Home Hudicial Fiscal a pidi laga sospechoso liber y pa bay detene e culpable

Fiscal a pidi laga sospechoso liber y pa bay detene e culpable

43
0
SHARE
????????????????????????????????????
- Advertisement -

Victima a bisa den Corte cu no ta e sospechoso a hink’e

ORANJESTAD (AAN): Tanto Hues como abogado mr. Illes a haya straño cu tin e mucha W. (16) deteni como sospechoso di a hinca, siendo cu e victima mes y otro personanan ta papia di un rasta.

Den Corte a resulta cu W. lo a tapa pa e rasta pero awor cu e grupo no a cumpli cu nan promesa, W. a bisa Hues cu e no a hinca e homber M.P. E victima M.P. a presenta den Corte y a bisa Hues bon cla cu W. no a hink’e y cu esun cu a hink’e ta un rasta y hasta a menciona su nomber.

E mucha homber W.(16) ta wordo acusa di intento di mata e homber M.P. Esaki a sosode riba 10 Februari 2018 banda di Macro Supermarket na San Nicolas. Mama di e sospechoso tabata presente. E victima tambe. Fiscal a bisa Hues cu e acusado tin 16 aña y cu e caso mester wordo trata cu portanan cera. Hues a bisa cu e ta bay check esaki un rato den Codigo Penal. Hues a bolbe y bisa cu e ley ta aplicabel pa muchanan bao di 16 aña. Esey a haci cu DIARIO por a keda cubri e caso

Intento mata
W. a bisa cu tabatin pelea den carnaval y el a bay yuda amigonan. Sin e sa un persona a wordo hinca. El a bisa Hues cu e no tabatin cuchiu y no a hinca ningun hende. Hues a puntra pakico el a bisa na Polis cu el a hinca. Segun W. esnan cu tabata tey durante e pelea a bisa cu ta W. y pesey el a tuma e culpa. Hues a remarca cu e mes ta haya hopi straño cu W. ta bisa cu t’e.

El a lesa un parti di declaracion di e victima, e homber M.P., kende a bisa cu e tabata para den cura cu algun personanan. El a mira un pelea y diripiente e homber cu e grupo tabata bati, a core bay na e cura di cas y pidi ayudo. Esnan cu tabata bringa cun’e a sigui su tras. Un homber gordo rasta a keda wak y tur a bay. Pero despues di algun minuut e grupo a bolbe bin. E ora ey M.P. tabata para pafor di cura y e rasta a cuminsa dal’e y e otronan tambe. E rasta a saca un cuchiu grandi y hink’e na su bariga y e resto di grupo a sigui bati’e. Polis a presenta y ambulance caminda a transporta M.P. pa hospital. Danki Dios e hinca no afecta su organonan vital. Hende papia cu tripa di e victima tabata sali.

Fiscal a propone pa scucha M.P. y e homber C. cu tabata den sala como testigo. A pidi nan pa sali un rato pa despues nan wordo scucha.

Tuma culpa pa otro
Hues a sigui lesa relato Polis. Hues a bisa cu un persona cu a mira kico a sosode y a bisa cu e motibo cu a hinca M.P. ta pasobra cu M.P. lo a dal un persona cu un machete. E tambe ta papia di un rastaman. E homber C. ta papia di un homber gordo rastaman. Segun C., M.P. a pusha e homber pa e bay. C. a bay bisa e rastaman pa bay y nan no kier problema.

Despues e homber a bolbe cu 6 guy y ataca M.P. Algun otro persona a bay yuda pa stop nan di bati’e. Nan a mira M.P. for di tino y a resulta cu el a wordo hinca. C. no a mira ken a hink’e. A base di declaracion di hendenan a detene e rastaman J.K. El a admiti di a bringa pero no a hinca. Segun K. e amigonan a bisa cu ta W.

Hues a remarca cu segun e descripcion W. no ta un rasta y no ta gordo. Hues a puntra W. pakico el a tuma e culpa. Segun W. el a papia cu K. y el a pidi W. pa tuma e culpa pasobra e tin yiu.

Fiscal a remarca cu e por compronde W. su declaracion pero pakico awor e no kier tuma e culpa mas. Segun W. nan a priminti cu nan lo percura p’e y su famia. Den KIA nan no a manda paña y placa p’e. Tampoco nan no a bishit’e den KIA. Fiscal a puntra si W. ainda ta forma parti di e DK Blog o sea gang. El a bisa cu si pero e otronan no ta den gang.

Scucha victima
M.P. a wordo scucha como testigo. El a bisa Hues cu el a bay na su amigo C. su cas pa den un grupo pa mira parada di carnaval. Nan tabata den cura. El a splica cu un guy rastaman cu un grupo a bay riba dje ora el a bay para pafor di cura. El a bisa Hues cu ningun momento tabata W. sino e rastaman cu a hink’e. M.P. a bisa Hues cu e rastaman ta J. Hues a puntr’e con e sa e nomber. El a splica cu e amigonan di J. a bis’e despues di loke a sosode.

Sospechoso laga liber
Fiscal a pidi Hues pa pospone e caso pa laga Polis haci investigacion pa detene e persona cu M.P. a menciona. El a pidi pa laga W. liber.
Hues a bisa cu e ta bay di acuerdo pa laga W. liber. El a bisa W. pa semper bisa e berdad y nunca tuma culpa pa otro hende. E mama na yoramento a bisa su yiu cu e ta spera cu esaki ta un les.

- Advertisement -

DUNA COMENTARIO

Please enter your comment!
Please enter your name here