Home Policial Supuesto militar mericano a estafa hoben di Aruba cu 5.090 Dollar

Supuesto militar mericano a estafa hoben di Aruba cu 5.090 Dollar

2664
0
SHARE
- Advertisement -

Cuidao cu hende desconoci cu ta basilabo via social media…

ORANJESTAD (AAN) – Na redaccion di Matutino DIARIO a presenta un mucha muher, cu manera mayoria di e hobennan di awendia, ta bon usuario di e rednan social, y den e caso aki Facebook.

Dia 13 di Februari el a haya un mensahe di un individuo cu a identifica su mes como Mericano, Militar, y cu na e momentonan ey tabata na Siria pero sirbiendo e ehercito di Union Sovietico.

Algo cu ya caba tabata pa desconfia di su storia, pero e mucha muher ta parce no tin malicia, y a cay den e siguiente trampa.

E homber despues di a solicita amistad cune, y pa conoce otro, a puntra e hobencita pa casa cune y cu su facilidad di palabra a convence e hoben ken a bise cu si, cu e ta casa cune.

El a gaña e mucha muher cu e tin tres aña na Siria y cu su casa a muri den un accidente di auto. El a bise cu pa medio di un amiga el a haya su nomber y a drenta den su FB perfil y a lesa tur loke e ta publica, y a gusta su potretnan.

Pa no haci e historia aki mucho largo, e supuesto militar (ken tabata usando nomber y potret di otro meneer cu si ta militar) a bisa e hoben cu pa nan por casa mester manda un carta na ONU, cual e homber mes a redacta y a manda pa hoben pa e mande back na cierto direccion di post.

E mucha muher a haci esey, y el a haya contesta di e lugar cu e mester a deposita na un cuenta bancario 5.090 Dollar cual transferencia el a haci di un banco local pa uno di exterior.

Na dado momento a sosode cosnan cu ora e hoben a bay averigua el a ripara cu a bira victima di estafa, y tambe cu e potret no tabata coresponde na e cara cu el a mira via Skype.

Un amiga di dje cu sa bon di e asuntonan aki a mustre esaki. E hoben a bay denuncia e caso cerca Recherche, pero personanan cu sa cu e estafanan aki a y ta sigui tuma lugar rond mundo, for di supuesto militarnan, no ta kere cu e lo recupera su placa mas.

Tanto e banco den exterior como na e direccion berdadero di ONU e denuncia a worde poni, y el a worde mustra tambe cu e casonan aki di estafa ta tumando lugar. Lamentablemente, e hoben no a consulta cu ningun persona conoci, te despues cu el a perde su cen.

E advertencia ta pa otro hendenan muher, hoben of adulto, ta conciente cu cualkier momento nan tambe por bira victima di e delincuentenan aki. Pa e tipo di invitacionnan aki pa haci amistad, ni haci caso mes di nan. E ta hopi peligroso mes!

- Advertisement -

DUNA COMENTARIO

Please enter your comment!
Please enter your name here