Home General “El Diablito” ta tuma over e lobby di Aruba Marriott Resort &...

“El Diablito” ta tuma over e lobby di Aruba Marriott Resort & Stellaris Casino e weekend aki

56
0
SHARE
- Advertisement -

Un experiencia culinario cu bo no por perde!

ORANJESTAD   (AAN):  Diabierna y Diasabra benidero, Aruba Marriott Resort & Stellaris Casino ta bay tin un biaha mas un evento di kita sombre. Ta trata di un otro muestra gastronomico cu lo wordo teni den lobby.

E biaha aki a invita e chef mexicano renombra Emilio Macías “El Diablito”.  Den entrevista cu DIARIO Macías a splica di su proyecto:  e restaurant  “El Diablito” ubica na Lima, Peru. “Ta un restaurant di hopi sabor y recuerdonan mexicano cu productonan peruano. Loke nos ta haci ta integra mi origen (mexicano), tur  mi experiencia, tur e sabornan cu mi ta corda di mi pais y mi ta expresa nan pa medio di e ingredientenan peruano”.

Loke ta bay tuma lugar na Aruba, den lobby di Aruba Marriott Resort & Stellaris Casino, ta un integracion di e gastronomia y cultura mexicano cu e ingredientenan peruano manera maishi, batata quinoa, promenton (diferente tipo), a bisa.

“Ora cu e “El Diablito” ta viaha ta busca un integracion cu e miho ingredientenan di e pais cu nos ta bishita”, Emilio Macías a duna di conoce.

Diabierna y Diasabra lo tin 11 elaboracion riba e “menu a la carte” combina cu bebidanan manera mezcal, tequila, sal de gusano, etc.

Mexico ta un pais famoso pa su “tacos” y lo tin taco di lobster, crab di cuero moli y di custia, chicharrones, elotitos, flautas de tinga, red snapper cu tomatinan di Aruba, entre otro.

E “pescado a la veracruzana”, a indica, lo wordo traha cu tomatinan di un cunucu arubiano. Di e mesun manera lo tin e integracion di diferente ingrediente di e otro paisnan.

TRAYECTORIA

Emilio Macías a laga sa cu su restaurant “El Diablito” ta un proyecto nobo cu ta e resultado di su añanan como chef y su experiencia rond mundo.

El a haci su estudionan na (CIA) Culinary Institute of America na New York. El a dedica su mes na siña cu e mihornan y a bay Europa pa traha cu restaurantnan cu strea Michelin na paisnan manera Spaña,  Inglatera,  Italia, y  Japon. Su deseo tabata pa regresa su pais bek y transmiti tur loke el a siña.

“E pais cu a duna mi e oportunidad aki tabata Peru”, unda ya caba tin 10 aña bibando y awor feliz di ta desaroyando su proyecto “El Diablito” exitosamente, a expresa.

Emilio a invita e publico arubiano pa pasa diabierna y diasabra na Aruba Marriott Resort & Stellaris Casino pa asina disfruta di sabornan “pret”, autentico den un super bon ambiente.

EVENTO

Finalmente, Stacey Banfield , Marketing & Communications Manager di e hotel a laga sa cu e “El Diablito” ta tumando lugar diabierna awor 25 y Diasabra 26 di Mei di 7 pm – 10 pm den lobby. Lo tin solamente 70 cupo disponible pa cada anochi. Pesey ta importante pa haci reservacion di antemano.

Aruba Marriott Resort & Stellaris Casino e aña aki a pone enfasis riba eventonan culinario manera e “chef series” unda ta invita chefnan renombra. Lo tin mas eventonan manera esaki durante 2018, pa asina e publico local por pasa y experiencia algo unico, Banfield a bisa.

 

- Advertisement -

DUNA COMENTARIO

Please enter your comment!
Please enter your name here