Home Suceso Blackout ayera tabata debi na storing di turbina 6

Blackout ayera tabata debi na storing di turbina 6

210
0
SHARE
- Advertisement -

A tarda 6 ora mas o menos pa suministra coriente 100 porciento atrobe

ORANJESTAD (AAN)— Ayera, diabierna dia 11 di mei alrededor di 9:35 or mainta a surgi un interupcion den produccion di coriente na WEB. Esaki a conduci na un blackout cu consecuencia cu ful Aruba a keda sin coriente y tambe e presion di awa a keda afecta.

Investigacion preliminar ta mustra cu a surgi un storing di turbina 6 cu tabata controla frecuencia na WEB. En total a tarda ± 6 ora pa yega 100% di suministracion di coriente, aunke varios bario a haya coriente dentro di un ora y mey caba.

Despues di un storing ta cuminsa ehecucion di un investigacion preliminar pa haya sa unda e fayo a tuma lugar y despues ta bay over na isola y of coregi e problema. Unabes cu isola e problema e segundo paso ta pa cuminsa inicia poco poco e suministracion di coriente internamente y despues na Elmar.

E proceso despues di un blackout ta tuma su tempo y mester wordo trata cu hopi cautela pa preveni mas disturbio. Ta cuminsa cu e generador di emergencia y sigui cu e motornan Recips cu ta bay relativamente lihe. Asina cu logra esakinan den servicio ta cuminsa suministra coriente na Elmar.

Pa loke ta e boilernan y turbina e proceso ta mas complica y ta tuma mas tempo pa logra stabilisa nan operacion. Unabes den operacion stabiel di e boilernan ta cuminsa pone turbinanan den servicio pa asina por sigui suminsitra coriente na Elmar. Pa mas o menos 3:45 or atardi  Aruba completo a keda suminstra cu coriente bek.

Na momento di un interupcion di coriente of awa, comunidad ta exigi informacion al instante di kico a pasa y principalmente cuanto ta bay dura pa e situacion normalisa.

Aunke pa WEB e prioridad e momento ey ta pa reestablece e situacion di suministro, pa medio di su pagina di Facebook, WEB a mantene comunidad informa di e progreso di recuperacion di coriente. Entretanto e situacion na WEB ta stabil atrobe.

WEB ta disculpa pa e inconveniencia causa y ta gradici pueblo pa su comprension.

Alabes WEB ta gradici tecniconan di WEB y ELMAR pa e bon cooperacion durante e blackout. Pa medio di updates riba WEB su pagina di Facebook, WEB a mantene pueblo informa di e progreso y e tempo di espera pa recupera coriente.

Indicacion preliminar ta mustra cu e storing a origina den central di WEB na turbina 6 cu na e momento ey tabata controla e frecuencia.

 

- Advertisement -

DUNA COMENTARIO

Please enter your comment!
Please enter your name here