Home Comentario Pueblo preocupa cu e ola di crimen cu ta sutando nos isla

Pueblo preocupa cu e ola di crimen cu ta sutando nos isla

75
0
SHARE
- Advertisement -

Ohala plan di minister wordo aplica lihe:

ORANJESTAD (AAN) – Matutino DIARIO a ricibi algun reaccion di ciudadanonan cu ta sumamente preocupa cu e ola di atraco y violencia cu ta lantando atrobe na Aruba.

E pueblo ta sigui cu atencion e noticianan di suceso, tocante e hortamento den cas, atraco cu arma for di tempran, asalto riba hende y e hecho cu tin hende ta core den auto cu arma, y diripiente ta los tiro riba un cas, manera e noticia cu a sali publica diamars den medionan.

Esaki ta hopi alarmante! No ta un asunto di haci politica cune y tira falta riba minister of polis. Ora cu polis ta haya mas autoridad pa actua, lo ta bon pa haci razia den casnan tambe unda por tin arma scondi, arma cumpra sin permiso, of hende cu tin permiso pero cu ta conoci of sospecha cu den nan man, un arma ta peligroso.

Hopi hende tin miedo di sali anochi bay cana pa haci ehercicio, of yiunan cu tin mayornan ta biba nan so den un cas tin temor cu algo por pasa nan si tin hende ta vigila pasobra nan sa, di un of otro manera, cu e pareha di hende grandi ta bibando nan so.

Tin yiunan cu ta yama nan mayornan na telefon pa puntra nan si nan ta sigur cu portanan ta bon cera, y tin cu hasta ta bin nan cas anochi laat wak si tur cos ta ok.

Un situacion cu Aruba no tabata conoce un par di decada atras. No por bisa cu ta hende di afo so ta bin Aruba haci malo. Tin hende di aki mes cu tampoco tin bon intencion, manera den tur pais tin mal ciudadano, pues Aruba no ta e excepcion.

Pero si ta un hecho cu varios di e malhechornan aki ta hende cu a bin di otro pais, y lamentablemente nan ta hende sumamente peligroso, por ta mas peligroso cu un mal yiu di tera.

Aruba ta un isla trankil cu no merece di wordo suta pa e tipo di actonan criminal aki. Ya ni camara den negoshi ta garantiza seguridad. Asina diferente hende ta comenta.

Minister di Husticia sigur tin cu confronta hopi reto, kizas mas cu el a pensa pa frena of baha criminalidad na Aruba. Ohala pronto e por aplica su plan di accion, prome cu e situacion bay completamente foi man y bira un mision imposible pa cual no tin nada mas pa haci.

Te aki un articulo basa riba diferente reaccion. Nos pueblo tin temor, ta bibando cu miedo, y ta sintiendo insigur te ainda!

 

- Advertisement -

DUNA COMENTARIO

Please enter your comment!
Please enter your name here