Home Gobierno Tur autoridad pa otorga uitzend vergunning a wordo kita for di Departamento...

Tur autoridad pa otorga uitzend vergunning a wordo kita for di Departamento di Labor

35
0
SHARE
- Advertisement -

Minister Glenbert Croes:

ORANJESTAD (AAN) — E titular di Labor y Asunto Social, sr. Minister Glenbert Cores, a reacciona den conferencia di prensa tocante e contesta cu el a ricibi di Departamento di Labor, encuanto e seis uitzendburo otorga sin su consentimento ni conocemento.

E mandatario a wordo informa cu nan a duna esakinan na a base di continuidad di maneho locual p’e ta totalmente inaceptable, cu nan ta bay duna e vergunningnan aki a base di continuidad di maneho di AVP. “Cu nos sa cu ta un maneho a base di corupcion.

Mi ta informa nos pueblo di e situacion aki pasobra mi kier pa e seis companianan cu a haya uitzendvergunning awo na 2018, sa publicamente y nan lo haya un carga specificamente, cu e permiso cu nan a haya ta bao revision y revaluacion, pasobra ta mi intencion pa revoca mayoria di nan.

Di con nan ta bao revaluacion y di con mi no por bisa na e momentonan aki cu tur lo wordo revoca? Pasobra dos di nan ta renovacion, y cuater di e seisnan ey ta pa nenga nan, a base di conseho negativo interno di e propio departamento y toch D.O.U ta bay over na otorga vergunning”, e mandatario a subraya y a reitera cu pa su persona esaki ta totalmente inaceptable!

“Kiermen, mi ta bise publicamente pa e seis companianan concerni sa cu den mi concepto, si e practica durante e gobierno di AVP tabata cu bo no tabata tin mester di aprobacion di e Minister di Labor pa otorga vergunning, esey tabata un practica di e gobierno anterior, pero pa e gobierno nobo e ta totalmente inaceptable, por locual mi a procede na notifica na Departamento di Labor y Investigacion, cu mi ta revoca nan autoridad riba tema di uitzend vergunning, y aworaki e unico cu tin autoridad pa otorga uitzend vergunning ta e minister di Labor, exclusivamente. Cu si nan gusta of laga, esey ta bira e regla na e momentonan aki. No por ta asina cu nos kier pone orden y elimina e mal practica y abuso pa e trahadornan y violacion di nos leynan y di hopi mas compania cu ta haci e trabao di uitzenburo y cu no tin permiso cu tambe ta abusando di e derecho di e trahadornan”, e mandatario a subraya.

E dignatario tambe kier pa pueblo sa cu e lo no procede inmediatamente na tuma medida, pasobra e kier pa evalua e situacion cu cabes frio, pa locual e ta instituyendo un comision di investigacion pa bin cu e conclusionnan di e hechonan y a base di esaki e lo tuma e decision final, kico lo bira e relacion di su persona como minster cu e Departamento di Labor y Investigacion.

- Advertisement -

DUNA COMENTARIO

Please enter your comment!
Please enter your name here