Minister Otmar Oduber:
ORANJESTAD (AAN) — Minister Otmar Oduber, titular di Infrastructura y Medio Ambiente, a menciona den conferencia di prensa, cu aworaki ta den un proceso di remediacion di e dump di Parkietenbos como tambe e procesamento di sushi.
Siman pasa el a haya rapport di e dos comisionnan cu ta integra den e task force di e waste management, tanto for di man di TNO cu a encabeza e aspecto di remediacion pero tambe di parti di WEB, cu tabata encarga cu aspecto tecnico den e comision cu ta trata e procesamento di sushi.
E dignatario a subraya cu gobierno ta hopi cla den e direccion cu nan kier bay na e momentonan aki. E no a duna un aprobacion ainda riba e rapport, pero tur indicacion ta cu nan ta bay den direccion di un incinerator, pa crea sea gas of coriente.
E mandatario a menciona cu, naturalmente, nan kier haci esaki den un ambiente transparente y habri, unda tin un destaho publico cu lo mester sali na Juni proximo, y cu ta nifica habri e posibilidad no solamente pa esnan cu a participa caba, pero pa otronan tambe cu tin interes sea pa remediacion di e dump cu por wordo haci den dos forma: sea simplemente tapa loke tin eyden of bay poco, poco na clean up e area, mirando cu e companianan cu a inscribi ta papia di uza e sushi aki pa produci gas of coriente.
Esaki ta rekeri pa hacie na un forma hopi responsable y percura tambe pa e sushi cu tin na Parkietenbos no bay afecta e area, y actualmente tin formanan hopi profesional pa haci esaki.
E mandatario a señala cu gobierno ta den e fase aki unda nan ta papiando di un inversion cu mester bay tuma lugar, y ta sigur entre 150 pa 200 miyon dollar, pa ambos fase y e camindanan cu mester cana.
Minister Otmar Oduber a acentua cu esaki ta sumamente necesario y no tin tempo pa warda mas mirando tambe e ultimo rapport di PAHO den esaki.
