Paul Croes a bisa Hues ayera den Corte
ORANJESTAD (AAN) – Ayera mainta a cuminsa cu e caso penal cu Ministerio Publico a cuminsa contra un cantidad di persona entre otro ex minister Paul Croes. E caso ta hiba e nomber Ibis.
Contrario na loke hopi a spera e “regiezitting” no a bay facil. Un “regiezitting” ta caminda cu e sospechosonan acompaña pa nan abogado, Fiscal y Hues ta topa den sala di Corte caminda Fiscal ta splica kico e lo kier pa bay sosode. Hopi biaha Fiscal ta pidi pa scucha testigo y tambe di parti di abogadonan ta pidi di nan banda.
Esaki a bira un discusion interesante, cual DIARIO ta publica den diferente articulo. Den e articulo aki, DIARIO ta publica momento cu Hues a duna Paul Croes pa expresa su mes, a base di ley.
Paul Croes a expresa su decepcion y rabia pa e forma con Ministerio Publico a bin ta atende cu e caso. El a hasta expresa su desconfianza den e investigacion.
DECEPCION Y RABIA
Paul Croes a bisa Hues, e ta para cu sentimento mixto den Corte. El a bisa cu e caso aki tabata hopi pisa pa su famia. El a bisa cu ta promer vez den su bida cu e ta para dilanti Hues.
Na opinion di Paul Croes, e ta decepciona cu despues di 2 aña di investigacion pisa di parti di Ministerio Publico y ainda no tin un caso cla. El a bisa Hues cu e ta decepciona y rabia cu ainda no tin dossier completo.
Paul Croes a sigui bisa Hues cu como sospechoso e no por defende su mes debidamente manera ta su derecho. El a mustra cu un luna promer cu e caso, Ministerio Publico ta manda 20 mil pagina di documentonan pa su abogado prepara pa ayera. Esaki na opinion di Paul Croes no ta suficiente tempo pa por prepara debidamente.
El a remarca cu Fiscal ta bisa cu den e trayecto promer, abogado a haya documentonan. Na opinion di Paul Croes, 9 di e trayectonan no ta bin dilanti den e documentonan.
TACHA MI DERECHO DI DEFENDE
El a mustra cu promer Fiscal ta papia di 900 compania. Awor ta papia di 20 compania y un cantidad di “ontheffing”. Paul Croes ta para riba cu algun dossier no ta completo. El a expresa na Hues: “si mi mester defende mi mes contra acusacionnan, mi mester sa bon cla kico ta e acusacionnan. Mi ta wordo tacha den mi derecho di defensa”.
Paul Croes a bisa cu por tin errornan humano cu cierto documentonan por cay afor.
MI DERECHO USA CONTRA MI
Paul Croes a remarca na Hues cu Fiscal awor ta tira na su cara cu el a usa derecho di silencio. Paul Croes a enfatisa na Hues cu esey ta su derecho y awor Ministerio Publico kier usa esey contra dje.
NO POR CONFIA INVESTIGACION
Paul Croes a señala cu tempo cu e tabata sera, un anochi promer cu e mester a presenta dilanti Hues, a haya 1000 pagina di documento di investigacion cu mester prepara pa su siguiente dia y sin lus drechi den su cel.
El a bisa cu Fiscal a lag’e keda den limitacion di bishita pa 80 dia. A tene dos razia na su cas y e falta documento cu a confisca na su cas.
Paul Croes a remarca, con por confia den un investigacion asina. El a bisa Hues cu e kier coopera cu e investigacion pero mester tin un proceso husto.
CLARIDAD DEN CASO
Paul Croes a sigui bisa cu e no por compronde con Fiscal ta haci asina dificil. E ta referi aki na e investigacion Embarco. E kier haya un procesverbaal cu ta splica con a cuminsa cu e investigacion aki. Na opinion di Paul Croes, tin diferente persona cu ta firma den un asunto aki. Pesey e kier claridad.
Ta asina cu na final di e “regiezitting” Hues a dicidi cu lo tin un di dos “regiezitting” na September 2018 pero a rechaza e peticion di abogado mr. Illes y Paul Croes pa e procesverbaal riba investigacion Embarco.
