Home Hudicial 12 luna di prison y 5 aña sin por traha exigi pa...

12 luna di prison y 5 aña sin por traha exigi pa dos agente di Polis cu a maltrata homber severamente

229
0
SHARE
- Advertisement -

ORANJESTAD  (AAN)  – Ayera mainta a tuma lugar tratamento di e caso penal contra dos agente di Polis, Y. y W., kendenan ta wordo sospecha di a maltrata e homber O.A. severamente. Ta asina cu Fiscal a exigi 15 luna di prison di cual 3 luna ta condicional y 5 aña prohibi di traha.

E caso tabata hopi interesante. DIARIO den e articulo aki ta publica e exigencia di Fiscal y den un otro articulo ta publica kico tur a sosode.

DEMANDA

E victima O.A. no a presenta, ainda e ta afecta. Su señora si tabata presente den Corte acompaña pa abogado mr. v.d. Biezen. E abogado a bisa Hues cu el a papia cu O.A. kende a bisa cu ta hopi dificil pa e presenta den Corte ya cu ainda e ta afecta pa e maltrato. E señora kier a expresa su mes con e situacion actual ta. Abogado mr. Carlo di e sospechoso Y. a bisa cu e ta contra esaki. Hues a permiti e señora papia. E señora a bisa cu despues di e sucedido O.A. su bida a cambia. E tin problema pa drumi, e tin problema cu bista di wowo robez. E fractura di kaak a causa cu e no por come bon. E no por haci su profesion di buseo.  E señora tabata papia cu wowonan yena cu awa. Ayera no a entrega demanda di daño. E señora a bisa cu nan tin pensa di cuminsa un caso civil contra e dos agentenan di Polis.

EXIGENCIA DI FISCAL

Fiscal a bisa cu e ta haya legalmente proba cu riba 26 Februari 2017, Y, y W. a bati formal e homber O.A. cu tabata geboei. Fiscal a bisa cu agente di Polis mester ta confiabel. Nan mester haci nan trabou corecto. No por desfrauda e confianza. De vez en cuando tin agente ta faya y ta tacha e integridad di KPA. Na opinion di Fiscal, skop y dal un sospechoso geboei cu a keda seriamente herida ta un asunto hopi serio. Esaki a causa hopi desconfianza den cuerpo policial y coleganan. E victima a keda hopi serio herida. E victima a keda cu kaak kibra, nanishi kibra, ripchi kibra, djiente kibra, cashi wowo kibra. E tabata burachi y a wordo maltrata. Fiscal ta haya cu e otro dos agentenan cu tambe tabata na e lugar a faya door di no a stop nan coleganan Y. y W.  a viola tur reglanan pa a bay bati un persona geboei di e forma aki. Y. no solamente a dal mokete hopi duro sino a dal skopnan tambe na curpa di O.A.

Segun Fiscal, e agente W. a bisa cu a dal dos mokete y despues a pusha cu su pia riba O.A. Coleganan Polis cu tambe tabata eynan a bisa cu W. a dal cu mokete hopi duro y dal skopnan. Fiscal a bisa cu e ta haya cu tanto Y. y W. ta culpable di complice di maltrato severo. E victima ainda ta sufriendo di e maltrato severo. E ta haya cu nan a abusa di nan autoridad como Polis.

CASTIGO

Na opinion di Fiscal, no tabata motibo pa a maltrata e victima di e forma aki. E caso aki a sacudi henter comunidad. Por compronde cu agentenan di Polis a traha hopi duro e dianan di carnaval y tabata hopi cansa y stress. Pero esey no ta kita afor e seriedad di e caso. Mester manda señal bon cla cu no ta permiti esaki. Fiscal a exigi pa Y. y W. 15 luna di prison di cual 3 luna ta condicional cu un tempo di prueba di 3 aña. Ademas el a exigi pa prohibi nan pa eherce nan trabou durante 5 aña.

- Advertisement -

DUNA COMENTARIO

Please enter your comment!
Please enter your name here