Home Gobierno Minister a anuncia pronto ehecucion di maneho pa seguridad pa pueblo y...

Minister a anuncia pronto ehecucion di maneho pa seguridad pa pueblo y turismo

70
0
SHARE
- Advertisement -

ORANJESTAD (AAN)—Minister di Husticia mr. Andin Bikker, a participa den e conferencia di prensa di gobierno, Dialuna mainta.

Minister Bikker a anuncia algun ehecucion di maneho, a base di e plan cu a wordo aproba un par di siman pasa door di Parlamento y cu awor tin fondo pa realiza esaki.

Un di nan ta cu Diabierna di e siman aki ta cuminza cu un ciclo di reapertura di e postnan di Polis di Bario. Esun prome lo ta na Mabon, y di eynan, e simannan venidero conhuntamente cu FCCA nan ta preparando tur e postnan bek, esnan cu bao e gobierno anterior a wordo neglisha y algun a cera permanentemente y cu aworaki lo wordo drecha.

E mandatario a anuncia cu un bez nan keda cla lo tin reapertura, pasobra gobierno ta kere, y a delinea esaki tambe, cu visibilidad di polis den barionan, area hotelero y rond di Aruba, mester wordo aumenta. Esaki lo duna un sentido di seguridad y ademas lo preveni cu esnan cu tin menos bon intencion ta bay over na haci cualkier acto cu no ta permiti pa nos leynan.

Ademas di esey ora cu tin agentenan policial den puntonan strategico e “responds time” lo por wordo optimaliza pasobra si nan ta cerca y visible den bario, un bez cu drenta un melding, nan por ta na e caminda di e suceso mas lihe.

Fuera di esey gobierno ta bezig pa reforza e cuerpo di polis motoriza, cual tambe a wordo neglisha pa e gobierno anterior. Aworaki ta bay reforza nan pa nan tambe duna mas visibilidad di nan presencia den bario.

Tambe lo reforza locual ta conoci como TOPS, cu ta e unidad di polis orienta den turismo, cu gobierno kier dune un atencion special pasobra turismo ta nos prome pilar di cual nos ta biba, y ora nan bin cu vacacion si nan mester di asistencia policial pa cualkier motibo, cu nan por haya esaki di manera acelera.

Entre tanto, tin preparacion y sondeo andando pa duna acceso bek na nos propio radar. Gobierno a tuma nota cu gobierno anterior, na 2011, a dicidi pa no sigui cu e acceso na nos propio radar, y nan ta di opinion cu e decision aki no ta esun di mas corecto.

Ora tin radarnan cu ta complementa otro, tin mas chance pa detecta embarcaciones cu no ta autoriza y asina proteha nos costa y nos fronteranan. Na final di dia loke gobierno kier logra ta: restaura y optimaliza e seguridad di nos pueblo y nos bishitantenan.

 

 

- Advertisement -

DUNA COMENTARIO

Please enter your comment!
Please enter your name here