Home Gobierno Huistartsenpost (HAP) ta muda pa “Medical Building Office” na hospital nobo

Huistartsenpost (HAP) ta muda pa “Medical Building Office” na hospital nobo

12
0
SHARE
- Advertisement -

Minister di Salud ta splica e proceso nobo:

ORANJESTAD (AAN) – Minister di Salud Publico sr. Dangui Oduber, a hiba palabra con conferencia di prensa di Gobierno, Diaranzon cu a pasa, y el a splica cu den e programa di gobernacion di e coalicion MEP-POR-RED, nan a pone e hende central.

Poniendo e ser humano central nan a pone cuido medico como prioridad, y den esaki el a anuncia cu lo bin cambionan den e sistema di funcionamento di docter na warda (huistartsenpost) y Spoedeisendhulp (Servicio di emergencia di HOH).

Un punto di atencion ta reduci e tempo cu un pacient ta warda pa haya atencion y no cu e tin warda oranan largo manera ta e caso actualmente.

Manera ta e custumber, despues di oranan cu docternan di cas ta duna consult, e pacient cu mester ayudo medico ta bay na e consulta di docter na warda.

Tocante e sistema aki,  e dignatario a duna di conoce cu e practica di docter na warda ta bay muda pa e “Medical Building Office” den e hospital nobo cu ta den proceso di renovacion, ampliacion y construccion.

Esaki na nifica cu for di e momento di e cambio aki ora un persona ta sinti su mes malo, e no ta bay acudi directamente na spoedeisende-hulp (SEH) sino cu e ta bay na e edificio medico nobo, unda e docter ta bay diagnostica y si e ta un caso di urgencia e ta wordo referi na Servicio di Emergencia.

E titular di Salud a menciona cu logicamente den casonan di emergencia pero e HAP ta bay muda y e proceso a inicia diaranzon caba, pero e apertura oficial lo tuma lugar na Juli.

E dignatario a indica cu banda di esaki lo amplia e horario tambe. Actualmente e horario ta di 6’or di atardi te 10.30’or di anochi, despues cu e docter di cas no ta duna servicio mas. Esaki lo conoce un horario nobo cu ta di 6.30 or di atardi te cu 12 or di anochi.

Lo bin acerca dos docter mas cu lo yuda cu e fluho di hende cu Servicio di Emergencia ta atendiendo na e momentonan aki.

El a reitera locual director di Hospital sr. Cillie a yega di bisa, cu 90% di e casonan cu ta yega na Eerste Hulp no ta casonan di emergencia, y esey ta conduci cu e lista di spera ta bira hopi largo y tin hopi presion di comunidad encuanto esaki.

E mandatario ta spera cu, cu e anuncio aki por brinda un solucion practico mas eficiente, na e lista di spera, cu e meta final pa reduci esaki.

Minister Dangui Oduber a señala cu asina gobierno ta cumpli tambe cu nan programa di gobernacion y e ta sigur cu comunidad lo ta sinti un alivio tambe, cu introduccion di e docternan di cas nobo aki.

E mandatario a gradici sr. Cillie pa tur e cooperacion cu el a brinda durante henter e proceso aki, despues cu tabata tin discusion con pa reduci e lista di spera den e servicio di emergencia.

E titular a señala cu un investigacion a wordo haci tambe, y e conclusion tabata cu esaki lo ta e mihor solucion y alternativa pa reduci e lista di spera. Tambe el a gradici AZV pa tur e cooperacion cu nan a brinda pa haci esaki posible. Esaki ta locual e como minister ta desea, tambe gobierno y comunidad, pa mehora e cuido medico y e servicio di salud cu ta wordo brinda na nos pueblo.

Den e dianan cu ta sigui lo bin un campaña di informacion pa e ciudadanonan sa con e proceso ta ora nan ta sinti necesidad di presenta na servicio di emergencia. E ta hopi contento di a anuncia e cambionan aki na HAP y SEH.

 

 

- Advertisement -

DUNA COMENTARIO

Please enter your comment!
Please enter your name here