Home Hudicial Sospechoso cu a tira mata a basha abou riba sospechoso Chines

Sospechoso cu a tira mata a basha abou riba sospechoso Chines

557
0
SHARE
- Advertisement -

Den caso di asalto arma fatal na Wayaca dia 9 Mei lo tin sentencia

ORANJESTAD (AAN) – Ayera mainta Hues a sigui cu e parti di investigacionnan cu e tabata desea den e caso penal contra e sospechosonan J.P.E. y P.F., pa kendenan Fiscal a exigi 25 aña di prison pa a tira mata e dama Shasha den su cas y herida su casa.

Tratamento tabata basta largo y DIARIO lo publica diferente articulo. Den un articulo ta publica cu Fiscal ta haya cu e tata di e sospechoso Chines a gaña den Corte cu no tin problema entre famia. Den e articulo aki DIARIO ta publica, con J.P.E. a basha abou tur cos cu e sa di P.F. El a hasta jura cu loke el a bisa ta e berdad.

BASHAMENTO ABOU

Hues a mustra cu mr. Mohamed cu ta representa P.F. a bisa cu su cliente no tin motibo pa haci asalto arma pasobra tin placa na banco. Hues kier mas claridad y a ordena mas investigacion riba cuentanan di banco. Fiscal tambe a bay haci mas investigacion riba P.F. su situacion financiero.

Hues a puntra J.E. kico e ta pensa riba e defensa di P.F. cu ta bisa cu P.F. tin placa y no tin problema financiero. J.E. a bisa Hues cu P.F. tabatin mester di placa. El a bisa cu P.F. kier a divorcia cu su señora y laga un cas na Morgenster pa su ex señora y yiu biba aden y e lo keda biba na Pivia Park. Segun J.E., P.F. a conoce un dama, pero e dama aki no por bay biba serca dje hunto cu su mayornan. P.F. lo mester busca un otro lugar di biba. El a bisa cu P.F. mester di cen pa varios cos. Un parti di placa lo tabata pa paga impuesto di container cu a bestel. Gran parti di e placa lo tabata pa P.F. haya su mesun bida. Segun J.E., el a compronde di P.F., e victima lo tabatin 10 mil florin y cu lo tin un safe cu placa. J.E. a bisa Hues cu P.F. no a bis’e cuanto placa tin den e safe. 

TABATIN HOPI PLACA SCONDI DEN CAMBER

Hues a bisa cu na momento cu J.E. tabata cu e victima Shasha den camber, un hende a yega na porta. Segun J.E., el a puntra e victima unda e placanan ta y e victima a mustra riba dos cartera. Hues a puntra si e victima no a papia y hende yega, kico J.E. lo a haci. Segun J.E., e lo a bay busca den e cas. Hues a mustra cu Fiscal a presenta informacion nobo. Algun dia despues di e atraco, a haya den camber un caha di placa cu 10 mil florin, diferente holoshinan hopi caro entre otro Rolex. Tras di cortina den e camber a haya 60 mil florin. Segun J.E. e no a mira nada di esakinan pasobra e no a haya chens di busca. Loke el a haya den dos carteranan tabata mas o menos 1000 florin.

Hues a puntra P.F. si ta berdad cu e kier divorcia. P.F. a bisa cu ta berdad y e tabata den proceso caba. Pa loke ta e parti di bay biba otro caminda, el a bisa cu e mes tin su mesun cas y su mayornan tin un otro cas. El a bisa cu na Juli 2016 el a cumpra material for di China pa traha e cas pa su ex. E materialnan a yega hunto cu e machinenan cu el a cumpra. Su intension tabata pa traha 6 apartamento na Morgenster. E ex lo tin su cas y patras lo tin 6 apartamento y e placanan cu esaki ta genera ta pa e ex señora pa mantene su mes y e yiunan.

Riba e declaracion aki, Hues a punrta J.E., kico e tin di bisa. J.E. a bisa cu berdad tin dos cas. E cas na parti robez ta mas bien un deposito y den e parti drechi P.F. tabata biba cu su mayornan. Si awor P.F. ta bisa cu e tin su cas, esey ta algo nobo. Entre e casnan no tin muraya.

Segun P.F. ta berdad pero su cas tin 5 camber y no tin problema pa e chick biba cun’e.

J.E. a reacciona cu si mira e cultura Chines, e cos aki lo no bay. E creencia di e mayornan, forma di come y biba no lo bay. Hues a puntra P.F. si e intension ta pa bay biba otro caminda. P.F. a bisa Hues cu por ta den futuro. El a remarca cu ta parce cu J.E. sa nan cultura mihor cun’e.

Despues Hues a dicidi di laga J.E. juramenta. J.E. a jura cu e ta papia e berdad. El a bisa Hues cu ningun hende conoce P.F. mihor cun’e. E conoce P.F. pa 14 aña y loke el bisa ta e berdad.

Hues a bisa cu e ta bay studia e caso y 9 Mei lo tin sentencia pa 2.30 di merdia.

 

- Advertisement -

DUNA COMENTARIO

Please enter your comment!
Please enter your name here