Home Hudicial Castigo di 20 aña di prison pa tur dos envolvi den caso...

Castigo di 20 aña di prison pa tur dos envolvi den caso di asalto fatal na Wayaca

236
0
SHARE
????????????????????????????????????
- Advertisement -

Hues no a kere nada cu e Chines a bisa

ORANJESTAD  (AAN) – Diaranzon merdia Corte den Promer Instancia a dicta sentencia den e caso penal cu Ministerio Publico a cuminsa contra e Boneiriano J.P.E. y e Chines P.F. Fiscal anterior a exigi 25 aña di prison pa cada un. Hues, despues di a studia e caso a condena ambos na 20 aña di prison.

HUES TA HAYA TUR DOS COMPLICE

Den sala di Corte tabata presente e famia di e victima Shasha mientras cu parti ariba tabata sinta famianan di e dos sospechosonan.

Hues a bisa cu e ta haya legalmente proba cu J.P.E. y P.F. ta complice di e asalto arma riba 13 September 2016, caminda J.P.E. a tira mata e dama Chines Shasha y a tira tambe e casa, kende a keda herida.

Hues a bisa cu no tin ningun motibo pa duda riba declaracion di e Boneiriano J.P.E. y cu e declaracion ta wordo carga cu pruebanan tecnico. Hues a mustra riba yamadanan telefonico cu a scucha y otro pruebanan. Hues a conclui cu nan dos a planea e asalto.

El a mustra cu nan a cumpra e arma y despues a busca e balanan. Hues ta haya prueba cu P.F. a duna J.P.E. instruccion pa haci e asalto arma y a duna J.P.E. e arma.

Hues a bisa cu for di e investigacion ta sali na cla cu J.P.E. a drenta e cas cu arma den man. Na dado momento el a dal e casa cu e cabo di pistol pasobra e casa no kier a drumi plaat riba vloer. Despues J.P.E. a tie rap nan. El a bay cu Shasha den camber y a puntra pa placa. Shasha a mustr’e riba dos tas. Na dado momento e yiu homber di Shasha a drenta cas. Ora el a mira J.P.E. cu e arma, el a core sali. J.P.E. a bay su tras. E casa a logra los y dal J.P.E. cu stoel di bar.

E momento ey, J.P.E. a tira e casa. Door cu e porta di cas tabata sera, el a tira riba e glas di porta di e cas caminda e victima Shasha tabata para. El a bay habri e porta y mira e casa y Shasha ariba suela tur na sanger. El a coy e tas y yabi di auto y bay. El a yama P.F. y bis’e cu cos a bay malo. A palabra cu e ta bay veld di Sportboy’s, caminda P.F. a bay busk’e cu su yiunan den auto y hib’e cas. Despues P.F. a bay busca J.P.E. bek. Nan a bay na un mondi na Palo Marga caminda J.P.E. a kima e pañanan cu el a usa.

NO TA TIRA ACCIDENTAL

Hues ta haya cu tabatin cooperacion estrecho di asalto arma. Na opinion di Hues, aunke P.F. no tabata presente, e ta responsabel pa e asalto. P.F. tabata sa cu J.P.E. tabatin e arma cu bala. Hues ta haya cu P.F. ta complice di e tiramento. El a rechaza defensa di abogado di J.P.E., cu e tiro tabata accidental. Hues a mustra cu ora J.P.E. a tira, el a tuma riesgo cu por a mata. El a remarca cu J.P.E. no ta un experto den tiramento.

NO TA KERE CHINES

Hues a mustra cu abogado di P.F. a bisa cu ta berdad cu el a huur auto pa J.P.E. Ta berdad cu el a busca J.P.E. y cu a bay Palo Marga pa kima paña. Pero P.F. no a haci plan di asalto arma riba su tanta. El a sinti su mes amenaza pesey e no a bisa nada na Recherche. Hues a bisa cu e no ta kere eseynan.

Hues a remarca cu ta P.F. mes a hiba J.P.E. na e cas. Ademas ora el a bay busca J.P.E. na veld di Sportboy’s y a mira cu su carson sushi. Hues ta haya cu P.F. no a duna un splicacion acceptable, pakico e no a bisa Polis nada. Hues a mustra cu J.P.E. no a menaza P.F. cu arma. Ora a bay kima e pañanan na Palo Marga, e arma a keda den auto. Pakico P.F., e momento ey no a bay hiba esaki na Polis. Hues a remarca tambe cu ora cu J.P.E. a keda deteni, ainda P.F. no kier a bisa nada. Por ultimo a scucha nan papia den e bus di detenidonan. A pone aparato pa scucha nan kico nan lo papia cu otro. Na opinion di Hues, si scucha e combersacion no por conclui ningun rato cu P.F. tabatin miedo of tabata sinti su mes amenaza.

Hues a mustra cu P.F. a bisa J.P.E., bo sa pakico nan a gara nos. Pasobra hende a mira e auto. Tambe a papia kico a bay cun’e. P.F. a hasta bisa J.P.E. cu su declaracion tin’e frega. Hues a mustra cu P.F. a conseha J.P.E. pa actua cu e ta loco pa e haya menos castigo. Tur esaki ta mustra cu P.F. tabata sa masha bon di loke a pasa.

CASTIGO

Hues ta haya legalmente proba cu e duo J.P.E. y P.F. ta complice di mata Shasha. Nan ta complice di purba mata e casa. Hues no ta haya proba cu J.P.E. a tira riba e yiu homber. Si Hues ta haya proba, cu a menaza e yiu homber cu arma.

Hues a bisa cu e caso aki a conmove comunidad. A kita bida di Shasha y causa hopi tristeza den famia. El a tene na cuenta cu ta promer biaha cu nan ta wordo condena. Hues a tene cuenta cu castigonan cu Hof ta duna pa crimennan asina entre otro e caso recien na Bonaire caminda un Polis a wordo mata.

Hues a condena J.P.E. y P.F. na 20 aña di prison, kitando e tempo cu nan ta sera den KIA. E auto lo keda confisca. Pa loke ta e demanda di daño per juicio Hues a bisa cu esaki ta no admisibel. Hues a mustra cu e famia a usa placanan di Shasha pa paga gastonan di entiero. Ainda Notario mester determina cuanto placa cada un lo haya. Hues a bisa cu e famia lo por haci un caso civil. Pa loke ta e demanda di daño inmaterial, e tata y dos yiunan a sufri a consecuencia di e caso. Hues a fiha pa e tata 10 mil florin, pa e yiu muher 7500 florin y e yiu homber 5 mil florin. Hues a declara e otro parti no admisibel y a bisa cu e famia lo por haci un caso civil pa esaki tambe. Hues a bisa cu e ta impone e medida pa paga daño per juicio riba J.P.E. y P.F. Esey ta nifica si no paga e sumanan aki, nan lo haya castigo di prison extra.

 

- Advertisement -

DUNA COMENTARIO

Please enter your comment!
Please enter your name here