Home Gobierno Prome Minister a reuni cu Premier di Hulanda Mark Rutte

Prome Minister a reuni cu Premier di Hulanda Mark Rutte

29
0
SHARE
- Advertisement -

ORANJESTAD   (AAN) – Prome Minister e siman aki ta na Hulanda pa audiencia cu Rey Willem Alexander y pa diferente otro reunion. Esaki ta e prome bishita di trabou cu e mandatario ta haci como Prome Minister di nos pais. E bishita cu Rey Willem Alexander ta plania pa tuma luga diaranson 30 di mei.

Premier Evelyn Wever-Croes dialuna a reuni cu Prome Minister di Hulanda Mark Rutte. Varios tema a wordo discuti entre otro e tema financiero di nos pais Aruba.

Prome Minister ta indica cu e ta consciente cu na Hulanda no tin mucho confiansa den Gobierno di Aruba y den finansas di Aruba debi cu Gobierno anterior a viola tur palabracionnan cu el a haci cu Hulanda. Gobierno di Mike Eman a haci promesanan cu e tawata sa cu e no por cumpli. A bin cu e ley di CAFT cu tampoco el a cumpli cu n’e. Tur esaki a causa un desconfiansa enorme na Hulanda.

Premier Evelyn Wever-Croes a splica Prome Minister Rutte cu Aruba awo tin un Gobierno serio, cu Ministernan serio. Como tambe cu un Parlamento critico. Gabinete Wever-Croes a compromete cu nos si lo atende cu e tema financiero di nos pais. E mandatario a duna un splicacion na Premier Rutte con Gobierno di Aruba ta haciendo esaki.

Un tema cu no por a keda sin wordo atendi ta e tema di Venezuela cual discusionnan a dura basta largo. Di parti di Prome Minister Rutte a mustra cu Hulanda tin bon comprension pa loke Aruba ta pasando aden cu e situacion di Venezuela. No a toca e tema ainda na kico Hulanda por yuda pero si a cuminsa papia riba e tema ey y naturalmente ora Gobierno di Aruba tin su plan cla y e gastonan total ta inventarisa, indudablemente Hulanda lo duna su ayudo.

“A tarda mi basta pa splica cu e Gobierno aki ta un otro Gobierno cu esun anterior cu ta pensa diferente. Un Gobierno cu no ta bay manipula y lo no priminti cosnan cu nos no por cumpli. Mi tin pa bisa cu poco poco aki na Hulanda e confiansa den Aruba ta creciendo bek. Locual cu Gobierno anterior bou di liderasgo di señor Mike Eman a haci ta dañonan inmenso na Hulanda. Daño inmenso na e credibilidad di Aruba y na e confiansa cu Hulanda mester tin den Gobierno di Aruba”, Prome Minister a bisa.

E trabaonan di Prome Minister ta sigui na Hulanda den e siman aki. Importante ta, segun e mandatario, cu su bishita Aruba ta crea bek e confiansa di Hulanda den e pueblo di Aruba, pa di e forma aki mira con Hulanda por yuda tambe pa Aruba sali for di e problemanan cu nos pais ta enfrenta.

- Advertisement -

DUNA COMENTARIO

Please enter your comment!
Please enter your name here