Home Gobierno Minister Otmar Oduber a anuncia firmamento oficial di overeenkomst pa terenonan erfpacht

Minister Otmar Oduber a anuncia firmamento oficial di overeenkomst pa terenonan erfpacht

357
0
SHARE
- Advertisement -

ORANJESTAD (AAN) – Minister Otmar Oduber, titular di Infrastructura y Medio Ambiente, a participa den e conferencia di prensa di gobierno, Dialuna mainta.

E dignatario a toca cinco punto di agenda, esun prome relaciona cu un invitacion pa prensa pa acudi atardi na Renaissance Conference Center, unda e prome fase di e maneho nobo di otorgamento di tereno pa construccion di vivienda. E firmamento oficial di overeenkomst y entrega di diferente carta a tuma lugar.

E mandatario a duna di conoce cu tin un total di 346 persona cu a haci un peticion na DIP, y cu a bira e prome grupo cu a bin na remarca pa loke ta trata nan overeenkomsten (acuerdonan).

Ta trata aki di personanan cu ya caba a pasa den un proceso di reservacion y mas of menos 140 a cumpli cu e diferente puntonan cu a wordo treci dilanti den e maneho nobo. Den pre-reservacion tin mas of menos 200 persona cu a haya carta dialuna atardi pa inicia e proceso pa adkisicion di nan tereno pa traha nan cas.

Esaki ta importante pasobra pa Gabinete Wever-Croes e intencion ta pa cada aña, mas of menos mil vivienda adicional wordo crea na Aruba. Esaki ta nifica cu mescos cu e ciudadano tin su derecho di ricibi su tereno tambe nan tin un obligacion conforme maneho nobo.

Esaki ta encera su rekisitonan pa tur persona cu a ricibi nan overeenkomst of nan pre-reservacion, of carta di reservacion.

Esey ta nifica cu for di dialuna atardi caba, esnan cu tin nan overeenkomst tin e derecho di pasa nan acta di erfpacht na Notario, pero e cambio cu tin ta cu esaki mester sosode hunto cu un hipoteca, cu tabata den e proceso caba pa por a haya reservacion of pre-reservacion. Esaki no pa hacie complica sino pa evita e hecho cu tin hende ta ricibi nan tereno pero ta keda sin traha un cas riba e tereno ey.

E di dos aspecto importante, muy specialmente pa loke ta trata reservacion of pre-reservacacion, ta cu nan tin e compromiso of obligacion pa cumpli cu diferente exigencia, pa loke ta trata e posibilidad di yega na un overeenkomst y asina e acta cuminza pasa na Notario.

Ayera atardi a cuminza e prome fase na un forma simbolico, pa di e manera aki gobierno mustra no solamente cu ta otorga cada un overeenkomst y cada carta cu e posibilidad pa nan haya un tereno, pero e oportunidad tambe pa mustra riba e obligacionnan cu cada un tin, pa evita loke a tuma lugar den pasado, cu cada bez a bin pidi e minister, cu no ta envolvi den e proceso mas, expansion di tereno cu continuamente tabata wordo pidi.

E dignatario a subraya cu nan a pone un atencion special riba esaki y pone tur hende hunto, splica nan un biaha mas e reglanan un biaha mas di e maneho nobo, pasobra ta netamente aki na unda e nepotismo a tuma lugar den pasado, unda cu cierto hendenan tempo a pasa y tereno a wordo kita di biaha, pero den otro caso esun cu conoce e minister a haya expansion pa seis luna of un aña, loke a conduci cu tin hende cu pa cinco aña tin un tereno sin cu esaki a wordo utiliza.

E dignatario a expresa cu esaki ta e inicio di un era nobo cu pa e gobierno aki ta importante cu no solamente ta keda na DIP pa otorga tereno, pero e ta pone un responsabilidad grandi riba DOW unda cu ta bay procesa hopi mas bouwvergunning y naturalmente, DOW ta prepara pa den un periodo di cuater pa seis siman, cada permiso di construccion lo mester sali un bez cu e persona pasa su acta na notario.

- Advertisement -

DUNA COMENTARIO

Please enter your comment!
Please enter your name here