Home Gobierno Gobierno a gana caso y Huez ta haya cu ex-minister Sevinger a...

Gobierno a gana caso y Huez ta haya cu ex-minister Sevinger a actua completamente contra ley

617
0
SHARE
????????????????????????????????????
- Advertisement -

Relaciona cu otorgamento di tereno:

ORANJESTAD (AAN) – Minister di Infrastructura y Imigracion Otmar Oduber, a yama un conferencia di prensa Diaranzon mainta, cu caracter di urgencia. Esaki relaciona cu veredicto como resultado di un Caso den Corte, tocante e maneho cu tabata wordo hiba den e Departamento di Infrastructura y Planificacion (DIP), door di e gobierno anterior.

E dignatario a referi na diferente acuerdo cu gobierno anterior y su Minister di Infrastructura a firma cu a wordo invalida pa e actual gobierno, cu e meta di crea un balansa den e desaroyo economico di nos pais, anto semper teniendo cuenta cu proteccion di nos medio ambiente na prome lugar, unda cu e atencion cu ta wordo poni riba e aspecto aki a wordo sinti caba den nos comunidad, lo cual a haci cu esaki ta otro Caso cu Land Aruba a gana den Corte.

E mandatario a splica cu esaki ta e Caso di Island Estates y e tereno dilanti Divi Phoenix, cerca di Bubali Plaas, unda cu gobierno anterior den e racha di negoshi di tereno cu a sosode e tempo ey, a tuma un cantidad di decisionnan otorgando propiedad di pueblo na un forma hopi iresponsable, unda por interpreta locual Huez a bisa, cu na un manera ilicito a otorga e terenonan aki.

E mandatario a indica cu esaki ta un tereno cu 30 porciento di dje tabata un teritorio (groengebied)  proteha pa ROP.

E dignatario a reitera cu e Minister anterior a tuma varios decision cu no tabata respeta LRO cu ta conduci specificamente na e maneho cu tin ancra den ROP, siendo cu e gobierno actual for di su salida na November 2017 a mustra, den su programa di gobernacion, cu esey ta e punto di salida pa loke ta trata e desaroyo di proteccion di nos medio ambiente pero tambe pa loke ta concerni otorgacion di tereno.

Na un manera peculiar y hopi ilustrativo, Huez a trece dilanti cu e minister anterior un biaha mas, y banda di otro decisionnan (manera e Kiosconan) y otro casonan cu tabata den Corte relaciona cu e maneho di beachnan (beach policy), a actua na un manera sumamente iresponsable, contra regla, contra ley, contra bon maneho, contra loke un gobierno drechi mester a tuma como decision.

E dignatario a señala cu esaki no ta palabranan di su persona, pero Huez den su veredicto a delinea e aspecto aki.

Minister Otmar Oduber a reitera tambe cu e ex minister, unilateralmente, mesora cu e recibi un carta ta firme y hendenan ta cana rond cu firma di minister den delaster documento, y el a, simplemente, tuma henter nos pueblo haci cu e firmanan aki cu e tabata duna tur hende unda cu a topa nan, creando den e comunidad speranza falso.

Ademas Huez a mustra cu e ex-minister no a busca e consehonan necesario, no a bay na e departamentonan concerni, y cu e rapportnan cu a wordo entrega nunca a wordo analiza, y e minister mes tabata tuma decision hunto cu su consehero cu alavez tabata esun cu a traha e overeenkomsten, esun cu tabata pasa Akte den Notario.

Pues, un solo persona cu tabata cana cu un USB den su man, bay di Ministerio pa DIP, pa otorga tereno segun e peticion y deseo di e minister. Y ademas, na un forma iresponsable tabata traha e condicionnan y e contenido di e acuerdonan y manera cu Huez a bisa por a mira cu tin un opcion di un peticion sin cu tabata tin un linea corecto di maneho tabata extende esaki, of tabata cambia nan cu na cierto momento e opcion cu a wordo pidi ta totalmente diferente cu e acuerdo cu a wordo otorga na final, y hopi biaha hasta ora di a bay notario por a mira cu e Actanan no ta cuadra ni cu e opcion ni cu e acuerdo.

Minister Oduber a subraya cu asina aki, Huez na un forma hopi categorico refiriendo cu banda di e persona aki, cu a haci un daño hopi grandi na DIP hunto cu e Minister, pa loke ta trata otorgamento di tereno, tabata tin ambtenaarnan cu tabata ilustra e minister cu palabranan manera a wordo poni den e veredicto di Huez, alertando cu e tereno tabata proteha, pero e minister a ignore segun palabranan di Huez.

E Huez a bisa den su veredicto cu e ex minister a uza clientelismo y patronahe politico locual mester wordo frena y evita.

E dignatario a subraya cu na cierto momento gobierno lo pone e gobierno anterior y Minister Sevinger responsable en caso cu Pais Aruba lo mester haya su mes cu claims, pasobra mas Caso den Corte lo por bin pa nos pais.

 

 

 

 

 

 

- Advertisement -

DUNA COMENTARIO

Please enter your comment!
Please enter your name here