Minister ta pidi habitantenan pa ta vigilante:
ORANJESTAD (AAN) – E fin di siman tras di lomba atrobe por a mira candela basta grandi, cu a lanta den dump na Parkietenbos, y den conferencia di prensa di gobierno, Dialuna mainta, Minister Otmar Oduber a expresa cu esaki a bira un custumber e ultimo tres pa cuater siman.
El a subraya cu tur siman tin dos of tres candela cu ta wordo crea na e dump y e pregunta ta ainda si esaki ta intencional, of a base di e composicion cu tin den nos desperdicionan y cu ta bira sumamente peligroso.
E mandatario a expresa cu e peticion awe na comunidad ta pa keda alerta y duna tips unda ta necesario, ora tin personanan cu ta bay den dump y cu kizas tin documentonan personal cu nan kier kima, y ta djis tira nan a dump y ta cende un candela chikito, pero ta lubida cu e door di e calor cu tin eynan, e candela chikito ey cu e composicion cu tin na dump, un tiki gas por bula y cende candela rapidamente.
E dignatario a señala cu esey tin di haber cu gasnan cu ta sali for di e lugar aki cu ta sumamente peligroso.
E mandatario no ta kere cu tur biaha ta candela cendi intencionalmente, pero ta hende ta bay un tiki scondi ora e security ward no tey y ta core cende un candala pa kima podise un papel personal of di negoshi, lubidando ki efecto cu algun ora despues ta bira grandi y hopi peligroso.
E dignatario a gradici e personal di Serlimar y esnan di dump di Parkietenbos particularmente, pasobra no tur hende ta realiza e peligro den cual nan ta traha. Minister Oduber a bay aya personalmente y wak diferente video di e candelanan cu ta wordo lanta den oranan di anochi, unda no tin ni un luz y e personal cu ekipo pisa tin cu traha bao luz di luna, riba ceronan halto peligroso, riesgando nan bida ora tin e tipo di candelanan aki na Parkietenbos.
Un biaha mas el a trece dilanti e mensahe di personal di Serlimar y di su mes persona, pa e habitantenan di e lugar y comunidad ta un tiki mas alerta.
