Home Hudicial Diferente instancia ta bay traha hunto den Veiligheidshuis

Diferente instancia ta bay traha hunto den Veiligheidshuis

93
0
SHARE
- Advertisement -

ORANJESTAD (AAN): Diahuebs mainta a tuma lugar apertura di e asina yama Veiligheidshuis na Ministerio Publico.

E no ta un cas pa atende cu por ehempel hendenan cu ta den un situacion di menaza na cas, sino e ta un lugar di trabao unda cu e partnernan di sectornan di cuido, husticia, asuntonan social y enseñanza ta traha hunto, pa na un manera unico resolve problemanan duradero cu ta wordo causa pa hendenan cu ta causa molesternan grandi den comunidad.

Durante un conferencia di prensa Minister di Husticia Andin Bikker a bisa cu e gabinete aki tin e ser humano central y proyecto aki ta parti di dje y parti di e promesa pa trece bek seguridad den nos comunidad.

“Aruba conoce diferente organizacion cu cada un for di su mesun experticio y enfoke ta tene su mes ocupa cu cuido y castigo”

“E organizacionnan aki ta traha sea for di un angulo legal, sea for di un angulo di cuido (psiquiatria, proteccion di mucha, ‘slachtofferhulp’, schuldhulpverlening, leerplicht etc.)”.

Esaki segun Bikker, kende a sigui bisa cu e casonan cu lo wordo trata den e Veiligheidshuis,  ta casonan di personanan/famianan cu tin mas cu un problema na mes momento.

Pa yuda un persona/famia asina, despues di por ehempel un castigo, pa e no bolbe comete e mesun errornan, mester wordo traha riba diferente aspecto na mesun momento.

E diferente angulonan cu ta wordo uza no mester stroba otro.

den un Veiligheidshuis tur organisacion ta bin hunto den sinergia, cierto faminan asina ta wordo discuti entre e diferente partnersnan den e cadena hudicial y cuido, pa sina conhuntamente bin cu un plan di accion, cu ta focus riba e situacion di e persona/famia en specifico.

E cuido lo wordo mas mihor posibel ahusta riba e caracteristicanan y actividadnan di e persona/famia.

E meta di Cas di Seguridad/Veiligheidshuis Aruba ta pa desaroya e actividadnan necesario rond di famianan multi-problematico, pa asina por ahusta of atende cu comportacion cu no ta cuadra cu e normanan.

Asina por preveni un ripiticion di e tipo di comportacion aki.

“Apesar cu e Veiligheidshuis ta ubica den Ministerio Publico, e intencion ta pa atende cu e casonan di tal manera, cu e personanan no haya nan mes den problema mas cu husticia”.

“E meta final ta pa nos tin un Aruba mas sigur , riba cual nos tur por ta orguyoso”, segun Bikker.

Prome cu Gobernador oficialmente a habri e Veiligheidshuis, Procurador General Alexander van Dam a hiba palabra.

El a bisa cu for di 2 aña pasa ora cu el a cuminza como PG na Aruba, el a pone riba su lista pa bin cu e Veiligheidshuis, cu na Hulanda ta dunando su frutonan.

“Ami como esun cu tabata atende cu e Veligheidshuizen na Hulanda a wak si cerca con si bo brinda suficiente atencion y cuido na hende, bo ta wak cu bo no ta wak cierto criminalnan mas, pasobra nan a re-socializa nan mes den comunidad”.

“E responsabilidad ta keda si cerca e hendenan mes”, segun van Dam, kende a bisa cu mirando e casonan cu OM ta atende, e Veiligheidshuis su tarea no ta bay ta facil.

Esaki mirando e diferente tipo di problemanan social entre otro cu ta existi.

“Mi pensamento ta cu si bo atende suficientemente cu e problemanan social den un comunidad, ta bay tin menos criminalidad”.

 

- Advertisement -

DUNA COMENTARIO

Please enter your comment!
Please enter your name here