Home General Gobierno a lubida locual nan a priminti e pensionadonan

Gobierno a lubida locual nan a priminti e pensionadonan

51
0
SHARE
- Advertisement -

Ivo Valdez  Presidente di OPPA:

ORANJESTAD (AAN) — Ta conoci cu entrante 1 di Juli 2018 e prima di AZV ta bay baha di 10.5% pa 6.5%, riba pension di behez.

Pa e pensionadonan cu ta traha ainda y ta yega na entrada di 30 mil florin anual, of 2.500 pa luna, tambe e bahada aki di AZV ta conta.  Pero pa un entrada mas halto no.

Kiermen, tur pensionado di OPPA (Organizacion Pensionadonan Publico Aruba) cu tin un pension di AOW y di APA no bin na remarca, y presidente di e Organizacion di Pensionado, sr. Ivo Valdez, ta elabora al respecto.

Ivo Valdez ta splica cu e crisis actual ta trece aumento di e costo di bida pa nos tur, mientras cu ni un di e pensionadonan aki desde di dia 1 di Januari 2013 no a conoce ni un tipo di aumento mas riba nan pension. Es decir, cu tur e pensionadonan di PVL cu tabata haya un “diensttoeslag”, cu ta un subsidio pa aumento di costo di bida, esey a wordo kita desde di 31 di December di 2010, cu e introduccion di NTR 2011. For di e tempo ey no tin aumento mas riba nan entrada.

Esnan cu a drenta den NTR 2011, cu despues a bira ATR 2014 ta depende simplemente riba di con e grado di cobertura ta. Pa nan haya un aumento ta depende si e poder di cobertura (dekkingskracht) ta firme, kiermen riba 105 %. Sr. Ivo Valdes a sigui bisa cu, for di 1 di Januari nan a bay atras den nan entrada pagando e prima di 10.5% na AZV y eynan, esaki lo keda paga.

Pensionadonan no ta bay dilanti siendo cu durante campaña otro cos a wordo priminti na nan. Pero awo no ta papia di e beneficio na tur e pensionadonan sino cu a resulta cu ta un grupito chikito so ta esun cu ta bay haya e subsidio pa compensa e crisis y no a mira cu a bay dilanti ni un caminda.

Politiconan mester practica loke nan a predica unda nan ta priminti cielo y tera prome y despues cu ta drenta den gobierno no ta cumpli. Pero mientras tanto, e dianan ta keda core y prome di Juli ta biniendo tambe.

Riba esaki OPPA a dirigi su di tres carta dia 7 di Mei, cu tabata e ultimo cu a manda na Minister pa nan por sinta cune, pa logra yega na un areglo cu ahustacion pa e pensionadonan. Pero nan no a haya ningun contesta.

Den e programa di gobernacion ta para cu hende ta central, anto riba esaki ta parce cu pensionado no ta hende siendo cu un Minister cu nan a acerca no a contesta nan carta ni a sinta cu OPPA.

Mientras tanto ta sigui purba pero otro siman e plazo cu nan a duna di tres siman ta caduca. Dialuna awor lo cuminza cana e caminda legal pa wak si toch por yega na e ahustacion pa esnan cu tin derecho riba dje. E motibo ta cu pasobra no ta tur e pensionadonan tin derecho riba esaki.

Tur e pensionadonan cu a bay cu pension despues di 1 Januari 2013 no ta haya e derecho riba e 85 florin di ahustacion, anto mester wak kico ta bay pasa y con ta atende cu e asunto aki. OPPA ta spera di por sinta cu e Minister siendo cu for di Januari 2018 cu nan a manda e cartanan cu e solicitudnan di OPPA, no a haya ni un contesta riba e asuntonan di hospital, esun di 85 fls, entre otro preocupacionnan cu e pensionadonan tin, segun Sr. Ivo Valdes, di OPPA.

Sr. Valdes a sigui bisa cu politiconan ta lubida di cumpli e promesanan haci den campaña y mester compronde cu pueblo ta esun pagado di belasting. Tanto parlamentario como Ministernan tey pa duna servicio.

Pensionadonan no ta pidi un fabor sino cu nan ta exigi pa delivera cu e problemanan cu tin, caminda cu por ehempel den caso di hospital awor kier hinca hende homber cu muhe den e mesun camber, y nan no po opina riba esey y no por siendo cu na Aruba tin cu respeta e estado derecho .

E caminda legal cu ta bay cana ta pa chek si e miembronan di OPPA tin e derecho pa haya e 85 florin di ahustacion pasobra no por ta asina cu for di 2011 a duna 104 florin na e pensionadonan mesun cos cu tur e trahadonan publico, y e aña siguiente a haya tambe 140 florin anto diripiente na 2013 pensionado no a haye mas anto kier sa si a cera un acuerdo bilateral unda cu OPPA no a forma parti di e discucion aki den e tempo ey y ta keda lucha pa e miembronan pero pa esaki mester sinta cu Minister anto ni esey por a logra.

Gobierno anterior a priminti cu nan ta bay paga 85 florin anto despues pa bon of pa malo gobierno a cambia y mester t’ey pa pueblo. Mester sinta na mesa pa wordo scucha pa wak unda por yega na otro y ta keda spera un contesta riba esaki unda cu OPPA tin un comision trahando den forma activo riba esaki.

 

- Advertisement -

DUNA COMENTARIO

Please enter your comment!
Please enter your name here