Home Hudicial 15 aña di prison pa homber cu a hinca otro mata y...

15 aña di prison pa homber cu a hinca otro mata y herida otro den lomba

107
0
SHARE
????????????????????????????????????
- Advertisement -

ORANJESTAD   (AAN) – E Colombiano F.M.F. biba na Aruba a scucha confirma e exigencia di Fiscal esta 15 aña di prison pa a hinca mata e homber Tse Mora cu un “volt tester” y hinca un otro homber R. cu esaki tambe.

EXIGENCIA DI FISCAL

Na Mei 2018 tratamento di e caso a tuma lugar caminda Fiscal a bisa cu algo horibel a pasa dia 12 November 2017 na Tanki Leendert. Polis a pasa y mira grupo di persona rond di un homber drumi abou den sanger. E homber ta Tse Mora di 40 aña, kende a fayece. Polis a haya un otro homber, R., cu hinca na lomba. Polis a detene tres homber kendenan tabata hunto cu e chofer di e otro auto. E sospechoso F.M.F. a bay entrega su mes y a bisa cu e no ta corda nada di a hinca e persona. E victima aparentemente no a duna preferencia na F.M.F. y esaki a causa un discussion. F.M.F. a bay reclama e victima. Dos persona a baha for di e auto y nan a dal’e y F.M.F. no ta corda nada mas. Fiscal ta convenci cu F.M.F. a hinca e dos victimanan. Fiscal ta haya cu F.M.F. tabata e agresor. E tres ocupantenan di auto di F.M.F. a bisa cu ta F.M.F. tabata grita. Un di e ocupantenan a hasta bis’e pa stop pero el a bisa pa no mete pasobra nan no sa kende e ta. E voltmeter ta 14.5 cm largo y a hinca esaki casi complete den curpa di Tse Mora. Patologo a constata cu e voltmeter ta fit exacto den e herida di e victima. Tambe el a hinca e otro victima R. den lomba.

Fiscal a bisa cu e ta kere cu F.M.F. despues di a sufri golpi, a rabia y bay den su auto y coy voltmeter y hinca e dos victimanan. Fiscal a mustra cu tin testigonan a bisa cu F.M.F. a expresa:  “este herida se paga con la muerte”. Esaki ta pone Fiscal pensa cu ta intencionalmente F.M.F. a hinca mata. Despues di a hinca Tse Mora, el a core tras di R. y ora R. a cay abou, F.M.F. a hink’e. Fiscal ta haya F.M.F. culpable di a mata Tse Mora y a purba mata R.

Fiscal a exigi 15 aña di prison pa F.M.F. kitando e tempo cu e ta sera den KIA. Pa loke ta demanda di daño exigi pa ruman di e difunto pa gastonan di entiero, Fiscal a pidi Hues pa confirma esaki. Pa loke ta e otro victima, e daño inmaterial di 25 mil florin Fiscal a bisa cu e por compronde kico e victima a pasa aden pero no a argumenta esaki. El a pidi Hues pa declara esaki no admisibel. Fiscal a pidi Hues pa aproba e daño material di 1300 florin y pa aplica medida di daño material.

SENTENCIA

Hues a bisa cu e ta haya legalmente proba di a mata y purba mata. Hues a rechaza defensa di abogado cu door di accidente den pasado F.M.F. no ta responsabel. Hues a bisa cu ta casonan hopi hororoso. Ta un dolor imenso pa famia.

Hues a aproba e demanda pa F.M.F. paga e gastonan di intiero cu ta mas cu 7 mil florin. Hues a aproba 1300 florin di gasto pa medicina y 5 mil inmaterial pa e otro. E resto el a declara no admisibel y a bisa cu por cuminsa un caso civil.

CASTIGO

Hues a condena F.M.F. conforme exigencia di Fiscal, esta 15 aña di prison kitando e tempo cu e ta sera den KIA. Hues a pone e medida pa paga daño, o sea cu ta Ministerio Publico lo percura pa e famia haya e placa y si F.M.F. no paga e lo haya mas castigo.

- Advertisement -

DUNA COMENTARIO

Please enter your comment!
Please enter your name here