Home Parlamento Ley Landsverordening Politieke Partijen” a keda entrega na Presidente di Parlamento

Ley Landsverordening Politieke Partijen” a keda entrega na Presidente di Parlamento

25
0
SHARE
- Advertisement -

ORANJESTAD (AAN) —Diamars di e siman aki, na Parlamento di Aruba a tuma lugar e entrega di e Concepto di Ley “Landsverordening Politieke Partijen”, cu mester bay Raad van Advies.

El a tuma lugar den e Oficina di Presidente di Parlamento sr. Ady Thijsen, den cual man e documento a keda entrega.

E Concepto di Ley aki ta regarda e control di partidonan politico, segun Parlamentario Edgard Vrolijk a splica.

El a menciona cu for di 1997 tin den lachi tira un concepto di ley cu a wordo traha for di Partido AVP mes, cu e momento ey tabata den gobierno.

E ley aki ta pa e partidonan politico registra kico nan ta haya na donacionnan (sponsors) pa asina nan por core campaña.

Vrolijk a señala cu lamentablemente hopi aña a pasa y ningun gobierno tabata tin e curashi di presente, no obstante su persona hunto cu su colega Rocco Tjon cu tambe a traha riba e ley, a tuma e iniciativa aki pasobra e prome punto di e gobernacion actual ta integridad.

Na Februari nan a entrega e ley di screening y control di ministernan cu ta regarda e procedure cu nan mester sigui pa bira minister, y reglanan cu mester tene cuenta cune tambe mientras cu nan ta eherce como minister.

El a bisa cu un persona hoben manera e, cu a sali di un hogar humilde, pa e yega unda e ta awor el a haci un esfuerzo sumamente grandi, y a traha hopi duro y busca alternativanan pa crea fondo pa asina por a core un campaña y hendenan por a conoce ken e ta y esey ta hopi costoso.

Pero tin otro banda por mira gruponan cu a lanta di awe pa mañan y ta haya fondonan pa core campaña na grandi y ta lanta e duda con nan por a yega na e fondonan ey.

Tin partidonan politico cu ta gasta miyones di florin na campaña mientras cu a rifa un auto pa aña.

E ley aki ta exigi cu den e periodo di core campaña mester demostra di unda a haya e placa pa medio di un registracion di cuanto e suma ta y di ken a haye. Esaki ta conta pa cada candidato riba lista pero tambe pa e partido politico mes.

E parlamentario a indica cu pa medio di e ley aki nan kier evita e creencia cu hopi biaha ta scucha pafo cu ta e comerciante ta goberna nos pais, y ta bin e pregunta ta ken ta goberna si gobierno of comerciante.

El a subraya cu pueblo mester ta confia pa ken e ta vota.  Esaki ta e di dos stap ora di papia di integridad y ta un cambio cu nan kier a trece como politico hoben cu ta loke e pueblo a vota pe.

Tambe Parlamentario Rocco Tjon a bina palabra, y a indica cu esaki tabata un momento hopi importante pa politica na Aruba y hopi biaha el a trece dilanti cu confianza den politica mester wordo restaura na Aruba y e ley aki lo percura pesey, sin duda.

Tjon a indica cu esaki ta e di dos stap y esun di tres cu nan ta trahando riba dje ta e Ley di Contabilidad nobo, cu lo percura pa tin mas transparencia, un bon traspaso di gobernacion, pasobra na final di dia e Aparato Gubernamental mester keda funciona manera mester ta. Otro proceso interesante cu sr. Thijsen ta trahando riba dje ta esun pa independiza tur e colegionan di Estado. Ta importante pa pueblo tin e confianza cu e Parlamento actual ta traha na bienestar di tur ciudadano, no obstante nan color politico y trayectoria.

El a subraya cu politiconan ta pasahero pero e cambionan ta duradero pa restaura confianza den politica.

- Advertisement -

DUNA COMENTARIO

Please enter your comment!
Please enter your name here