Home Hudicial 3 aña di prison pa homber cu a cende apartamento di ex...

3 aña di prison pa homber cu a cende apartamento di ex amiga na candela

81
0
SHARE
????????????????????????????????????
- Advertisement -

Aunke e sospechoso ta para riba cu e no a haci nada

ORANJESTAD   (AAN) – Ayera mainta e homber K.J. a scucha Hues confirma e exigencia di Fiscal di 3 aña di prison. Hues ta comparti e punto di bista di Fiscal cu K.J. no ta culpable pa e acusacion di droga pero si ta culpable pa e cendemento di un apartamento na candela.

CENDE CANDELA

Na comienso di luna tratamento di e caso aki a tuma lugar caminda Hues a mustra cu tabatin un candela den un apartamento di un compleho di 12 apartamento. Den di dos piso tabatin candela. Investigacion a mustra cu e candela a wordo cendi intencional. A haci investigacion den otro cas y a haya droga. E habitantenan di e cas a bisa cu e droga ta di K.J.

Segun e relato di Polis, doño di e apartamento a bisa cu el a sali bay na un bar y na dado momento un bisiña a yam’e informe cu e apartamento di dje ta na candela. E bisiña a declara na Polis cu e tabata drumi y a spierta ora el a scucha glas kibra y hende grita bisa cu awe tur cos ta caba. Segun e bisiña, el a reconoce e stem di J. cu tabatin relacion cu e doño di e apartamento. Ora el a sali mira kico lo tabata pasando, el a mira cu otro bisiña tabata usa slang di awa pa paga e candela den e apartamento y a saca e muchanan cu tabata drumi den e apartamento.

Hues a mustra cu segun e raport di Polis, bisiñanan lo a mira K.J. bisti den paña di Halloween caminda e tabata bisti na preto y mascara blanco. Tin imagennan di camera seguridad den bar caminda por mira e dama doño di e cas y tambe a mira K.J. drenta y tabata haci cu su man manera e ta tira riba K.J. Lo a mir’e cu mascara pero despues no.

Hues a puntra K.J. kico a pasa. Segun K.J. e tabata den e bar y tabatin discussion cu e dama M. Segun K.J., M. tabata un hopi bon amiga. El a nenga di tabatin relacion cu M. El a nenga di a haci señal cu su man manera cu e ta tira cu un pistol riba M. El a desmenti di a cende e apartamento na candela.

EXIGENCIA DI FISCAL

Fiscal a bisa cu Polis a haya den camber di v.d.L. 61,8 gram di cocaine y el a bisa cu e droga ta di K.J.

Fiscal a sigui bisa cu no tin raport cu ta confirma cu ta cocaine pero e ta sali for di punto di bista cu ta cocaine. Fiscal a sigui bisa cu a laga haci investigacion pero no a haya muestra di DNA cu e droga ta di K.J. Ta solamente declaracion di v.d.L. tin contra K.J.  Pesey Fiscal a pidi Hues pa declara K.J. liber.

Pa loke ta e cendemento di candela, Fiscal ta haya proba cu ta K.J. a cende e apartamento na candela. E candela a cuminsa riba un sofa y a causa hopi peliger pa kima henter e apartamento y otro apartamentonan. Esaki a sosode den oranan di anochi cu ta causa peliger di morto pa otronan. Fiscal a señala cu hopi hende no kier a declara contra K.J. pasobra nan tin miedo di dje. El a exigi 3 aña di prison, kitando e tempo cu e ta sera.

SENTENCIA

Ayera mainta Hues a bisa K.J. cu e ta comparti punto di bista di Fiscal cu no por haya J. culpable di droga. Hues ta haya K.J. culpable di a cende e apartamento na candela. Na opinion di Hues, door di a cende e candela, K.J. a pone bida di hende na peliger y peliger cu e compleho di apartamentonan por a kima. Hues a bisa cu e yiunan di e dama tabata drumi den e apartamento ora cu K.J. a cende e candela.

Hues a bisa cu e ta confirma exigencia di Fiscal y a condena K.J. na 3 aña di prison, kitando e tempo cu K.J. ta sera den KIA.

APELA OF NO?

Tempo lo mustra si abogado mr. Bryson lo bay apela e sentencia. E abogado durante tratamento di e caso a bisa Hues cu e ta haya cu Fiscal a faya den presenta pruebanan cu ta K.J. a cende e candela. Segun e abogado, Fiscal ta usa declaracion di personanan, kendenan ta bisa cu nan a scucha di otro.

E dama M. mes no tabata presente ora e candela a sosode y no por bisa e motibo di cendemento di candela. E unico testigo, ta e bisiña cu a bisa cu el a tende un stem cu ta parce di K.J. pero no a mir’e. El a scucha un sonido duro y despues a mira candela pero no a mira K.J. Hues a rechaza e defense y awor lo mira si e abogado ta apela. E tin 14 dia pa haci esaki segun ley penal.

 

- Advertisement -

DUNA COMENTARIO

Please enter your comment!
Please enter your name here