Home Hudicial Lo scucha testigonan di Paul Croes y abogadonan por haya copia di...

Lo scucha testigonan di Paul Croes y abogadonan por haya copia di yamadanan

252
0
SHARE
????????????????????????????????????
- Advertisement -

Abogadonan a logra convence Hues

ORANJESTAD (AAN)—– Ayera mainta abogadonan mr. Illes, mr. Lejuez y mr. Maldonado a debati den Corte pa haya cierto investigacionnan pa nan cliente. Mr. Illes, kende a representa Paul Croes y su señora Melony Croes Paesch ta esun cu a cuminsa critica e forma di actua arbituario di Ministerio Publico.

El a insisti pa bin un di dos “regiezitting” caso di preparacion pa e caso penal Ibis y pa scucha un cantidad di testigo. Tambe el a pidi pa haya copia di yamadanan. Despues abogado mr. Lejuez a cuestiona e acuscion di Fiscal contra su cliente Capriles no ta bon y pa declara Fiscal no admisibel.

Abogado mr. Maldonado cu a representa R.Aparicio a pidi pa scucha testigonan. Finalmente e debate a duna su frutonan pasobra Hues a honra e peticion pa un di dos “regiezitting”, scucha testigonan y tambe cu abogadonan por haya copia di yamadanan.

ABOGADO MR. ILLES

E abogado a bisa cu no ta comprendibel cu ainda no ta cla cu tur documentonan. A haya documentonan laat y a pidi pa pospone e “regiezitting”. E abogado a bisa Hues cu e caso aki ta compleho y ta un caso masha grandi caminda no a haya tur e documentonan na tempo pa por studia e caso y forma un defensa pa e clientenan.

Mr. Illes a bisa cu e ta haya cu mester planea un di dos regiezitting. El a señala cu Fiscal tabatin 2 aña pa prepara e caso y na forma arbiturario Fiscal tabata dicidi si abogadonan ta haya documento of no. Na opinion di e abogado, lo ta husto pa abogado por haya e oportunidad pa un di dos regiezitting.

El a menciona un serie di testigonan cu ta insisti pa scucha. E abogado a señala cu no por confia e declaracionnan aki y ta Fiscal a crea un imagen cu cosnan irregular lo a sosode. Hasta nomber di hefe di Warda Nos Costa a wordo menciona pa scucha como testigo.

E abogado tambe a pidi pa tin tur audio di yamadanan cu a scucha. Experiencia ta mustra cu lo por a interpreta yamadanan robez. Tambe e kier tur copia di combersacionnan “whatsapp”.

Mr. Illes a remarca cu e kier tin bista cla di sumanan cu ta acusa Paul Croes pasobra te ainda Paul Croes no sa di sumanan.

Pa loke ta señora Melony, ainda no por bisa nada pasobra ainda no a haya documentonan. E abogado a señala cu siman pasa ainda Fiscal a scucha Melony reclaciona cu declaracion di dama G. Ainda no a haya e declaracionnan aki y pesey ta insisti pa un di dos regiezitting.

ABOGADO MR. LEJUEZ

Abogado mr. Lejuez cu ta representa E. Capriles y muher S. Arends, a bisa cu e no tin nada contra pa scucha Paul Croes como testigo manera Fiscal a pidi. Pa loke caso E. Capriles, e ta haya e citacion no admisibel.

Especial e promer acusacion esta malversacion di sumanan di Stichting. Na opinion di mr. Lejuez, Fiscal no ta menciona sumanan y tampoco fecha. Ta masha hopi placa ta circula den e stichting y Fiscal no ta duna claridad den e acusacion. E abogado ta haya cu mester declara Fiscal no admisibel den e acusacion aki.

ABOGADO MR. MALDONADO

Mr. Maldonado, kende hunto cu mr. Oomen ta representa R. Aparicio, a bisa Hues cu e ta haya cu mester scucha Paul Croes cu tabata hefe di Aparicio. Tambe e ta haya cu mester scucha Capriles cu tabata traha e chequenan di e stichting y lo por duna splicacion.

Tambe el a pidi pa scucha e dama doño di un restaurant, cu kende Aparicio tin bon amistad pa hopi tempo. E abogado tambe a pidi pa scucha funcionario di CMB Bank pa splica con e cobramentonan tabata sosode. Tambe mr. Maldonado kier haya copia di yamadanan di cellular. El a bisa cu e no tin nada contra un di dos regiezitting.

DECISION DI HUES

Pa loke ta e peticion di abogado di Paul Croes, mr. Illes, pa scucha un cantidad di testigo, Hues a bisa cu e ta honra e peticion pa scucha esnan cu Fiscal no ta contra. E resto Hues no ta haya cu tin relevancia concreto pa cu e caso.

Pa loke ta e peticion pa haya copia di e audio cu a graba di yamadanan di cellular y telefoon, Hues a rechaza esaki pa un parti. Hues a bay di acuerdo cu e proposicion di Fiscal pa cada abogado specifica cual audio of audionan e ta desea di scucha y Fiscal lo percura pa esaki sosode.

Pa loke ta trata e peticion di parti di abogado mr. Illes pa instrui Ministerio Publico pa traha un procesverbaal tocante e motibo di investigacion Embarco, Hues ta haya cu esaki no tabata suficiente argumenta. Hues a bisa cu no tin suficiente motibo pa esaki y a rechaza e peticion.

Pa loke ta señalamento di abogado cu Fiscal no ta menciona sumanan den citacion, Hues ta haya cu tin suficiente mencion di sumanan den e documentonan y no ta haya cu mester declara Fiscal no admisibel.

Otro regiezitting. Hues a rechaza e ponencia di abogado cu 1 luna no tabata suficiente tempo pa por a prepara pa e regiezitting. Hues ta haya cu un luna promer cu e regiezitting ta suficiente pa por haci peticion pa mas investigacion.

E ta honra e peticion pa un otro regiezitting. Na opinion di Hues, esey ta duna suficiente tempo pa haci e investigacionnan y defensa por studia esaki. Na September 2018 lo tin e di dos regiezitting y na November – December 2018 lo por spera tratamento di e caso penal.

Pa loke ta e reclamo di abogado mr. Lejuez di e sospechoso E. Capriles, cu mester declara Fiscal no admisibel pasobra e no ta menciona den su acusacion sumanan cu ta sospecha E. Capriles di dje, Hues a rechaza esaki. Hues a bisa cu apesar cu ta compronde abogado cu no ta menciona sumanan pero ta rechaza esaki pasobra den e dossier ta papia di e sumanan. Ta placanan di e stichting cu a bay pa Paul Croes.

Hues a dicidi cu lo tin un di dos regiezitting na September 2018 pa Paul Croes, su señora Melony Croes Paesch, E. Capriles.

Hues a honra tambe e peticion di abogado mr. Maldonado pa scucha como testigo e doño di un restaurant den e caso di su cliente R. Aparicio. Hues a rechaza e peticion pa scucha un funcionario di CMB Bank. El a bisa tambe cu despues di scucha e testigonan e lo tende di mr. Maldonado si e kier pa Aparicio bin den e di dos regiezitting cu mas peticion.

 

- Advertisement -

DUNA COMENTARIO

Please enter your comment!
Please enter your name here