Home Labor APA kier yega na un CAO cu conta pa tur trahador y...

APA kier yega na un CAO cu conta pa tur trahador y a reuni cu e dos sindicatonan

11
0
SHARE
- Advertisement -

Sr. Humphrey Tromp, director financiero:

ORANJESTAD (AAN) — Gerencia di Aruba Port Authority (APA), a sinta cu sindicato TOPA cu recientemente a gana e referendum pa e departamento nautico. Tambe tin STA cu ta representa trahadonan di otro departamentonan di APA.

Señor Humphrey Tromp, director financiero di APA a elabora al respecto den entrevista cu nos redaccion.

Sr. Tromp a puntualiza cu APA kier purba di negocia e Contrato Colectivo cu un sindicato so, pasobra si ta wak e structura di entradanan di APA no ta asina cu cada departamento ta genera nan propio entrada, unda cu por regla algo specifico pa un solo departamento.

APA ta un compania relativamente chikito cu menos di 100 trahado y si ta ripara e forma con e ta structura cada departamento mester di e otro.

Riba esaki, Sr. Tromp ta splica cu si mester regla algo ta hacie pa tur e trahado por igual.

Cu e mensahe aki a sinta cu ambos sindicato, ya cu te ainda e sindicato cu tabata representa tur e trahadornan tabata STA. Na Januari tabata tin un referendum unda cu TOPA a bay pa haya representacion di e compania completo, cu no a resulta.

E ora ey el a pidi pa representa departamento nautico so, cual a wordo honra door di mediador. APA no ta  contra ningun sindicato, pero lo kier regla un solo CAO y ta p’esey APA a cuminza un caso contra mediador pa para e referendum.

No obstante Huez no a honra esey cu e resultado ya conoci, y APA ta sinta cu nan na mesa, ya cu ta nan obligacion. Gerencia a sinta na mesa cu ambos sindicato, y yega na un CAO nobo. Esun actual ta vence na fin di Juli 2018.

APA no ta sinti cu STA tin mucho “gana” di sinta cu gerencia di APA, mientras cu di parti di TOPA si a haya mas flexibilidad y, naturalmente, si ta tocante departamento nautico kier sinta apart. Pero esaki ta un situacion unda cu si un beneficio ta tuma mas di e bolo e otro beneficio ta bira menos. E ta hopi simple, segun Sr. Tromp.

Ta asina cu gerencia a mustra na ambos sindicato e cifranan y kico ta e resultado te awor. E dos pilarnan mas importante di APA, actualmente, ta e parti di Barcadera cu ta draai dos aña caba y e cruseronan cu tambe tin su stabilidad. Riba e parti di “blank cloth”, awor ta cuminza cun’e y ta keda ocupa cu “port sitting” na Barcadera pero riba eseynan no tin nada concreto ainda.

A base di e proyeccion cu tin aworaki, tin cu wak kico extra por wordo duna, pero e compania mester keda stabil pa e proximo añanan. Tambe mester keda realistico y wak e beneficionan, tin cu wak e mercado y tambe e funcion cu e trahado ta haciendo y haci un comparacion. Si ta compara e beneficionan di APA, e ta na un nivel hopi halto anto riba esaki na dado momento nan mester ta realistico y exigi den e cuadro di nan funcion y no por bay fuera di e mercado. Esey ta lo corecto.

Pero, en todo caso, gerencia tabata hopi habri cu tur dos sindicato y nan a mustra comprension. Awo gerencia ta na spera di cada un nan proposicion, y di eynan lo sigui. Pero si a pidi pa mantene e topico ora di papia cu prensa, riba mesa. Ta keda traha cu e speranza cu prome cu fin di Juli por yega na un CAO cu ta conta pa departamento nautico pero pa tur e trahadornan tambe, segun sr. Tromp.

 

- Advertisement -

DUNA COMENTARIO

Please enter your comment!
Please enter your name here