Home Parlamento “Atrobe hues den su sentencia a bolbe suta Benny Sevinger cu palo”

“Atrobe hues den su sentencia a bolbe suta Benny Sevinger cu palo”

18
0
SHARE
- Advertisement -

Parlamentario Alan Howell

ORANJESTAD   (AAN):  Parlamentario a tuma nota di e sentencia di hues diaranson den e caso di otro tereno cu ex minister Sevinger a bolbe duna sin tene cuenta cu e Ruimtelijk Ontwikkelingsplan (ROP) y leynan vigente. E ROP ta e ordenansa teritorial, e ta dividi nos isla den areanan destina pa diferente finnan, manera  vivienda, comercial y di conservacion di nos naturalesa.

E biaha aki atrobe hues den su sentencia a bolbe suta Benny Sevinger cu palo. Pesey mes e parlamentario di POR ta urgi Gobierno, mescos cu su colega di Fraccion, pa bin mas pronto posibel cu e investigacion contra e ex mandatario. “No por ta asina cu un mandatario, cualkiera cu e por ta, ta maluza su poder pa beneficia su mes of otro. Mester tin castigo di prison pa e tipo di personanan aki. Ley pa un, ley pa tur. Si un ambtenaar comete algo asina e ta bay cera y ta perde su trabou, esaki mester conta pa e ministernan tambe”, Alan Howell ta duna di conoce.

Adicionalmente e ta bisa cu ta hopi tristo pa wak con un persona cu a haya e sosten di pueblo pa ta su representante, den e caso aki como minister di Infrastructura, ta bay over na yuda destrui  loke ta di nos. Sevinger no na un, pero na varios ocasion a otroga terenonan cu segun e ROP lo mester a wordo conserva como ‘groengebied’ y awe lamentablemente e flora y fauna di Aruba a wordo perhudica na varios lugar rond di nos isla. Tur esaki pa yuda su amigonan y investigacion mester mustra ten a unda e mes a wordo beneficia, ya cu tin hopi comentario riba e placanan cu tabata wordo paga pa cosnan cu no mester paga pa nan, incluyendo terenonan.

Ta bon mes a bin cu un cambio di Gobierno, cu awo nos tin un Gobierno y un Minister di Infrastructura cu si tin e ser humano y nos isla central, y a pone un paro na tur e destruccion di nos flora y fauna y partimento di tereno pa loco cu a tuma lugar bou di Sevinger.

Cu e sentencia di diaranson, hues a reafirma cu e maneho di actual Minister Otmar Oduber ta esun corecto, un maneho cu ta proteha nos naturalesa, ta sigui e leynan vigente y no ta un maneho di ‘vriendjes politiek’, di patronahe politico y uno cu ta bay totalmente contra un bon gobernacion manera a pasa durante gobernacion anterior.

E sentencia aki ta duna mas forsa na e mocion aproba den Parlamento pa bin cu e investigacion contra e mal maneho di Benny Sevinger mas pronto posibel y asina duna pueblo e claridad riba con a wheel and deal cu terenonan sea pa beneficio personal of di otro, Alan Howell ta expresa enfaticamente y ta finalisa bisando cu esaki ta algo cu mester ta un wake up call pa tur mandatario. “Nos no lo acepta cu ta haci negoshi cu terenonan cu ta pertenece na pueblo. Nos hendenan no merece esaki  pueblo por ta siguir cu ami y Fraccion di POR lo vigila pa esnan cu a haci nan mes culpabel di e tipo di actonan aki haya e castigo mereci”.

- Advertisement -

DUNA COMENTARIO

Please enter your comment!
Please enter your name here