Home Cultura 21 di mei 2003 Gobierno di Aruba a oficialisa Papiamento como idioma...

21 di mei 2003 Gobierno di Aruba a oficialisa Papiamento como idioma oficial

84
0
SHARE
- Advertisement -

ORANJESTAD   (AAN) Departamento di Cultura Aruba (DCA) bou auspicio di Ministerio di Cultura ta felicita henter Aruba cu e di tres lustro di oficialisacion di nos idioma Papiamento riba e fecha di 21 di mei, tabata 21 di mei na 2003 cu Gobierno di Aruba a oficialisa Papiamento como idioma oficial banda di Hulandes.

Nos idioma materno Papiamento, hunto cu nos himno, bandera y escudo ta forma parti di nos identidad. Papiamento ta un idioma crioyo. Esaki ta un idioma cu ta nace ora cu dos of mas grupo di hende, cu ta papia diferente lenga ta topa otro. Nan ta crea un idioma nobo pa por comunica cu otro. Si e idioma nobo aki bira idioma materno, nos ta yam’e un idioma crioyo.

Papiamento ta e idioma materno na Aruba, Boneiro y Corsou. Un idioma cu tin mas cu 300 aña caba. Por bisa cu como Papiamento no tabatin un ortografia defini den e prome siglo y mey di su existencia, tur hende tabata skirbi Papiamento manera nan tabata kere c uta bon y no di acuerdo cu un of otro regla stipula.

Dia 5 di mei 1976, Gobierno di Teritorio Insular di Aruba a instala un Comision di Ortografia pa formula y recomenda un forma di skirbi nos idioma Papiamento. Dia 13 di september 1976 e comision a entrega su recomendacion na Gobierno di Aruba. Riba dia 30 di october 1976 Parlamento di Aruba a aproba unanimamente e ortografía etimologico.

Ortografia etimologico ta e forma di skirbi un palabra basa riba e origen di e palabra. Den ortografía fonologico bo ta skirbi tur letter of combinacion di letter cu ta zona igual, di e mesun forma. Na Boneiro y Corsou e ortografía ta esun fonológico.

Tabata dia 21 di mei 2003, Gobierno di Aruba a acepta Papiamento como lenga oficial di Aruba banda di Hulandes. Esey kiermen cu carta oficial pa Gobierno por ta na Papiamento of na Hulandes.

Na scol ta uza Papiamento den Enseñansa Preparatorio como tambe den Enseñansa Special.

Na aña 2005 Papiamento a drenta Enseñansa Avansa como materia. Mester menciona esaki como un gran logro den nos Enseñansa. E vehiculo cu a introduci ta e buki/metodo cu tin e nomber Cristal.Un idioma su desaroyo semper tin diferente faceta.

Desde aña 2008 ta trahando riba e condicionnan pa introduci Papiamento tambe den Enseñansa Basico. Un idioma su desaroyo semper tin diferente faceta. Nos mester realisa y comprende cu nos idioma ta bon structura! E aña aki tabatin examen di scol na HAVO y VWO den nos idioma Papiamento.

 

Na januari di e aña aki. Gobierno di Aruba a decreta e aña aki como Aña di Papiamento via decreto No. MinOWD/83/18           167/18, fecha 18 di januari 2018.

    Fundacion Lanta Papiamento a acerca Departamento di Cultura Aruba y den cuadro di 2018 Aña di Papiamento, hunto tin un calendario di actividad pa henter aña. A organisa un Feria di Papiamento riba diasabra 19 di mei 2018 den un area historico. Esaki relaciona cu e fecha di 21 di mei celebrando 15 aña di oficialisacion di nos idioma Papiamento. Un actividad cu hopi instancia, departamento di gobierno, fundacionnan a uni forza den realizacion di e Feria ya menciona.

Departamento di Cultura Aruba ta gradici tur esnan cu a uni forza den realisacion di e bunita Feria di Papiamento pa trece nos idioma den un luz y bida caminda pueblo di Aruba por a participa y cera conoci cu mas di nos dushi Idioma.

 

 

 

 

 

 

 

 

 

 

 

 

 

 

 

- Advertisement -

DUNA COMENTARIO

Please enter your comment!
Please enter your name here