Home General Hunto cu COA y IBiSA Aruba Bank ta organisa e Olympic Day...

Hunto cu COA y IBiSA Aruba Bank ta organisa e Olympic Day 2018

31
0
SHARE
- Advertisement -

ORANJESTAD   (AAN): E aña aki lo tuma luga e Olympic Day 2018, cual evento ta organisa pa Instituto Biba Saludabel y Activo (IBiSA), Comite Olimpico Arubano (COA) y Aruba Bank.

E evento aki lo tuma luga riba diasabra 23 di Juni proximo riba e parkeerplaats di Aruba Bank Camacuri y tanto muchanan como adultonan lo por participa.

E dia aki lo bay tin diferente actividad, unda tur hende lo por move, siña y descubri cual ta e tres pilarnan di Olympic Day. E programa ta parti den diferente actividad, unda cu tin e 5KM Fun Walk& Run, e 1-2-3 KM loop pa muchanan di scol, demostracion di deporte di federacionnan, oportunidad pa papia cu atletanan top Arubano y tambe un kids corner.

E competencia di 1-2-3 KM lo ta parti entre muchanan muhe y homber pero tambe a base di edadnan, unda cu muchanan di 6-7 lo participa den e distancia di 1KM, 8-9 y 10-11 lo participa den 2KM mientras cu muchanan di 12-13 y 14-15 ta core 3KM.

Pa por participa den e competencia di 1-2-3 KM mester registra y e muchanan por inscribi na nan scol. E aña aki e scolnan por registra e participantenan via online y ta pidi pa tuma bon nota cu riba e dia di competencia no por registra mas. E participacion na e competencia di 1-2-3 KM ta gratis. Durante e e competencia di e 1-2-3 KM lo haci uzo di un registracion di tempo electronico y lo haci uzo di e MYLAPS Bib Tag. Tambe tur mucha cu participa lo ricibi un t-shirt y esaki nan lo por busca dia 23 di Juni na e tentnan riba e parkeerplaats di Aruba Bank.

Durante e competencia ta rekeri p’e muchanan tin nan t-shirt bisti. Na final di e competencia e muchanan lo ricibi awa, ice-tea y fruta. Lo tin premio pa e prome 3 luganan den cada categoria di mucha muhe y mucha homber, kendenan lo ricibi un medaya.

P’e 5K Fun Walk & Run tur hende lo por participa y esaki ta cuminsa y termina riba e parkeerplaats di Aruba Bank. E participantenan lo mester cana 5 buelta di 1KM y e bueltanan aki ta representa e 5 renchinan Olimpico. E registracion lo ta gratis y por sosode 1 ora prome cu start di e caminata, pues desde  5 or di mainta. Pa e 5K e prome 200 participante ta ricibi un t-shirt y esaki nan por haya tambe ora di registra.

E 5K Fun Walk & Run lo cuminsa pa 6’or di mainta, sigui p’e competencia di 1-2-3K pa muchanan cual ta programa pa cuminsa pa 7’or di mainta.  Pa 9’or di mainta lo tin demostracion di deporte y kids corner, mientras cu desde 10’or lo tin oportunidad pa papia cu e top atletanan Arubano.

COA a invita su federacionnan miembro pa nan bin duna un demostracion di nan deporte. E demostracion aki tambe lo ta riba e parkeerplaats di Aruba Bank Camacuri.

Tambe a invita atletanan top Arubano pa ta presente pa duna publico y specialmente e muchanan oportunidad pa papia cu nan y haci pregunta.

Aruba Bank, IBiSA y COA ta invita comunidad di Aruba pa yega riba diasabra dia 23 di Juni na parkeerplaats di Aruba Bank Camacuri pa asina apoya tur participante den e competencia, pero tambe pa nan mes participa na e diferente actividadnan y tambe pa haya mas informacion di e federacionnan y top atletanan. Trece e muchanan tambe pa asina nan por disfruta e dia aki den e kids corner.

 

 

 

 

 

- Advertisement -

DUNA COMENTARIO

Please enter your comment!
Please enter your name here