Home Editorial EDITORIAL: Pueblo ta fada y rabia di tur e atraconan

EDITORIAL: Pueblo ta fada y rabia di tur e atraconan

600
0
SHARE
- Advertisement -

Pueblo di Aruba no ta solamente den panico sino hopi rabia cu e cantidad di atraconan cu ta sosodiendo cu nos Arubianonan. Aruba a cambia totalmente cu e avalancha di extranheronan cu ta bin riba nos isla y ta abusa di nos humildad. Nos humildad y cordialidad cu internacionalmente nos Arubianonan ta conoci p’e. Turistanan ta gaba nos Aruba pa e servicio unico y e cordialidad cu nos Arubianonan ta conoci pa trata hende.

Lamentablemente e invasion di extranheronan ilegal, ta abusando di nos cordialidad y ta horta nos den nos mesun cas.

Ta increibel cu tin hende riba e dushi isla aki cu ta sconde ilegal pa Polis y Warda nos Costa. E hendenan aki tur ta complice di criminalidad y Ministerio Publico mester castiga nan. Ta nan ta yuda cu extranheronan ilegal ta keda riba nos isla causando asina hopi intrankilidad. E hendenan aki no por ta Arubiano pasobra un Arubiano legitimo no ta haci asina cu su mesun prohimo.

Con por ta posibel cu awendia, e mayoria di casnan ta parce manera un prison. Curanan halto, hero dilanti bentananan y portanan, camera instala, cachonan, etc. Ta increibel con nos Arubianonan tin cu biba manera den un prison. Esaki door di e extranheronan ilegal, yuda pa hendenan riba nos isla.

Antes bo ta sinta den bo cas cu portanan y bentananan hancho habri pa laga nos dushi aire pasa den cas. Awor no por haci esey mas pasobra tin temor cu extranheronan ta drenta den bo propiedad y atraca bo. Bo cas, bo lugar sagrado unda abo mester sinti bo sigur, awor no ta sigur mas.

Antes un bario tabata manera un famia. Tur hende conoce otro y ta papia cu otro y ta yuda otro. Awendia nos ta bibando isola. Hopi no sa mes kendenan nan bisiña ta. Esaki pasobra nan no ta confia hende extranhero mas. Tristo con cos a para bira na Aruba.

E mayoria di personanan cu a bira victima di atraco, a keda den un trauma. E experencia amargo ey a laga e victimanan keda cu miedo. No solamente e victimanan sino henter e comunidad Arubiano tin miedo. Hendenan anochi tin miedo di sali. Hendenan ora nan yega nan cas, ta check bon rond y ta core drenta cas pasobra nan no sa si nan ta wordo vigila pa atracadornan.

E situacion aki a bira inacceptabel. TA BASTA CU ATRACO riba nos dushi Aruba. Na nos isla bisiña Curacao, Parlamento a introduci e ley caminda bo por defende bo mes den bo mesun cas. Esaki ta pa pone un fin na e situacion caotico cu tin na Curacao.

Na Aruba e Gobierno actual, mester cuminsa tuma medidanan pa garantiza trankilidad, paz y harmonia den pueblo. Mester equipa Polis cu tur e materialnan necesario pa por ataca y combati tur e atracadornan. E Gobierno mayoritario, cu ta goza di sosten di e pueblo pasobra el a bin ta demostra cu e ta trahando pa e pueblo, mester manda un señal bon cla cu NO TA TOLERA ATRACO MAS na Aruba.

Nos sistema hudicial ta impone castigo pisa pa atracadornan, pero loke hopi hende no sa, ta nos ta paga pa e atracadornan por haya nan cuminda y cuido den KIA. Ta calcula 250 florin pa dia pa cada un preso den KIA. Esaki ta inhusto.

Nos no por sigui tolera e abuso aki. Nos Arubianonan tin e derecho y merece di por ta biba trankil sin panico. Pueblo mester coopera cu Polis, informa di autonan, hendenan sospechoso cu ta cana banda di bo cas. Pueblo ta exigi di Polis pa e actua tambe ora hende yama. Tin hopi critica cu a yama Polis pero nada. Awel por cuminsa usa e patruyanan motoriza tambe.

Pakico tin Polis di bario? E agente di Polis mester cuminsa anda den e bario y busca voluntarionan cu ta dispuesto pa yuda. Hopi biaha esnan den bario no conoce mes e Polis di bario. Pa colmo, anochi ora cosnan sospechoso ta sosode, e Polis di bario no tey. Mester cambia e sistema aki. Si realmente kier ta efectivo, e Polis di bario mester ta localisabel 24 ora pa dia. No ta por nada nan ta bisa cu un Polis ta 24 ora pa dia un Polis.

Nos tur mester duna nos contribucion pa asina caba cu e abuso cu ta pasando riba nos dushi Aruba cu e extranheronan ilegal. Gobierno mester percura pa e agentenan di Polis ta mas mihor equipa y Polis mester percura pa atende yamadanan y actua. Esaki ta e formula pa nos recobra nos dushi Aruba. Union ta forza. Ban traha pa nos tur por biba dushi riba nos dushi Aruba. Y e Gobierno aki ta traha pa Aruba y pa Arubianonan.

- Advertisement -

DUNA COMENTARIO

Please enter your comment!
Please enter your name here