Home Gobierno Autoridadnan venezolano no ta mustra e diligencia pa yega na solucion

Autoridadnan venezolano no ta mustra e diligencia pa yega na solucion

179
0
SHARE
- Advertisement -

Situacion frontera maritimo cu Venezuela ta na status quo:

ORANJESTAD (AAN) — Riba e tema di apertura di frontera maritimo entre Venezuela y Aruba, gobierno ta hayando hopi critica y esey Prome Minister mr. Evelyn Wever-Croes mes a indica den conferencia di prensa, dialuna ultimo.

El a reitera, pa contesta un pregunta di prensa, cu na e momentonan aki nada a cambia compara cu Januari, tempo cu Venezuela unilateralmente a dicidi di cera e frontera.

Venezuela ademas, a acusa Aruba di un cantidad di acto manera e tema di cooper, pa cual gobierno a traha un decreto, entre otro acusacionnan.

Na dado momento Minister Stef Blok di Hulanda a firma un documento cu Venezuela, sinembargo no a yega na e palabracionnan cu ya nos gobierno tabata buscando for di Januari caba.

E dignatario a recorda un bez mas cu na Januari 12 gobierno tabata tin un reunion cu ehecutivonan Venezolano, di Curacao y di Hulanda, na Caracas.

Aki nan a papia riba e tema y a bisa cu nan ta bay solucione. Pero pa esey Aruba a pone un condicion cu productonan procedente di Venezuela mester tin un certificado di origen, cual te awe Aruba no a haya.

Tambe Venezuela a bisa cu nan ta habri e frontera pero a pidi cooperacion di Aruba pa por fabor no importa material estrategico.

Esaki ta e material cu Venezuela ta bisa cu esey nan mester pa su pueblo y cu e no por sali for di e pais pero kico e ta, nos gobierno no sa ainda.

Curacao a haya su mes forza pa habri e mercado chikito pa su botonan pa motibonan di politica interno. Curacao, di facto, a desvia di e palabracionnan haci entre e partinan y Aruba tin hopi problema diariamente cu esaki.

Aruba a pidi pa acelera e proceso, wak kico ta e documentacionnan cu nos tin cu bay exigi. No ta cuestion cu nos gobierno ta haci simplemente pa ta fastioso, e dignatario a subraya. El a acentua cu e situacion manera e tabata na Barcadera ta hopi peligroso. Tambe cu nan ta bin cu botonan cu no ta cumpli cu regulacionnan Venezolano, encuanto seguridad, cu no por transporta carga pisa pero nan ta subi lama cune.

E mandatario a indica cu si algo bay malo anto Aruba ta esun cu ta stimula e importacion eynan.

Gobierno kier yega na palabracion cu autoridad Venezolano, riba tres aspecto:

Cual ta e tipo di botonan cu ta wordo permiti pa haci transporte den dje. E boto, of barco mester tin autoridad Venezolano pa haci esaki.

Gobierno kier tin un bon palabracion tocante kico ta e carga cu nan por trece, pasobra no ta tur cos nan por bin cune. Aruba no kier confronta e mesun situacion cu nan ta dal nos frontera cera y tene nos na rehen tambe. No mester lubida cu na Januari nos pais a pasa den hopi tension cu hende di nos pega na Venezuela.

E hendenan cu ta permiti pa bin y con nan ta bin y con nan ta bin tambe. Nan tin cu cumpli cu tur e rekisitonan di ley.

Minister Presidente a pidi nan pa acelera e proceso aki y a keda palabra cu nan ta bay intercambia di documento y na Juni nan ta bin hunto. Sinembargo, gobierno di Aruba ta ripara cu di parti di autoridad Venezolano no tin e diligencia. Den e reunion cu a tuma lugar na Curacao dos siman, nan no a bin cu e documentonan. Te awor nan ta bay manda e documentonan.

E dignatario a pidi nan pa acelera e proceso pasobra e prijs di fruta y berdura na Aruba ta sumamente halto y gobierno kier caba cu e situacion aki y bolbe na loke pa nos tabata e normalidad di busca fruta y berdura for di Venezuela, pero si bao exigencianan cu gobierno di Aruba por controla.

- Advertisement -

DUNA COMENTARIO

Please enter your comment!
Please enter your name here