Home Hudicial 12 y 8 aña di prison pa duo cu a tira agente...

12 y 8 aña di prison pa duo cu a tira agente di Polis

228
0
SHARE
????????????????????????????????????
- Advertisement -

ORANJESTAD   (AAN) – Ayera mainta e hombernan I.V.M., J.F. y L.W. a presenta dilanti Hues pa scucha nan sentencia. Hues a confirma e exigencia di Fiscal pa L.W. cu ta 4 aña di prison, 8 aña pa I.V.M. pero a baha e exigencia di Fiscal na 12 aña pa J.F. E trio aki tabata envolvi den serie di ladronicia y hasta asalto. I.V.M. y J.F. a bay horta na un cas y a tira un agente di Polis cu ta bisiña.

EXIGENCIA DI FISCAL

Dia 4 di Mei, tratamento di e caso a tuma lugar caminda pa oranan largo a pasa riba tur e delitonan. Por a ripara cu J.F. tabata desmenti practicamento tur cos. Fiscal a mustra cu J.F. tabata blo nenga pero en realidad J.F. ta bon envolvi den practicamente tur e casonan. El a mustra cu J.F. tin un carchi di castigo cu practicamente casonan similar. Fiscal a exigi 15 aña di prison pa J.F. Pa loke ta I.V.M., Fiscal tabata kier a exigi 10 aña di prison pero el a bisa cu e ta tene cuenta cu I.V.M. a coopera cu Recherche pa trece claridad den e casonan y a exigi 8 aña di prison. Pa L.W. Fiscal a exigi 4 aña di prison.

E acusacionnan cu Fiscal a presenta durante tratamento di e caso ta entre otro cu I.V. M. entre 1 Augustus 2017 – 22 Augustus 2017, tabatin arma di candela. Dia 2 Augustus 2017, hunto cu J.F. a tira un agente di Polis. L.W. ta wordo acusa di intento di ladronicia cu violencia caminda 13 Augustus 2017 hunto cu otronan a purba horta e homber V.L. Tambe ta acusa L.W. cu dia 14 Augustus 2017 lo a kibra drenta cas. Dia 18 Augustus 2017 hunto cu J.F. y otronan a haci e asalto arma riba e empleado di Superior Tobacco. J.F. ta wordo acusa di posecion di arma na Augustus 2017.

CASTIGO PA ASALTO ARMA Y HORTA TURISTA

Hues a bisa cu e ta haya legalmente proba cu L.W. a participa den e asalto arma riba e empleado di Superior Tobacco hunto cu otronan. Tambe Hues ta haya L.W. culpable di ladronicia na un cas na Bakval cu otronan. Tambe a keda proba ladronicia for di un camber di hotel y un cas.

Pa e castigo, Hues a bisa cu e ta tene cuenta cu hunto cu otronan, L.W. a haci e asalto arma cu violencia riba e trahador di Superior Tobacco den dia cla. Esaki a shock henter comunidad y a crea sentimento di inseguridad den comunidad. Pa e ladronicia for di turista den un camber di hotel, Hues ta haya cu L.W. a tacha imagen di Aruba. Turistanan ta bin Aruba pa relaha y no bira victima di ladronicia. Hues a tene cuenta cu e carchi di castigo cu ya caba tin condena pa casonan similar.

Hues a bisa cu e demanda di daño di 50 mil florin di Superior Tobacco ta keda aproba. Ademas Hues a aproba e demanda di 500 florin pa e persona di un cas cu a wordo horta. Hues a bisa cu e ta pone e medida di demanda di daño. El a condena L.W. na 4 aña di prison, kitando e tempo cu e ta sera den KIA.

CASTIGO PA TIRA POLIS Y HORTA DIFERENTE LUGAR

Hues a sigui cu e acusadonan I.V.M. y J.F. Ambos Hues ta haya culpable di posecion di arma. Cada un tabatin arma di candela na diferente momento. J.F. ta culpable di ladronicia for di un supermercado na San Nicolas. Hues ta haya e duo culpable di intento di mata, ora nan a tira un agente di Polis na momento cu nan tabata horta for di un cas.

Hues ta haya nan culpable di intento di ladronicia na Ponton caminda nan tabatin intension di forza un hende duna nan placa. Na Weg Seroe Blanco tambe nan a haci ladronicia.

Hues a mustra cu J.F. dia 18 Augustus 2017 tambe tabata envolvi den e asalto arma na Superior Tobacco. Tambe J.F. a horta for di dos auto ariba tereno di Superior Tobacco y na un cas na Savaneta. Hues a bisa cu e ta rechaza e defensa di abogadonan cu na Ponton nan a hala atras.

Pa cu castigo, Hues a bisa cu e ta tene cuenta cu a tira bisiña di cas caminda nan a bay horta. E bisiña ta un agente di Polis. Door di esaki a crea inseguridad den comunidad. Hues ta haya cu J.F. y I.V.M. a demostra cu no ta respeta otro su integridad. El a mustra tambe cu ambos anterior a yega di wordo condena pa casonan similar.

Hues a condena I.V.M. y J.F. na paga un daño di 2500 florin na un persona mientras cu J.F. mester paga e 50 mil florin cu Superior Tobacco a demanda hunto cu e otronan cu a participa den e asalto arma aki. Hues a bisa cu e ta pone medida di pago.

Hues a condena J.F. na 12 aña di prison y I.V.M. na 8 aña di prison.

Tempo lo mustra awor cu nan lo bay apela e sentencia. Tanto Fiscal como e sospechosonan por apela. Si apela e sentencia, e ora ey ta Corte Superior, tres Hues cu ta forma Hof lo bay trata e caso di nobo y lo bira interesante pa scucha kico PG ta pensa di e sentencianan.

 

- Advertisement -

DUNA COMENTARIO

Please enter your comment!
Please enter your name here