Home Parlamento Sue Ann Ras (MEP): “No tin un amor mas puro cu di...

Sue Ann Ras (MEP): “No tin un amor mas puro cu di un mama!”

7
0
SHARE
- Advertisement -

ORANJESTAD (AAN)  – Ki tempo y momento mas maraviyoso pa asumi e responsabilidad di ta mama. Cu tur e adelantonan cu ta existi, e opcionnan educativo, e avancenan medico, e productonan y informacion, e mamanan di awendia tin hopi mas oportunidad cu nunca pa lanta un yiu.

“Sinembargo, nos a perde algun aspecto hopi importante di pasado, cu ta elemento clave, manera norma y balor y principio, pa  e desaroyo total di un mucha”, ta loke Parlamentario Sue-Ann Ras ta enfatisa.

AMOR SINCERO

Si tin un amor cu nos por yama berdadero, puro y sincero ta esun di un mama. Un amor cu na mesun momento ta eterno y infinito. En realidad, ta mama ta implica sigui e pasonan di e criatura chikito, te ora nan bira grandi, yudando, sosteniendo y educando nan den cada momento, p’asina nan por florece como adulto responsabel, bondadoso, honesto y respetabel.

Cu djis nan existencia caba y sin cu nos sa, e yiunan ta siña nos pa stima di un manera incondicional. Sinembargo e realidad actual ta completamente diferente, ya cu e amor sincero a desvanece y orguyo, individualismo y amor propio ta reemplazando esaki.

Pa djis enfatisa un rato, ta mama kiermen cu nunca mas, bo por tin bo so den pensamento, paso un mama semper mester pensa dobel: pa su yiunan y p’e. Un mama mester sintie tremendamente afortuna, pasobra e sa cu su yiunan ta e mayor tesoro cu e por tin.

Na mesun momento, un mama merece tambe cierto distraccion y tempo liber, pero semper responsablemente y sin cu e mester bay a costo di e tempo di bo yiu. Kiermen mester siña traha balansa y asina complace bo mes como tambe bo yiunan, ya cu nan tin mester hopi mas di bo, cu bo ta imagina.

Cada cariño, amor y atencion cu abo no duna nan, bo por ta casi sigur cu tin otro cla para pa hacie, pero lamentablemente hopi biaha esaki ta resulta den un cariño, atencion y amor completamente destructivo.

“Ta mama kiermen cambia bo bida, bo tempo, bo forma di pensa pa bo yiunan, duna bo curason y entrega bo forsanan diario pa saca bo yiunan dilanti y siña nan biba. Esaki ta e momento cu un ser femenino tin cu realisa, cu e ta capaz di haci cualkier cos pa un ser humano. Un ser humano, cu abo mes a trece na mundo y duna bida y cu tin miyon di ilusion,” Ras a sigui bisa.

BISA NO

Pa un mama ta dificil p’e bisa NO na su yiunan, pero tambe wak nan cay, bandona nan soñonan of desaprobecha nan capacidadnan. Un mama no por biba pa su yiunan, pero si por percura pa comparti lo maximo cu nan.

P’esey un mama diariamente mester percura pa ‘cose algun hala enorme y light’, cu ta permiti su yiunan bula hopi halto, pero sigur.

Un mama kier pa su tur cos bay bon den bida di su yiunan, pero tambe kier pa nan encontra tormenta y siña nabega den lama bruto y pa nan sinti cu por conta semper riba dje, p’esey un “NO” na su momento adecuado por tin hopi mas beneficio cu consecuencia.

RESPONSABILIDAD

Asumi e responsabilidad como mama ta un trabou cu e unico recompensa final ta, wak nan feliz y riba e bon caminda. Percura pa si abo ta un mama, ta uno cu realmente tin bo yiu na pecho y no solamente riba social media, manera ta e caso hopi biaha. Responsabilidad no ta di solamente, dun’e un cas, cuminda y material.

Ta responsabel kiermen cu bo ta interesa den tur loke e ta haci, for di ora e lanta te ora e bay drumi, cu ken e ta anda, kico e ta haci, paso na momento cu algo bay robes, no culpa e mucha, sino puntra bo mes, unda abo a faya como mayor y kico bo por a haci miho pa evita esaki.

“Como mama nos mester mira miho cu tur hende e defectonan di nos yiunan. Nos sa si nos yiunan no ta bon cu solamente un mirada, ya cu como mama nos ta detector experto di emocion. Un feliz Dia di Mama na tur mama como tambe esunnan cu ta eherce e funcion di mama, ” Ras a finalisa bisando.

- Advertisement -

DUNA COMENTARIO

Please enter your comment!
Please enter your name here