ORANJESTAD (AAN): Durante cu patruya Santa Cruz diadomingo anochi alrededor di un cuarto pasa di 8 tabata patruya den Parkietenbos, e polisnan di Santa Cruz a wak un Hyundai Getz banda di caminda para.
Tambe e polisnan a constata cu dos homber ta luza un mata di palma. Patruya a baha velocidad pa averigua un rato kico ta e intencion pero nan a sigui patruya.
Pa 8 or y 30 patruya a bolbe wak e mesun auto, pero e biaha aki na e cruzada forma pa Kolibri straat y Flamingo straat. Patruya a wak un mata di palma den baul di e Hyundai Getz.
Relaciona cu locual patruya a observa mas prome y e comportacion den e ocupantenan, polis a dicidi pa para e vehiculo .
A duna e chofer na altura di Totolica straat, señal pa para y e chofer a cumpli.
Polis a atende pa controla unda nan a haya e palma .
Durante cu polis tabata atende e dos hombernan aki, nan a haya holo parecido na marihuana. E chofer a duna polis permiso pa listra den e Getz y den e vehiculo bao di asiento di chofer polis direpiente a haya un saco di carton color rose cu contenido.
Den e saco tabatin un saco grandi di plastic cu marihuana y un bloki primi di marihuana.
Riba e pakete tabatin colornan geel, blauw, cora parecido na bandera Venezolano y Colombiano. Relaciona cu esaki polisnan a detene e hombernan P. di 25 aña y M. di 24 aña y a hiba nan warda pa presenta nan dilanti fiscal auxiliar y pa lo demas investigacionnan di parti despacho Narcotica.
