Home Parlamento Atraco y abuso sexual ta bay wordo combati cu man duro

Atraco y abuso sexual ta bay wordo combati cu man duro

224
0
SHARE
- Advertisement -

Fraccion di POR a entrega iniciativa di ley pa castigonan minimo

ORANJESTAD (AAN): — Dialuna mainta Parlamentarionan Alan Howell y Marisol Lopez-Tromp a haci entrega oficial di un iniciativa di ley pa bin cu castigonan minimo pa cierto delitonan.

E iniciativa di ley aki a wordo entrega pa miembronan di Fraccion di POR na Presidente di Parlamento, sr. Ady Thijsen y e miembronan a expresa nan deseo pa e iniciativa aki por wordo trata mas pronto cu ta posibel.

E urgencia ta debi na e desaroyo di ultimo añanan pa loke ta trata delitonan moral y atraconan violento riba nos isla. E cambio di ley unda ta bin cu un castigo minimo porta un herment grandi pa evita e crimennan aki den nos comunidad.

Delitonan grave manera ta atraconan arma, abuso sexual di mucha, abuso sexual di esnan cu handicap, abuso sexual di hobennan y abuso sexual en general cu ta causa sentimentonan di preocupacion, miedo y inhusticia den comunidad. Si tin castigonan di prison mas pisa, tanto ciudadanonan como bishitantenan di nos isla lo sinti nan mes mas sigur.

Mester bisa cu Marisol Lopez-Tromp ya for di aña 2001 tabata un di esnan cu a bin cu un iniciativa di ley pa loke trata castigonan pa delitonan sexual. Cambionan a keda aproba y na varios ocasion por a scucha for di Ministerio Publico cu e introduccion di esakinan a yuda hopi cu e tipo di crimennan aki.

Por menciona entre e cambionan cu a bira castigable presenta pa Lopez-Tromp anteriormente tin e abuso sexual di un mucha homber, algo cu antes no tabata e caso. Tambe a agrega e abuso di esnan cu handicap y abuso den matrimonio, sin laga afor e parti di ‘stalking’.

Awo cu e iniciativa di ley aki lo cual ta pone enfasis riba dje ta pa bin cu un castigo minimo pa e crimennan grave aki y asina ataca nan cu man duro. Di e forma aki ta mustra pueblo cu Fraccion di POR ta para banda di pueblo y ta pone cu hueznan no por duna un castigo menor na loke e ley ta stipula pa e crimennan cometi.

Fraccion di POR, mescos cu hopi di nos ciudadanonan ta considera cu e castigonan na e momentonan aki ta hopi abao. Na momento cu nos hendenan considera cu e hueznan ta dunando castigonan demasiado abao, nan lo tin menos confianza den nos sistema hudicial.

Door di introduci eventualmente castigonan minimo lo kibra cu e sistema Hulandes y hueznan mester cumpli cu e deseo di pueblo y lo conduci na castigonan mas pisa pa esnan cu comete e delitonan grave aki.

Parlamentario Alan Howell a indica cu castigonan minimo pa loke ta delitonan grave no ta algo nobo, esakinan ta existi caba entre otro na Belgica, Inglatera, Wales, Alemania, Austria, Suiza, Suecia, Norwegen, Dinamarca, Portugal, Spaña, Italia y Francia.

Cu e cambio di ley aki, unda for di e prome biaha e criminal lo haya su mes confronta cu un castigo di prison basta pisa, lo reduci considerablemente criminalidad. Esaki no solamente debi na e miedo di bay cera, pero tambe door cu esnan cu comete e delitonan toch, lo keda pa hopi mas tempo cera y leu for di sociedad, evitando asina cu nan bolbe comete e actonan aki.

Pa loke ta atraco brutal lo tin castigo di 7 aña y atraco cu consecuencia di morto 10 aña.

Bao di delitonan sexual ta mira abuso sexual di adulto, hoben, muchanan y esnan cu algun incapacidad fisico of mental. Pa e tipo di delitonan aki ta pidi un castigo minimo di 7 aña.

Parlamentarionan di POR ta considera ademas cu e cambio di ley aki ta cuadra cu maneho di Minister di Husticia actual, kende ta enfoca den reduccion di e ‘High Impact Crimes’, bao di cual e crimennan inclui den e iniciativa di ley presenta ta cay aden. “Nos ta spera cu e cambio di ley aki por wordo trata rapidamente den sala di Parlamento ya cu e ta un herment hopi fuerte pa combati e tipo di crimennan grave aki den nos comunidad. Desde awor caba ta haci un peticion na tur otro parlamentario pa sostene e iniciativa di ley aki cu ta na bienestar di pueblo en general”, Howell y Lopez-Tromp a enfatiza.

 

- Advertisement -

DUNA COMENTARIO

Please enter your comment!
Please enter your name here