel pa laga Cluster 4 unda nan ta ubica actual, cu ta Centro di Bario Dakota, unda recien a inverti caba pa adapta e espacionan pa e grupo meta di e school di Cluster 4. Por adapta e espacionan ey mas, te ora haya un otro lugar mas adecua pa nan.

SEPPA a tuma nota tambe cu den e reunion ultimo di presupuesto Minister Lampe a trece dilanti cu si tin indicacion cu e espacionan signa pa e Observatiecentrum y pa school Cluster 4 no ta apropia, cu lo mester orienta riba otro opcionnan. SEPPA ta aplaudi Minister Lampe den su consideracion pa reevalua su decision.

Un otro seccion di MdC ta Teacher Care. E psicologo di Teacher Care ta brinda ayudo na tur actor den enseñansa cu problema personal.

Den su discurso durante tratamento di presupuesto Minister Lampe a duna di conoce den Parlamento di kier amplia e trabao di e Teacher Care unda e psicologo ta ofrece tambe na e maestro/a guia y conseho con pa yuda mucha cu cierto problema den nan klas.

Sinembargo e Expertisecentrum di MdC tin desde 2011 ta brinda guia y conseho na maestro/a con pa yuda cu cierto problema den klas caba den forma di guia ambulante. Tambe di parti di Afdeling Begeleiding di Departamento di Enseñansa y Bureau Nascholing di IPA ta duna guia na schoolnan.

SEPPA ta reconoce e preocupacion di trahadornan di MdC pa cu e cambionan cu Minister Lampe kier trece, di forma zorgteams multidisciplinario cu lo eherce trabaonan similar cu di MdC, permiti ter beschikkingstellingen sin reemplaso, crea un comision di indicacion independiente cu lo tin tarea cu MdC tin, reduci y realoca Observatiecentrum den un lugar no adecua y amplia Teacher Care cu trabao cu Expertisecentrum ta eherciendo pero ta surgi e pregunta y preocupacion tambe cerca SEPPA riba e consequencianan pa cu e propio MdC.

Ademas cu SEPPA ta keda cu e preocupación ta con e ‘terbeschikking’ ta worde regla dentro di e reglanan di e aparato publico, esta di un departamento di Pais Aruba pa un Stichting.

Finalmente SEPPA kier duna di conoce di ta contento cu Minister Lampe su declaracion di ta consciente cu e profesionalnan di MdC no ta para tras di su decisionnan. Seppa ta di acuerdo cu Minister Lampe pa para tur decision encuanto di MdC pa por dialoga hunto cu e profesionalnan di MdC cu tambe ta desea esaki, pa asina yega hunto na solucionnan cu ta na bienestar di un y tur.

 

- Advertisement -

DUNA COMENTARIO

Please enter your comment!
Please enter your name here