Home Ciencia y Tecnologia Aruba a gana di tres lugar den Hackathon di Facebook

Aruba a gana di tres lugar den Hackathon di Facebook

49
0
SHARE
- Advertisement -

ORANJESTAD   (AAN):  Nomber di Aruba a resona den un cumbre di tecnologia na Silicon Valley. Siman pasa e hoben Marko Espinoza tabata invita pa Facebook pa participa den un conferencia di desaroyo di software di e plataforma di red social mas grandi na mundo.

Despues di un proceso riguroso unda casi 1 miyon interesado a registra for di rond mundo, a scoge Espinoza pa atende e conferencia “F8” y participa den e hackathon. E conferencia “F8” a tuma luga na San Jose, California unda tabatin cupo pa solamente 5000 persona por atende, di cual 150 so a participa na e hackathon.

Meta di e compania Facebook ta pa diversifica su mes e aña aki den F8, ademas tema pa e hackathon tabata con tecnologia di Facebook por uni comunidadnan. Marko Espinoza tabata e unico participante cu Facebook a selecciona for di islanan di Caribe y Reino Hulandes pa e hackathon. El a bin cu un idea y desaroya solucionnan pa esakinan. Un problema poco peculiar na Aruba pero cu alabes diferente ciudad chikito y mediano ta confronta rond mundo ta, con ta raporta malcontento relaciona cu e mantencion di e ciudad.

Hunto cu un desaroyado di software for di Chile y Kenya, Marko Espinoza a trece dilanti un idea y cu solucion den menos di 8 ora. E grupo lidera pa e hoben representando Aruba a crea un “bot” uzando e API di Facebook yama “OmbudsBot”. Implementando e tecnologia di Facebook Messenger e “bot” ta contesta automaticamente un serie di preguntanan pa por colecta informacion necesario di e problema. E coleccion di datonan ta aparece riba un mapa den tempo real unda por colecta y visualisa e problemanan di diferente manera.

Un panel di huradonan a evalua e idea, ehecucion di e desaroyo y por ultimo e Facebook app mes. A traha un total di 49 Facebook app durante e hackathon, di cual Facebook a selecta 3 ganado. A selecta e concepto di “OmbudsBot” na di tres luga. Facebook di e manera aki ta busca pa implementa servicionan nobo na beneficio di e actividad, considerando ideanan for di tur skina di mundo.

Pa algun tempo Facebook no ta organisa un hackathon mas, pero den 2018 a dicidi di tog organisa esaki. E organisacion di un hackathon ta un concepto cu Facebook durante su existencia den e ultimo 14 añanan a yuda forma den comunidad di tecnologia. Awor Facebook lo sondea posibilidad pa tuma e concepto y desplega esaki riba su plataforma.

Marko Espinoza ta un hoben profesional cu for di 2005 a profila su mes pa un interes grandi den mundo di medionan di comunicacion y tecnologia. E ta responsabel pa a trece bek Colarin como revista y blog di Colegio Arubano. Despues di a caba scol, Marko a colabora na diferente medio di comunicacion.

Na aña 2009 ex-Prome Minister Mike Eman a recluta Marko pa un funcion clave di Oficina di Prensa di Gabinete Mike Eman I y II. Actualmente Marko Espinoza ta encarga cu e operacionnan diario di website di noticia 24ora.

 

 

- Advertisement -

DUNA COMENTARIO

Please enter your comment!
Please enter your name here