Home Hudicial 15, 8 y 4 aña di prison exigi pa trio envolvi...

15, 8 y 4 aña di prison exigi pa trio envolvi den serie di asalto arma

230
0
SHARE
????????????????????????????????????
- Advertisement -

Nan a hasta tira un agente di Polis na civil

ORANJESTAD(AAN)–  – Ayera pa basta ora a trata e caso serio di asaltonan arma, ladronicia contra e trio Arubiano I.V.M., J.F., L.W. Fiscal a baha pisa riba e trio aki caminda a exigi 15 aña di prison pa e sospechoso J.F., 8 aña di prison pa I.V.M. y 4 aña di prison pa L.W.

Durante tratamento di e caso por a constata cu e sospechoso J.F. tabata desmenti casi tur acusacion. Parce cu J.F. y I.V.M. tin problema cu otro. Den Corte a pone nan sinta separa di otro. Tabatin un momento cu ariba peticion di abogado Hues kier a mira nan haltura pero J.F. a nenga retundamente pa para banda di I.V.M. Aparentemente tur esaki tin di haci cu e hecho cu I.V.M. a coopera cu investigacion y a bisa tur cos.

ACUSACIONNAN

Fiscal a presenta un serie di acusacionnan cu ta varia di posecion di arma, tira un agente di Polis na civil, asalto arma riba empleado di Superior Tobacco, horta na un supermercado, horta for di autonan riba tereno di Superior Tobacco.

ASALTO

13 Aug. 2017 lo a forza homber. Ta M. y F. ta envolvi. Na Weg Seroe Blanco a detene homber B. caminda a haya den auto 3 cellular. El a bisa cu un di e cellular ta di F. A bay investigacion riba e cellular. Segun F., e cellular no ta di dje. Hues a bisa cu riba cellular tin un account di facebook riba nomber di F. F. a bisa cu e no tin facebook.

A scucha yamadanan entre F. y un persona caminda papia di un asalto riba un negoshi. A papia tambe di asalto riba Subway. Tabata papia con lo bay haci e asalto riba un homber na su cas. 13 Augustus 2017 tabata papia ki ora lo mester haci e asalto. F. a desmenti di a papia y no sa di nada.

Hues a mustra cu e homber B. a bisa cu diferente biaha e lo a horta cu M. El a bay cu M. pa asalta un persona na su cas na Ponton. A warda pero e homber no a presenta. Segun B., ta F. a duna informacion riba e persona cu lo tin placa. F. ta para riba cu e no a papia nada. Segun F. e no conoce e personanan ey.

Hues a puntra M. si e asalto no a sigui pasobra e homber no a presenta. M. a bisa cu ta asina. Hues a puntra si a traha un otro plan di asalto. M. a bisa cu no. El a bisa cu ora e homber no a presenta, nan a bay di e cas. Hues a puntra kico M. lo haya si e asalto a resulta. Segun M. e lo haya un parti di e placa cu e persona tin.

Hues a puntra si tabatin contacto cu F. mientras cu tabata warda riba e persona na su cas. M. a bisa cu esey e no sa. Fiscal a bisa cu F. ta bisa cu e cellular no ta di dje pero e homber B. a bisa cu e tabata papia cu F. riba e asalto riba e auto di Superior Tobacco. Fiscal a puntra di con tin diferente hende ta bisa di a papia cu bo riba e cellular. F. a bisa cu e no sa.

LADRONICIA CAS

A horta for di cas y a haya flatscreen den mondi. E doño a sinti falta di placa y joyas. B. a wordo deteni na e sitio y el a bisa cu e tabata hunto cu M. y F. Nan a bis’e pa bay cas di un taxista y cu M. tabata arma. Nan tabata den e cas ora cu Polis a yega y nan a core bay den mondi. F. lo a duna B. 10 florin pa gasoline. M. a admiti cu e tabatin un arma cun’e y cu nan a bay na e cas.

F. a bisa cu e no conoce M. y B. y cu e no a haci e ladronicia. E doño di cas a haci demanda di algo mas di 8 mil florin di daño. Abogado mr. Carlo a puntra su cliente M. si a coy cos den e cas. M. a bisa cu no a coy nada.

TIRA AGENTE DI POLIS

Hues a mustra cu riba 2 Augustus 2017, M. y F. lo a tira un agente di Polis na civil den su pia. E agente di Polis a declara cu el a scucha sonido na cas di bisiña. E agente di Polis a bay coy su arma pa bay averigua kico tabata pasando. Su mama a bay pafor y tabata grita esnan cu lo tabata den e cas. El a bay pa hala su mama un banda y e momento ey un di e hombernan a tira riba dje y nan a core bay. El a sufri un tiro den rudia. E agente a duna descripcion cu esun cu lo a tira tabata color scur cabey chikito y tabatin un otro persona mas.

Investigacion a conduci cu a bay na cas di M. y a haya M. cu arma bou su cusinchi. M. a bisa cu el a haci e asalto na e cas di bisiña. E huls cu a haya na e cas caminda a tira, ta cuadra hopi cu e arma. M. a bisa cu el a bay haci asalto hunto cu F. y cu F. tabatin su arma. El a bisa cu na dado momento el a scucha un tiro cu F. a haci y despues cu el a haya e arma. F. den Corte tabata bisa cu esey no ta berdad.

Hues a mustra cu B. a declara cu M. a papia di un asalto arma cu a haci hunto cu F. B. a bisa cu el a compronde cu F. tabatin e arma y cu F. a tira e homber cu a resulta di ta un agente di Polis.

M. a bisa Hues cu e no a tira e agente di Polis. Segun M., F. a pidi e arma di M. pasobra e tabata kier e arma pa tira. Hues a puntra pakico F. kier a tira. M. a bisa cu e no sa pakico F. kier e arma. Segun M., F. kier a core bay cu e arma pa si a gara M. e no tabatin arma cun’e. Ariba preguntanan di Hues, M. a bisa cu nan a bay na e cas cu tabata bashi. Ora cu hende a cuminsa grita, el a duna F. e arma pa e core bay cun’e. Hues a puntra M. pakico e tabatin e arma. M. a bisa cu e tabatin e arma pa su proteccion. Hues a puntra F. si e tabata envolvi. F. ta para riba cu no.

Fiscal a bisa M. cu for di discripcion di e agente di Polis, ta parce cu ta M. lo a tira. M. a bisa cu e no a tira. Fiscal a puntra F. si e tabatin cabey corta. F. a bisa cu e tabatin dread logs cortico.

Abogado mr. Carlo a puntra M. for di kende el a cumpra e arma. M. a bisa cu el a cumpra e arma for di F. E abogado a pidi Hues pa laga M. y F. para pa mira nan haltura. Hues a pidi nan pa para banda di otro pero F. no kier para banda di M.

HORTA SUPERMERCADO

F. a admiti di tabatin arma di candela riba 14 Juli 2017 ora a horta for di un negoshi hunto cu W. Entre 50 pa 60 caha di bebida alcoholico. Tabatin mancha di sanger ariba vloer y riba video a mira dos persona core bay den un auto Skyline. Polis a bay persigui e auto. E chofer a core bay na pia y un dama a keda den auto. Polis a haya cosnan cu ta usa pa horta den e auto. E auto a resulta di ta di ta mama di W. E dama a bisa cu el a haya lift. Fiscal a bisa cu a haci investigacion riba W. y F. y NFI ta mustra cu e mancha di sanger ta di F.

Hues a puntra F. si el a haci esey. Segun F. el a haci’e y e sa di dje y no di otro. El a desmenti di a huy den e Skyline. El a bisa cu el a core bay. Hues a puntra con a bay cu e cahanan. Segun F. den un auto. Hues a bisa cu tin un demanda di mas cu 77 mil florin pa e cahanan di whisky.

ASALTO ARMA RIBA AUTO DI BESTEL

Dia 18 Augustus 2017 a haci asalto arma riba empleado di haci entrega di Superior Tobacco. Hues a mustra cu W. tabata hunto cu F. y un otro persona G.W. Hues a mustra cu G.W. ta e ruman di W. Segun W. e ruman no ta envolvi. E empleado di Superior Tobacco a bisa cu el a wordo asalta. Mas cu 600 carton di sigaria a horta y ta balora na mas cu 81 mil florin. Tin testigo a mira e asalto arma. E testigo a mira cu tres persona a haci asalto. El a reconoce F. cu a haci e asalto pasobra e conoce F. pa basta tempo. Polis a bay wak video di seguridad y a reconoce G.W. y W. E victima a bisa cu el a reconoce W. como esun cu a asalt’e. W. a bisa cu esey ta imposibel pasobra e tercer persona tabatin cara completo tapa. W. a bisa cu e no ta bay menciona nomber. F. a bisa cu e kier wak e persona cu a menciona su nomber. Hues a mustra cu e dama K. a bisa cu e ta amiga di F. y cu F. a duna pakinan di sigaria y cu K. a bende esakinan. F. ta para riba cu e no conoce K. Fiscal a mustra cu ora nan a detene F. den un apartamento y K. tabata kedando den e apartamento aki. F. a keda para riba cu e no conoce K.

Fiscal a mustra tambe cu F. a bisa Polis cu loke K. a declara no ta berdad. F. na dado momento a bisa cu e conoce K. pero nada di loke K. a bisa di sigaria ta berdad. Fiscal a remarca cu bisa cu no conoce K. ta completamente otro cu bisa cu K. no a bisa e berdad.

Fiscal a remarca cu diferente biaha por a scucha F. bisa cu e no conoce e hendenan. Por bien ta cu e no kier papia di e hendenan y pesey e ta bisa cu e no conoce nan.

Abogado mr. Zara a puntra su cliente, W. con bin e tabata envolvi den e asalto. El a bisa cu dos persona a buske y el a kere ta trip nan ta bay trip. E abogado a puntr’e si el a haya cartonnan di sigaria. El a bisa cu no.

Na 2016 a horta for di autonan di bestel di Superior Tobacco cu tabata staciona riba tereno di e empresa. Mas o menos 150 mil florin balor di sigaria. A haya mancha di sanger cu segun DNA ta cuadra cu F. Hues a puntra F. si e sa di e caso aki. F. a bisa cu e no sa nada di esaki. Hues a puntra con su sanger a yega eynan. F. a bisa cu e no sa.

EXIGENCIA DI FISCAL

Fiscal a mustra cu F. tabata blo nenga pero en realidad F. ta bon envolvi den practicamente tur e casonan. Fiscal a exigi 15 aña di prison pa F. Pa loke ta M., Fiscal tabata kier a exigi 10 aña di prison pero teniendo cuenta cu M. a coopera cu Recherche pa trece claridad den e casonan, Fiscal a exigi 8 aña di prison. Pa W. Fiscal a exigi 4 aña di prison. Awor Hues ta bay studia e caso y dentro di algun siman lo por spera sentencia.

 

- Advertisement -

DUNA COMENTARIO

Please enter your comment!
Please enter your name here