Home Salud Presidente di ODEA Sharlyn Tromp ta enfoca riba Siman di Enfermeria

Presidente di ODEA Sharlyn Tromp ta enfoca riba Siman di Enfermeria

7
0
SHARE
- Advertisement -

ORANJESTAD (AAN) — E siman aki ta Siman di Enfermeria y ODEA, e Organizacion di Enfermeria di Aruba ta manda un cordial pabien na tur profesional di Enfermeria riba nan dia.

Sra. Sharlyn Tromp-Farro, Presidente di ODEA, den entrevista cu nos redaccion a splica cu e celebracion ta consisti di un aspecto religioso, social y educativo unda cu e enfermera lo ta central den nan siman, cu no ta pa traha so.

E profesion di enfermeria ta rekeri educacion y pasion pa e trabao.

“E reto di mas grandi cu tin ta e scarcedad di enfermeronan cu ta afecta e mercado aki mundialmente y Aruba lo no scapa.

Tambe e parti cu no por djis yen’e cu ken cu ta, siendo cu e profesion di enfermeria ta rekeri e educacion necesario y ta tuma su tempo. Cada persona mester tin su competencia cu mester siña y cu no por yega na un tienda cumpra un enfermera. E persona mester wordo forma y prepara, y esaki ta e reto”, sra. Tromp-Farro a señala.

Aunke tin un lista grandi di hoben na Colegio EPI pa inscribi den e Unidad di Enfermeria, pero tin cu wak tambe e cantidad cu a bin pa inscribi y cuanto ta gradua.

“Eynan por midi e cantidad corecto di profesionanan cu tin, siendo cu antes hospital mes tabata haci su seleccion di ken por drenta den e profesion, anto awor aki ta openbaar pa tur hende ta welcome.

Berdad cu den area di estudio semper ta cuminza cu gruponan grandi pero na e final e grupo no ta keda mesun grandi y ora nan caba tambe nan tin nan reto. Algun ta bay Hulanda pa sigui studia y specializa prome cu nan bin bek” el a menciona.

Na Aruba no tur hende mester por yega na un nivel 4 or 5 di HBO, pero tin enfermeranan tambe cu ta duna e cuido na cama y mester cuminza enfoca riba trata e scarcedad di personal di enfermeria na Aruba.

“E motibo pa cual no tin, hopi biaha e profesion aki no ta atrae hopi hende, tin di haber cu e curazon y e vocacion di cuido, unda e hende mester tin curazon y cariño pa cu e hende cu mester di cuido. E no ta algo cu nos por cumpra y e ta un feeling pa haci’e di curazon, siendo cu por a bay educa riba esaki pero ora lo caba no tin e pasion y amor pa keda y e ora ey, e problema ta sigui.

Te ainda tin hende den enfermeria cu pasion, pasobra si no nan t’ey y nan ta keda wanta sota di e comunidad cu tur e criticanan destructivo pa cu e cuido cu nan ta duna”, e dama a subraya.

Esey tambe tin su influencia aunke cu tur critica ta bonbini pa hisa e calidad, pero mester keda constructivo y na e caminda corecto.

“Tur instituto tin un departamento cu por entrega keho pa haci un investigacion pa haya un bon resultado. Pero e hende no ta usando e canalnan regular aki, sino cu nan ta bay riba e medionan social manera Facebook anto di e manera ey no ta drecha e calidad.

Esey ta kibra e persona den enfermeria.
Asina por ta garantiza na Aruba cu tur e enfermeranan y docternan a bay studia, cu nan diplomanan ta reconoci y registra pa por eherce e trabou, por tin diferencia den e cuido, pero ora ta cuestiona e estudio esey ta considera un falta di respet pasobra nan no sa kico un hende a pasa pa logra nan estudio”.
Sra. Sharlyn Tromp – Farro a señala cu nan ta haci nan best pa duna servicio. “Nos kier stimula tur colega pa sigui dilanti y keda traha cu e mesun amor y pasion, kere den nan mes.

E persona den cuido mester tin pasion pa traha y si un persona ta sinti cu kier duna su contribucion den cuido pa hisa e calidad, acerca Colegio EPI anto bay inscribi”.

E derecho riba salud:

E tema pa e aña aki ta: “The right for health” (E derecho riba salud).

“Mester corda cu educacion den salubridad no ta solamente e parti medico sino con bo ta biba tambe, unda cu wak hende na Linear Park, of bay gym pero no ta e movecion ey so ta garantiza salud, mirando cu tin hende delega cu colesterol of presion halto. Mester bin cu un combinacion den come y biba cu parte fisico y mental den armonia; cu tur esaki pa por tin un comunidad saludable, unda tin cu educa bo mes di kico cada ken por a haci, caminda cu hospital su SEH ta wordo overbelast cu situacionnan cu no mester ta eynan. Esey ta parti di e educacion y tambe parti di ayudo di docter di cas ta hunga un rol y ta un rij di lista cu comunidad mester traha y sin e comunidad nan lo no logra tampoco, segun Sra. Sharlyn Tromp, di Organisacion di Enfermeria Aruba”, sra. Tromp-Farro a conclui.

 

 

 

- Advertisement -

DUNA COMENTARIO

Please enter your comment!
Please enter your name here