Home Hudicial Hues a rechasa peticion di APA pa para referendum

Hues a rechasa peticion di APA pa para referendum

68
0
SHARE
- Advertisement -

Mediador di Gobierno:

ORANJESTAD(AAN): — Tabata tin un caso cu APA lo a entama cu oficina di mediador. Tin un decision final di hues.

Mediador di gobierno, Anselmo Pontilius, a splica cu APA NV no tabata di acuerdo cu a convoca un referendum pa un departamento, cual ta e departamento nautico, despues cu tabata tin un referendum pidi pa sindicato TOPA pa e totalidad di e trahadornan di APA NV.

Den e referendum prome ey, si por yam’e esun prome, TOPA no a haya e mayoria rekeri pa ley cua ta 50 persona. Despues di algun siman, TOPA a pidi un referendum pa un departamento di e trahadonan cu a acerca TOPA y a bira miembro di e sindicato, cual ta e departamento nautico.

Tin mas of menos un 30 trahado, cu ta traha den e departamento ey. Eyden, e sindicato a proba cu e tin mayoria riba papel y a mustra e compania cu di acuerdo cu ley, ta posibel pa tene un referendum, yam’e pa categoria di trahado y esey a convoca despues cu a reuni cu e compania y e sindicato, na prome instante, purbando si nan por a yega na reconoce otro, sin cu esaki tabata necesario.

Di parti di APA nan a informa cu si convoca e referendum, nan lo procede legalmente. Na momento cu a convoca e referendum, nan a haci’e tambe.

Dia 26 di April den corte, hues a trata e caso aki y hues a rechasa e peticion di APA pa para e referendum. E referendum a tuma luga y e referendum cu a tuma luga na oficina di mediador di gobierno, TOPA, pa e departamento nautico, tabata tin 24 trahado cu por a haci uzo di derecho di voto, 16 a vota y tur a vota pa TOPA. APA lo tin cu atende cu dos sindicato den su empresa.

Otronan tambe a haci un intento

Segun Pontilius, por corda dos aña pasa, 2015/2016, a haya sentencia na La Cabana, den cual e sindicato STA a pidi referendum pa dos departamento, esta Housekeeping y Maintenance. Y den caso di RIU, a haya tambe cu FTA a pidi referendum pa tres departamento, den cual e compania tambe a procede den corte.

Hues a mustra cu e mediador tin rason di por a convoca e referendum di e forma ey, pasobra ley ta permiti’e. Tin comprension pa e dunador di trabao cu ta haya cu e no ta e forma mas eficiente. Nan tin temor cu nan tin cu atende cu mas cu un sindicato den e empresa.

Pero por bisa cu den practica den e ultimo 30 añanan, cu no ta e caso. Aunke cu e sindicato lo pidi referendum pa un cierto parti di e empresa, na final e empresa cu e sindicato ta bay atende cu otro, sin cu ta haya un di dos of tercer organisacion di trahador.

Ta posibel den e caso aki, lo bay mira na APA. Na NV Elmar tin dos sindicato. Tin sindicato STA y tin sindicato Alvast, cu ta representa staff. No ta inusual cu e dunador di trabao ta bay sinta na mesa mas cu un sindicato. Logico cu e dunador di trabao ta hay’e ineficiente pasobra e tin cu dedica mas tempo.

Referendum

Pa awor aki tin dos referendum den proceso. Tin un referendum caba cu fecha dia 24 di Mei, cual ta pa e trahadornan di Seaport Casino. Ta mira cu den Seaport Casino, si mira e anuncio, ta pa dos departamento, esta pa dealer y F&B. Esey lo ta di 2’or pa 4’or, dia 24 di Mei. Tambe lo discuti cu gerencia di Excelsior Casino. FTA a pidi e referendum eynan y lo fiha fecha ki dia esaki lo tuma luga pa e casino aki den su totalidad.

Pidimento di referendum

Tin dos parti pa pidi referendum. Tin e parti den cual e trahadornan ta sinti cu nan derechonan no ta wordo respeta na pia di trabao y e otronan cu ta bisa pa regla den un manera structural, den un contrato colectivo, pasobra esey ta e punto principal cu e sindicato tin derecho pa negosha e condicionnan di trabao den un contrato colectivo.

Un contrato colectivo ta wordo regla pa ley. Si condicionnan ta wordo negosha debidamente y wordo structura, hinca den un contrato colectivo. Tur dos componente tey. Por a mira ultimo tempo, debi na intrankilidad y diferencianan di opinion cu gerencia, e trahadornan ta scoge pa haya un representacion sindical.

Trankilidad

Segun mediador, si mira e ultimo añanan, mayoria di e situacionnan cu a surgi, partidonan a bay mesa, prome cu a bay den accion.

Esey ta hopi positivo. Tin trankilidad laboral en general. Si nos compara Aruba cu otro islanan den Caribe y den nos region, mester bisa cu toch dunadornan di trabao, cu sindicatonan ta haya otro, apesar di diferencianan cu tin.

Esey ta irespecto e discusion na momento di reconocemento. Pero si cuantifica accionnan cu a conoce na Aruba e ultimo añanan, por bisa cu e tabata relativamente abao, pa motibo cu con cu bay bin, tin cierto grado di dialogo entre sindicato y dunadornan di trabao, segun Pontilius.

 

- Advertisement -

DUNA COMENTARIO

Please enter your comment!
Please enter your name here