Home Salud Ta calcula cu 15 pa 20% di nos poblacion ta sufri di...

Ta calcula cu 15 pa 20% di nos poblacion ta sufri di diabetes

88
0
SHARE
- Advertisement -

Segun Dokter Sharline Vis

ORANJESTAD  (AAN): Dokter Sharline Vis tambe a hiba palabra durante e conferencia di prensa yama pa Salubridad Publico unda el a splica cu diabetes ta un problema grandi mundialmente y na Aruba tambe.

Ta calcula cu sigur un 15 pa 20% di nos poblacion ta sufri di diabetes. E ta un malesa cronico cu tin su consecuencianan grandi si nos no atende esaki corectamente.

Ta importante pa traha riba prevencion pa e chens pa haya diabetes ta mas chikito. Aki na Aruba tin hopi hende cu factornan di riesgo cu ta haci cu nan chens pa desaroya diabetes ta grandi. Un di e factornan di riesgo grandi ta obesidad. Cu obesidad, sobrepeso y obesitas.

Esey ta un problema cu e peso ta halto y tin vet acumula den e barica, rond di e organonan. E vet aki ta peligroso pa nos salud y tambe peligroso pa desaroya diabetes. Diabetes cu nos ta mira mas frecuente ta e diabetes tipo II.

Esaki ta un tipo di diabetes cu e pancreas, cual ta un klier cu ta traha insulina, ta traha of un tiki insulina di menos, pero e problema mas grandi ta cu e insulina cu e ta produci no ta wordo uza bon den e curpa. Tin cu corda cu e insulina ta un hormoon cu ta hopi importante pa nos metabolismo di sucu.

Ora cu e insulina ta wordo menos produci of e curpa no ta uz’e adecuadamente, e sucu cu nos ta come den forma di carbohidrato, no ta wordo bon hiba, pa asina e sucu wordo kima y genera energia pa tur e procesonan di e curpa.

Ora di diabetes tipo II, e insulina cu e curpa ta traha no ta wordo bon uza. Esaki ta resistencia pa insulina, pero no ta uz’e bon. Esaki ta bin door di e vet cu nos ta acumula rond di nos organonan den nos barica, esta rond di e higra, rond di e tripanan y e ora ey ta importante pa purba lo mas hopi posibel pa no subi di peso y si bo tin sobrepeso caba, pa haci bo best pa baha esaki, pa asina e chens pa haya diabetes ta mas chikito.

Segun dr. Vis, si bo ta diabetico caba y e sucu ta keda halto, ta importante pa tuma bo remedinan manera dokter ta prescribi nan y ta importante pa cambia e estilo di bida pasobra bo no por tuma remedi so y no cambia e estilo di bida.

E estilo di bida kiermen cu e manera cu nos ta come, e manera di movecion, ta importante pa come saludabel, pa come menos carbohidrato, esta menos productonan di hariña y ta importante pa move, pa haci algo di sport. Canamento por ehempel ta hopi bon, sigur si bo tin sobrepeso, ta bon pa cuminsa cu canamento of landamento.

Bo por bay community pools, por bay lama, por bay diferente luga unda por haci algun movecion, cinco dia pa siman, mey ora pa dia. Esey ta haci cu poco poco e peso ta bira miho y e chens pa desaroya diabetes of si bo ta diabetico caba, e chens ta cu mester menos remedi tey e ora.

Diabetes, apart cu e ta un malesa cronico cu ta progresivo, si bo no trat’e bon y na ora, e ta forma tambe un daño pa e arterianan di e curpa. Ta papia di arterianan grandi, manera e arterianan cu ta bay pa e spier di e curason (arterianan coronario). Tambe e arterianan cu ta bay pa e celebro. E arterianan cu ta abastece e celebro cu oxigeno.

 

 

- Advertisement -

DUNA COMENTARIO

Please enter your comment!
Please enter your name here