Home Politica Recordando cu 15 aña pasa Papiamento a bira e idioma oficial di...

Recordando cu 15 aña pasa Papiamento a bira e idioma oficial di Aruba

17
0
SHARE
- Advertisement -

MEP ta felicita pueblo:

ORANJESTAD   (AAN): Despues cu den e aña aki nos a recorda caba algun fecha historico, entre otro cu dia 18 di maart 2018,  45 aña pasa e pueblo Arubano pa prome vez a manifesta den Wilhelminastadion pa Aruba haya su Status Aparte y tambe cu dia 12 maart 2018, 35 aña pasa a conclui durante e Conferencia di Mesa Rondo na Hulanda cu Aruba lo haya entrante 1 di januari 1986 su Status Aparte, awe 21 di mei 2018 nos ta recorda un otro fecha historico, esta cu 15 aña pasa Parlamento di Aruba a aproba pa Papiamento bira e idioma oficial di Aruba banda di e idioma Hulandes.

Sinembargo e fecha di 21 di mei no ta para riba su mes, ya cu tabata 42 aña pasa caba den e lucha pa nos Status Aparte nos Libertador Betico Croes a sinti e necesidad pa Aruba tin su propio ortografia oficial di Papiamento. E vision aki a conduci cu dia 30 di oktober 1976 Conseho Insular di Aruba a aproba nos ortografia etimologico di Papiamento y cual ta cuadra completamente cu nos identidad, tradicion y cultura.

Hecho ta cu awe nos tur mester ta orguyoso cu nos idioma Papiamento a haya e reconocemento cu e merece den nos comunidad y ta wordo balora positivamente, ya cu el a yega tambe den klasnan na scol y pa cual examennan ta wordo duna den e idioma aki. Mas orguyoso nos ta ora cu nos a mira nos idioma Papiamento a yega te hasta riba tarima internacional cu e cantica Machica cu a impacta algun luna pasa.

Partido MEP ta sumamente contento y orguyoso di tabata para na cuna di ambos logro, esta tanto na e introducccion di e ortografia etimologico di Papiamento na 1976 como na su introduccion como idioma oficial na 2003.

Pabien pueblo di Aruba riba e dia di awe y laga nos tur como Arubiano sin excepcion percura pa papia y skirbi Papiamento den forma corecto y ser orguyoso di nos propio idioma.

 

 

 

 

 

- Advertisement -

DUNA COMENTARIO

Please enter your comment!
Please enter your name here