Home Parlamento Un total di 80% di mamanan teenager ta dropouts, mientras cu 40%...

Un total di 80% di mamanan teenager ta dropouts, mientras cu 40% di e yiunan a nace cu droga den nan curpa

451
0
SHARE
- Advertisement -

Sue Anne Ras:

ORANJESTAD(AAN): Parlamentario Sue Anne Ras recientemente a papia cu Wit Gele Kruis riba e tema di embarazo hubenil y e bon noticia ta cu e cantidad a baha na 93 pa 2017.

Durante e 3 ultimo añanan e cantidad di caso a baha, pero e parti preocupante segun e parlamentario di MEP ta cu 80% di e 93 casonan di embarazo hubenil ta cay bao di ‘dropouts’, esta muchanan muher cu no ta bay school mas.

“Durante tratamento di presupuesto mi a bin cu un mocion pa nos por defini kico ta dropouts, pa asina esaki por bay den Censo”.

“Esaki a wordo aproba unanimamente “.

Esaki segun Ras, kende a sigui bisa cu segun CBS 4 di cada 10 mucha hoben no ta logra obtene nan diploma di school secundario.

El a sigui bisa cu den e documento di ‘Social Development di DAS a wordo indica cu42% di e populacion hoben, esta di 15 pa 24 aña no a obtene nan diploma di school secundario.

Ras a trece dilanti cu mirando e informacion aki, el a hasi un peticion na Minister di Enseñanza, pa e sinta cu tur e instancianan concerni, pa crea un plataforma pa bin cu un uniformidad pa tur instancia, pa ora cu ta papia di dropouts.

“Locual tambe a preocupami ta cu 50% di e mamanan teenager a bin den contacto den husticia”.

“Esaki ta nifica cu nos ta haya mamanan hoben cu no tin school, mientras cu 50% a bin den contacto cu husticia”, segun e parlamentario, kende a sigui bisa cu esaki tin consecuencianan pa e muchanan cu ta yiunan di e mamanan aki, esta problemanan social y emocional entre otro.

Ras a sigui bisa cu famia planea ta traha hopi duro riba e parti di concientizacion di uso di proteccion, pero toch ta keda resalta cu e periodo di Carnaval ta esun den cual mas baby ta wordo ‘crea’.

Esaki ta wordo mira den e hecho cu na November tin 16 mucha hoben cu haya yiu, pues nan a sali na estado durante e periodo di Carnaval.

“Nos mester bay wak con pa fortifica e plannan di concientizacion”.

Esaki segun Ras, kende a bisa tambe cu tin otro punto cu ta trece hopi preocupacion, esta cu 40% di e mamanan teenager di 2017, tin baby cu a nace cu e asina yama Neonatale Onthoudings Syndroom, cu ta ora cu e baby nace cu droga den su curpa.

“Mester bin cu un re-educacion di e mayornan, pasobra hopi biaha e muchanan no sa mihor, door cu nan mama tambe tabata mama teenager”, segun e parlamentario.

 

- Advertisement -

DUNA COMENTARIO

Please enter your comment!
Please enter your name here