Home Gobierno Un dia historico cu inicio di proyecto di renovacion y expansion di...

Un dia historico cu inicio di proyecto di renovacion y expansion di ImSan

147
0
SHARE
- Advertisement -

Dr. Joel Rajnherc, director:

ORANJESTAD (AAN) – E siman aki a habri cu un noticia masha agradable mes, no solamente pa Aruba su sistema di salud publico, pero pa henter nos poblacion cu ta boga pa un mihor calidad di salubridad.

Dialuna mainta, prensa a wordo invita na e inicio di e proyecto di expansion di Instituto Medico San Nicolas (ImSan) y comienzo di e acuerdo di cooperacion entre Baptist Hospital di Florida con dicho ImSan.

Den entrevista cu director di ImSan, dr. Joel Rajnherc, el a expresa cu esaki ta un momento historico ya cu for di inicio cu el a cuminza den su cargo, e hunto cu su team ta haciendo esfuerzonan pa e proyecto aki bira realidad y asina trece pa Aruba un renovacion y expansion di ImSan.

E expansion ta bay consisti di servicio di radioterapia, bestraling, nan ta bay caba e salanan di operacion y departamento pre y post operatorio. Lo bay tin dos sala di operacion; un designa pa wowo y otro pa tur cirugia en general. Ademas lo bay trece mas specialista di wowo (Oftalmologo), pa bin haci operacion cu na e momentonan aki mester manda pacient afo, primariamente pa Colombia.

Dr. Rajnherc a subraya cu hopi mas placa cu awor ta bay afo, lo por keda na Aruba. E proyecto ta bay costa su inversion awor, pero e ta bay rindi su frutonan na momento cu tur esaki lo tuma lugar na Aruba mes.

E prome fase a wordo firma na December 2016 y e financiamento a keda firma na Mei 2017 cu e bankeronan.

E proyecto aki, ta proyecta pa keda cla den 18 pa 20 luna maximo, pa drenta den operacion. Dr. Rajherk a expresa cu nan ta hopi gradici na DOW bao guia di Ing. Marlon Croes cu a yuda enormemente cu e otorgacion di e permisonan pa e trabaonan cu mester wordo haci pafo y paden di e edificio.

E director di ImSan a indica cu como no tur departamento por wordo traha den un biaha, nan tin cu sigui duna nan servicio regular, y e trabaonan lo tuma lugar den fase.

Esaki ta nifica cu algun departamento lo keda cla prome cu otro, pero na final tur lo ta cla aproximadamente den 18 luna.

E prome cinco añanan cu dr. Rajnherc ta eherce su funcion te aworaki, e trabao tabata hopi intensivo, no solamente pa convence e politiconan, directiva di AZV, Finanzas pa duna nan e sosten pa realiza e trabao aki, y esaki tabata e parti mas duro.

Awor ta otro hendenan ta bay haya e parti mas pisa, cu ta e construccion y ImSan ta bay percura pa tur cos bay manera mester ta. A trece for di Merca specialista den construccion di hospital, cu ta den servicio di ImSan y cu ta bay zorg pa e trabao wordo haci debidamente.

E director di ImSan a agrega cu nan mester a convence gobiernonan cu e trabaonan aki ta necesario pa Aruba y cu esaki ta bay atrae turismo medico pa nos Isla. Esaki no a bay facil pero a logra convence tur politico di tur partido, y for di aproximadamente dos aña pasa a haya sosten di tur e miembronan di Parlamento ora ImSan a bay presenta nan dilanti, e proyecto. Dr. Rajnherc a acentua cu nan ta sinti hopi orguyoso cu Parlamento a mustra nan sosten y confianza den e proyecto aki.

Pa conclui, e funcionario a señala cu e proyecto aki no ta solamente construccion di edificio y cumpramento di ekipo nobo, pero mas importante ta su personal, cu ta bay haya training pa nan por duna e servicio di un calidad mas halto posible, y esaki tambe ta den henter e pakete, cu ta encera un inversion di mas of menos 60 miyon florin.

Manera el a comenta e financiamento ta di banco, e edificionan ta propiedad di ImSan y e tereno unda e ta bin ta erfpacht, pues un proyecto sui generis cu ta cumpli cu tur su debernan.

- Advertisement -

DUNA COMENTARIO

Please enter your comment!
Please enter your name here