Home Gobierno Prome caminda cu problemanan social ta manifesta, ta na scol

Prome caminda cu problemanan social ta manifesta, ta na scol

14
0
SHARE
- Advertisement -

Minister Rudy Lampe:

ORANJESTAD(AAN): — Veiligheidshuis a keda inaugura diahuebs, 24 di Mei y PG Alexander van Dam a ilustra cu e kier tin un rol mas for di e minister di enseñansa den henter e proyecto aki tambe, mirando cu ta trata di hobennan.

Minister Rudy Lampe a indica cu problemanan social ta bati porta di scol. E maestronan di scol, e cabesante di scol ta e promenan cu ta señala problemanan social cu tin den e famianan.

E palabra clave di Veiligheidshuis ta cu e ta trata di un forma di cooperacion entre diferente instancia y ta esey ta exactamente loke tin mester na Aruba. Mas cooperacion entre diferente instancia. Ta un hopi bon iniciativa segun e minister. Si e mester wordo complementa cu un otro trayecto.

E ta na ministerio publico. Kiermen cu ya ora famianan a haya nan den problema cu husticia y ta purba di yuda pa nan no sigui cay den e circuito di criminalidad y tur e instancianan ta coopera cu otro pa yuda un famia pa nan no keda ripiti e problema cu husticia.

Den e sentido ey, tremendo iniciativa, segun e minister., Pero mester evita cu e ta yega asina leu. Kiermen e parti preventivo. Pesey ta importante un proyecto cu tabata tin hopi aña pasa, lamentablemente cu cambio di gobierno e no a sigui ta e cooperacion preventivo na nivel di bario.

Kiermen cu tur siman of un biaha pa dos siman, bo ta haya e cabesante di scol ta reuni cu Wit Gele Kruis, ta reuni cu pastoor di parokia, ta reuni cu polis di bario y ta discuti casonan.

Mescos cu Veiligheidshuis caminda cu instancianan ta bin hunto, pa discuti casonan completo, asina aki den bario e diferente instancianan menciona, lo mester bin hunto pa discuti casonan.

Si esey tabata tey, e casonan tragico di Rishandroh y Eugene no lo a pasa. E ora ey e diferente instancianan ey, ta discuti, nan ta bay bishita e cas, ta señala cu tin tal problema na tal famia, e ora ta actua preventivo prome cu bay asina leu cu ta haya problema cu husticia.

E minister ta spera cu e Veiligheidshuis aki wordo complementa cu un iniciativa di cooperacion na nivel di bario, unda e scolnan, e maestronan, cabesante di scol, ta hunga un rol fundamental.

E problema cu yiu

E minister ta compronde cu un mayor, casi instinctivamente pa naturalesa, ta defende su yiu. Pero di un otro banda, tin cu tene na cuenta cu bo no ta biba bo so, sino bo ta biba den un sociedad, unda cu tin cierto norma y balornan. Pesey mester ta constantemente den interaccion cu bo sociedad.

Ningun hende ta un isla su so cu ta biba aisla di otronan. Den e sentido ey tambe, mester fomenta cu nos ta parti di un sociedad y ora bo ta parti di un sociedad, bo tin cu acepta tambe cierto norma y balornan cu ta vigente pa bo por relaciona cu otro.

 

- Advertisement -

DUNA COMENTARIO

Please enter your comment!
Please enter your name here