Home Social Minister a pidi Grupo Nucleo describi e maneho cu tin pa nos...

Minister a pidi Grupo Nucleo describi e maneho cu tin pa nos grandinan

17
0
SHARE
- Advertisement -

Segun Ivo Valdez:

ORANJESTAD (AAN) — Grupo nucleo ta consisti di mas of menos 32 diferente grupo di mayor, reparti na diferente bario rond di Aruba, cu e finalidad pa trece mas apoyo na tur esnan di e tercera edad.

Tocante e tema aki, señor Valdez ta amplia.
El a splica cu e meta principal di e iniciativa aki, ta pa pone instancianan na haltura di kico ta e actividadnan cu tur e gruponan aki ta haci.

Por ehemplo, Fundacion “Movimento Ta bida” y “Kibrahacha”, entre otro.  Den e plannan pa e aña aki, nan tur a presenta nan proposicion pa wordo ehecuta.

Anteriormente, Sr. Valdez a bisa, e grupo nucleo a haya un trabou di Minister Lampe pa trece den un documento, tur e puntonan di atencion riba maneho di nos grandinan, anto tur esakinan a bin dilanti durante e reunion na e grupo pa wak si nan ta bay di acuerdo.

En berdad, na Aruba mester bin un miho maneho den un forma mas estricto mirando e cantidad di personanan di 60 aña den nos poblacion, caminda cu nan derecho di opina ta bay den e maneho di gobierno.

Gobierno a anuncia cu e persona, e ser humano tin prioridad; e ora ey, e grupo aki mester tin tur e derecho di opina riba con nan kier wordo trata y cuida riba diferente tereno social. Esey ta e meta principal y tambe pa tene e mayornan mas activo posibel pasobra “movecion ta bida”.

Den total tin un cantidad, segun e cifranan for di SVb di aña 2017, di mas di 21 mil pensionado y no ta papiando di e pensionado publico so. Ta papia tambe di esnan cu ta cobra un pension so, unda cu tin hendenan cu a bin Aruba di afo, cu no a biba gran parti di nan bida akinan, pero na ratio, nan ta haya un pension chikito. E personanan aki mester tene cuenta cu nan, ya cu nan calidad di bida ta bay atras.

Esey ta un di e metanan pa hiba e problema aki dilanti pa nan por haya un miho cuido social na cas, cuido di salud y diferente otro aspecto di cuido. Tambe tin e situacion unda cu ta dificil pa mayornan sali y no tin caminda adecua pa cana den comparacion cu otro paisnan manera Europa.

Tambe ta papia cu e costo di bida ta dal nan mescos cu un persona cu ta traha y esaki ta baha mas pisa siendo cu nan ta cobra tiki placa, pa locual Sr. Valdez a bisa cu esey ta e idea di e reunion unda lo bay atende cu e diferente gruponan pa tur e problemanan cu nan ta identificando y nan ta hib’e na e oidonan di e gobernantenan.

A bira tempo cu mester cuminza cu un miho trato riba e personanan di tercera edad.

Tin centro Kibrahacha por ehempel cu ta haciendo un bon trabou pero di otro banda tin barionan unda cu no tin ni un actividad pa nos grandinan y grupo Nucleo tin un plan riba esaki caminda cu nan ta reuniendo regularmente cu diferente grupo pa purba di trece actividadnan na diferente bario, pero no tur ora nan a logra pa falta di fondo y esey ta e problema cardinal y tambe e lugarnan unda cu e actividadnan por tuma luga.

E idea ta pa yega na un plataforma pa trata riba tur e asuntonan aki y e reunion aki ta un comienzo unda cu tabata tin for di aña pasa caba pero cada grupo tin actividadnan den forma individual pero awor ta bin centralmente, pa tende tur e diferente problemanan cu tin, segun Sr. Ivo Valdez, di e grupo Nucleo.

- Advertisement -

DUNA COMENTARIO

Please enter your comment!
Please enter your name here