Home Gobierno Minister Xiomara Ruiz Maduro cu acento riba e di 15 aniversario di...

Minister Xiomara Ruiz Maduro cu acento riba e di 15 aniversario di oficializacion di Papiamento

13
0
SHARE
- Advertisement -

ORANJESTAD (AAN) – Dialuna mainta, Gobierno di Aruba a tene su conferencia di prensa, cu participacion di Minister di Finanza, Economia y Cultura, mr. Xiomara Ruiz-Maduro, y Minister di Husticia mr. Andin Bikker.

Minister sra. Ruiz-Maduro a inicia e conferencia di prensa, elaborando riba e tema “Royalties” (pago por derecho de autor) riba e radioemisoranan local y 15 aña di Oficializacion di nos Idioma Papiamento.

15 AÑA OFICIALIZACION PAPIAMENTO:

E dignatario a cuminza cu e tema di 15 aniversario di oficializacion di nos dushi idioma Papiamento.

E dignatario a subraya cu ta importante pa remarca cu Papiamento ta cumpli 15 aña di su oficializacion, y esaki a sosode dia 21 di Mei di aña 2003.

Gobierno e tempo ey a bin cu e ley cual el a pasa pa Parlamento, pa asina banda di Hulandes, e Idioma Papiamento bira oficial na nos pais.

Esaki sigur, e mandatario a acentua, ta un logro grandi y bunita, pasobra banda di e simbolonan cu ta uni nos manera nos himno y nos bandera nos tin nos escudo y tambe tin nos idioma natal Papiamento, cu ta haya su lugar tambe den locual ta e parti oficializa den nos pais.

Na comienzo di e aña aki Aruba a proclama 2018 como “Aña di Papiamento” como un iniciativa di Fundacion Lanta Papiamento, y di cual mas cu claro, hunto cu minister Rudy Lampe, titular di Enseñanza, a decreta esaki.

Minister Ruiz-Maduro a menciona cu en conexion cu esaki tambe, den fin di siman tabata tin un celebracion bunita (na Fort Zoutman), cu tabata masha bunita, y mester keda celebra locual ta di nos, y ta uni nos.

“Esaki dia pa dia nos mester duna di nos banda, no solamente como gobernante, pero tambe como comerciante y como un ciudadano comun na nos pais, nos tin cu brinda esaki. Ta mas cu claro, na e imigrantenan cu ta bin establece nan mes na Aruba, nos ta gradici cada un di nan pa e respet cu nan por brinda na locual ta e uso di Papiamento na nos pais”, e dignatario a subraya.

El a pidi miembronan di prensa tambe pa nos haci un esfuerzo conhunto pa asina nos percura pa nos ortografia ta corecto y skirbi Papiamento bon, y papi’e tambe manera mester ta.

E mandatario a acentua cu dialuna nos tur a corda riba e oficializacion di Papiamento y el a subraya pa nos tur traha hunto pa sigui recorda e hecho aki y pa kishiki nos muchanan tambe cu Papiamento y pa nan use como nos Idioma natal cu e ta.

E mandatario a acentua cu awendia cu television, cu e weganan cu tin, hopi biaha nos muchanan ta papia ingles cu otro, y asina nos ta lubida locual ta nos Idioma natal, cu ta hopi importante pa e desaroyo di nos propio yiunan. “ Pesey Papiamento tambe tin su lugar bon mereci den locual ta e parti escolar, pero nos mester hinke tambe den nos bida cotidiano, unda cu nos ta respeta y aprecia tur otro idioma internacional, pasobra nos mester di esey tambe como Isla turistico, pero nos mester duna di nos parti tambe pa conserva locual ta di nos y den e caso aki nos Idioma Papiamento”, e dignatario a reitera.

 

 

 

- Advertisement -

DUNA COMENTARIO

Please enter your comment!
Please enter your name here