Home Gobierno Dia 1 di Juni oficialmente autoridad pa control policial ta aumenta mucho...

Dia 1 di Juni oficialmente autoridad pa control policial ta aumenta mucho mas cu 100%

101
0
SHARE
- Advertisement -

Minister di Husticia mr. Andin Bikker:

ORANJESTAD (AAN)—Minister di Husticia mr. Andin Bikker, tabata encarga cu e conferencia di prensa di gobierno, diaranzon den cual el a anuncia cu KPA a haya autoridad bek pa controla, y den e contexto aki a firma un documento den presencia di Alto Comisario sr. Andrew Hoo.

Prome cu procede na firmamento e mandatario a señala cu pa prome biaha den ocho aña, gobierno a bay Parlamento pa presenta un plan conciso di mas cu 25 pagina, di un maneho completo y unda ta delinea kico tur gobierno ta pidiendo Parlamento.

Cu e maneho aki e dignatario ta bay restaura e seguridad di nos pueblo y nos bishitantenan, y trece trankilidad bek pa nos tur.

Den e maneho aki tin diferente punto cu pueblo por a ripara caba e ultimo lunanan aki, con nan ta ehecutando e plan aki, entre otro cu visibilidad di nos Cuerpo Policial riba caya y den barionan unda cu controlnan estricto ta tumando lugar y e ta dunando su frutonan, tambe pa e sentimento di seguridad den nos pueblo y nos bishitantenan cu e polisnan visible pa preveni y coregi unda cu mester hacie ora tin hende ta dicidi di falta respet di nos leynan.

Minister Bikker a expresa palabranan di pabien pa Cuerpo Policial di Aruba, cu tambe a wordo reconoci varios biaha, y cu e porcentahe pa soluciona actonan criminal un bez cu nan a tuma lugar, ta sumamente halto y ta wordo hopi respeta den Caribe.

Den cuadro di e plan di maneho cu a wordo aproba pa Parlamento, dos siman pasa, riba pagina 50 ta para cu gobierno den cuadro di e maneho stringent encuanto e personanan cu ta bin Aruba y ta keda mas di loke nan ta wordo permiti, of ta purba drenta via nos costanan, na un manera ilegal, e compromiso ta pa amplia e autoridad pa KPA.

E dignatario a splica kico ta e importancia di esaki. El a bisa cu actualmente, KPA door di un “technicality” den cambio di ley pa ocho aña bay ariba no tabata tin autoridad mas pa controla si ora nan detecta cu un persona, ora e no ta cumpli cu nos leynan di admision y expulsion, polis no tabata tin e autoridad pa controla esaki.

“Aworaki cu nos ta constata cu, entre otro, e situacion na nos pais bisiña Venezuela, ta bayendo na un extremo hopi preocupante, unda mas personanan ta bin akinan, sea como bishitante, pero nan ta extende nan permiso of nan ta surpass e permiso pa nan por permanece akinan legalmente, of via nos costanan nan ta purba drenta na un manera no admisible, e problema aki a crece di tal indole cu nos gobernacion a dicidi cu a bira tempo pa nos amplia e autoridad pa controla e personanan aki”, e dignatario a subraya.

Asina aki gobierno ta investi KPA di e poder y autoridad pa nan por haci esaki. E minister a subraya cu esaki nos ta bay conoce un aumento, no di 10% ni 100% pero centenares di porciento di esnan investi cu e autoridad aki, pa eherce control.

“Awe pues, ta un dia historico unda aki rato mi ta bay firma e documento pa bay Gobernador pa entrante 1 di Juni nos por conoce e cambio aki, unda cu debidamente e miembronan di KPA uniforme lo tin e autoridad aki bek”, Minister Bikker a reitera.

El a agrega cu pa ocho aña largo miembronan di Cuerpo Policial, y tambe e sindicato, a pidi pa autoridad aki wordo reintegra. E dignatario a felicita KPA cu e logro aki y tambe a felicita pueblo di Aruba.

 

- Advertisement -

DUNA COMENTARIO

Please enter your comment!
Please enter your name here