Home Gobierno Prome Minister a reuni cu Secretario di Estado Raymond Knops

Prome Minister a reuni cu Secretario di Estado Raymond Knops

95
0
SHARE
- Advertisement -

ORANJESTAD  (AAN) – Prome Minister Evelyn Wever-Creos e siman aki ta na Hulanda pa reuni cu Gobierno Hulandes riba diferente tema. Entre e reunionnan, diamars mainta Prome Minister a reuni cu Secretario di Estado Raymond Knops cu diferente tema riba agenda.

E prome tema cu a wordo trata cu señor Knops ta e situacion financiero di pais Aruba. Prome Minister a indica cu no ta un secreto cu nos situacion financiero ta uno hopi dificil. A desvia di tur e reglanan cu ta poni den e ley di LAFT desde aña pasa caba ora cu Gobierno aki a haya un deficit hopi mas grandi cu loke ta permiti pa ley. Mientras tanto, Gobierno di Aruba a pasa e presupuesto hunto cu e crisisheffing.

Cu esaki, segun e prome mandatario di nos pais, Hulanda poco poco ta haya mas confiansa den e Gobierno di Gabinete Wever-Croes. Nan ta reconoce cu Aruba ta conta cu un Gobierno serio cu ta tuma decisionnan pasobra kier mira un solucion pa e crisis financiero di nos pais.

“Naturalmente, e confiansa no tey completamente ainda. Tin varios discusionnan andando riba e supervision den futurto, sea CFT ta keda of no. Na Hulanda mi a splica cu Gobierno di Aruba ta sinti cu e supervision di CFT a faya. Si esaki tawata exitoso, awe nos lo no ta para unda nos ta, den un crisis financiero. Mirando esaki, no por defende si CFT lo keda un poco mas largo na Aruba”.

Prome Minister ta enfatisa sinembargo, cu supervision toch ta algo cu en general Aruba tin mester cu ta haci cu mester dicidi pa wak con lo sali for di esaki. Tambe tin e aspecto di entrada y gastonan, e deficit cu Aruba tin, e debe, ta temanan cu tambe a haya atencion den e reunion cu Secretario di Estado señor Knops.

Un otro punto di agenda cu a wordo trata cu señor Knops ta e situacion na Venezuela. Prome Minister a indica tur e esfuersonan cu Gobierno di Aruba a haci y e pasonan cu ta tumando pa garantisa e trankilidad na Aruba mes. E situacion na Venezuela ta sigui delicado cu ta pone cu mas Venezolanonan lo kier sali for di Venezuela y drenta Aruba ilegalmente cu ta algo hopi preocupante pa Gobierno di Aruba.

E Premier di Aruba ta duna di conoce cu Hulanda tin atencion pa e tema aki cu ta un tema compleho y hopi delicado. Pero e mandatario principal di nos pais ta sinti cu Hulanda kier mira Gobierno di Aruba atende cu problema financiero di Aruba prome. Despues cu pone ordo den tur e desordo cu tin financieramente, por atende cu e tema di Venezuela tambe.

Prome Minister ta enfatisa cu e reunionnan ta bayendo hopi bon. Poco poco Hulanda ta haya confiansa bek den nos pais. “Ta sinti e dificultad cu, debi na e mal maneho di Gobierno di AVP, nos ta haya nos cu n’e na Hulanda sinembargo mi mester bisa cu poco poco bo ta sinti cu e confiansa ta bin bek. Esaki ta yena mi cu hopi satisfaccion. Mi ta sigur cu asina aki hunto nos por yega na un miho solucion pa e pueblo di Aruba. Esfuersonan ta wordo haci pa poco poco e confiansa wordo reestableci”.

 

 

 

 

 

 

- Advertisement -

DUNA COMENTARIO

Please enter your comment!
Please enter your name here