Home Deporte Bo sa pakico un cacho tin rabo

Bo sa pakico un cacho tin rabo

41
0
SHARE
- Advertisement -

ORANJESTAD (AAN) – Despues di hopi tempo, e prikichinan a cuminsa bati hala ferozmente na Hoffi Prikichi exigiendo un Seso Sport manera tempo di nan tempo!!

E conosido Lucas Croes y Chem Thiel ya tin dias sera den laboratorio ta brouw preguntanan exotico pa deleita no solamente e teamnan “high-tech” di awe’n dia, pero tambe e teamnan famoso y glorioso di antes manera Ramzak, Dombeheer, DOW, Papaya Ranch, DeCubaStars, Flor de Oriente, The Saints, Noord, y pa no lubida e Analfabestianan di e unico luga caminda abo no ta wak nan pero nan si ta wak bo, La Roca Rum Shop!

Si shonnan! E cos aki ta priminti di ta un sambombaso enorme, ora teamnan di ultimo tempo manera Powerpuff Girls, Nos tin Aden, No Problem, De Wijze Omas, y varios mas bay midi forsa cu e legendarionan di antes! E fecha inolvidable aki lo ta ariba diadomingo 3 di juni, di 12:30 te cu 5:30 di atardi na e prestigioso Centro di Bario Ayo!

Shonnan, pa reservacion y inscripcion tuma contacto cu Sr. Lucas Croes via cell 594-1699 (e ta hende moderno y sa usa Whatsapp tambe), of via email ldjcroes@hotmail.com! Niun team no mester tin miedo, ya cu e team di Hoffi Prikichi mes no lo participa si no lo ta druk den e tremendo bar y cushina bon surti!!

Shonnan… diadomingo 3 di Juni benidero, cuminsando di 12’or y mei di merdia na Centro di Bario Ayo, amantenan di bon hersengymnastiek tin un compromiso pa saca cua team ta bay cu e titulo di campeon! Bo sa pa kico un cacho tin rabo? Bo sa ki ora geel ta bira corra? Bo sa di unda e dicho di rabo di porco ta krul ta bin? No??? Wel diadomingo 3 di juni yega pa 12’or y mei na Centro di Bario Ayo! Yegaaaa!!!

 

- Advertisement -

DUNA COMENTARIO

Please enter your comment!
Please enter your name here