Home Hudicial 4 aña di prison pa hincamento durante jouvert morning

4 aña di prison pa hincamento durante jouvert morning

105
0
SHARE
- Advertisement -

E acusado no a gusta y a bisa cu e ta apela e castigo

ORANJESTAD (AAN)  – E homber G.L. no a keda nada contento ora el a tende Hues bisa cu e ta culpable di e hincamento riba 3 Februari 2018 y cu e ta wordo condena na 4 aña di prison. El a bisa duro cu e ta bay apela y a bira mira su abogado mr. Zara cu a bay papia cun’e.

Tratamento di e caso aki a tuma lugar luna pasa caminda e acusacion cu Fiscal a presenta den Corte contra e Arubiano G.L. bibando na Merca ta, cu dia 3 Februari 2018 el a haci intento di asesinato cu e homber W. door di hink’e cu cuchiu. Subsidiario Fiscal ta acusa G.L. di maltrato severo premedita. Mas subsidiario Fiscal ta acusa G.L. di maltrato cu arma.

HINCAMENTO

Durante tratamento di e caso Hues a puntra G.L. si ta berdad cu el a hinca W. Segun G.L. e no a hinca ningun hende. E tabata den un discusion cu un amiga caminda e homber W. a bay intermedia y hasta a dal G.L. mokete den cara. E hendenan ey banda a bis’e pa bay di eynan cual el a haci tambe. Hues a puntr’e con e tabata bisti. Segun G.L. e tabata bisti cu un short blanco y flanel roos.

Hues a mustra cu na Polis, G.L. a bisa cu e lo a haci varios expresionnan pero no ta corda pasobra e tabata burachi. Hues a puntra cu por ta el a hinca W. y no ta corda. G.L. a para riba cu e no a hinca W. E ta sigur cu e no a hinca W.

Hues a bisa cu W. a declara cu e tabata para hunto cu su señora pa mira e parada di jouvert morning. El a mira G.L. ta discuti cu un dama. El a bay intermedia y a surgi un discussion y nan a wordo saca for di otro. Despues W. a dicidi di bay y na caminda el a bolbe topa cu G.L. kende lo a haci señal manera cu lo mat’e. W. a bisa cu el a baila tras di un banda hunto cu su señora.

Na dado momento el a bay mara su keds. El a sinti un pusha y su señora a mira un homber cu flanel preto core bay. Segun e señora e homber ta G.L. Segun e señora G.L. por a bien bay cambia su paña pasobra e ta biba ey banda mes. El a bisa cu G.L. tabata bisti cu un flanel geel/muster. G.L. a para riba cu esey no ta berdad.

Hues a mustra cu un otro persona homber cu a mira e luchamento y a bay cu G.L., a bisa cu G.L. a bisa cu e cos no lo keda asina y cu e lo bay mata W. E persona a bisa cu e conoce G.L. cu e ta para tras di su palabra. El a bisa W. pa wak su caya.

Un otro testigo ta papia di a mira G.L. cu un flanel geel/muster y no roos.

DEMANDA DAÑO

W. a bisa cu el a sinti hopi dolor. El a wordo atendi na Centro Medico San Nicolas y despues hiba hospital. El a keda interna 2 siman pa e hinca. W., un turista di Trinidad, a bisa cu e ta demanda gastonan di vuelo pa bay bek Trinidad. E tabata suppose pa bula bek pa Trinidad dia 4 Februari 2018 pero e mester a cancela y busca otro vuelo. El a demanda 676 florin total di daño material. Pa loke ta e daño inmaterial, el a demanda 2500 florin pasobra el a keda traumatiza pa loke a pasa cun’e.

EXIGENCIA FISCAL

Fiscal a bisa cu segun raport medico, e victima a wordo hinca den pecho drechi. Fiscal a mustra cu e pareha tabata bailando tras di un truck y na dado momento W. a wordo hinca door di un homber cu promer e tabatin un confrontacion. E señora di W. a reconoce e homber como G.L. cu tabatin confrontacion cu W. y cu tabatin un flanel geel/muster. Segun Fiscal, mirando declaracion di e victima, su señora, e otro testigonan, ta G.L. a hinca. Esaki Fiscal ta considera un intento di asesinato.

Na opinion di Fiscal, caminda W. a sufri e hinca por a afecta organonan vital cu por causa su morto. Fiscal ta haya cu G.L. premedita a bay hinca W. El a bisa Hues cu e ta haya cu G.L. a bay cambia su paña pa no wordo reconoce y a bay hinca W.  Fiscal ta haya cu mester honra e demanda di daño caminda e victima mester a paga pa cambia su vuelo. Pa loke ta e demanda di daño inmaterial, Fiscal ta haya cu 2 mil florin ta husto. En total 2676 florin.

Pa loke ta e castigo, Fiscal a bisa cu e ta tene cuenta cu ta promer biaha cu G.L. ta haci un delito hopi serio asina. El a exigi 5 aña di prison kitando e tempo cu e ta sera den KIA.

SENTENCIA

Hues diabierna ultimo a bisa cu e ta haya legalmente proba cu G.L. a purba mata, no asesinato cu ta premedita. Hues a mustra cu tin declaracion di e victima y su partner cu ta mustra cu G.L. lo a menaza haciendo señal cu su man cu lo corta garganta. Hende a bisa nan pa wak nan caya. Durante e jouvert morning parade e victima a zak pa mara e feeter di su keds y su partner a mira un homber hink’e.

El a grita e persona y ora e homber a bira wak el a mira cu ta G.L. Den Corte e partner tambe a confirma cu ta G.L. el a mira. Door di hinca e victimaW., el a sufri sangramento den pulmon. Esaki tin riesgo cu e victima por a muri. Hues a bisa cu e no ta comparti Fiscal su opinion cu G.L. a hinca premedita.

Na opinion di Hues, no por saca afor ki ora G.L. a dicidi di hinca. E hincamento aki a causa sentimento di inseguridad. Hues a tene cuenta cu castigo cu sa duna, envez di 5 aña cu Fiscal a exigi, el a condena G.L. na 4 aña di prison kitando e tempo cu e ta sera den KIA. Hues a honra e demanda di e victima W. cu mester a paga 676 florin pa cambia su pasashi y esun di su partner.

E demanda di daño inmaterial cu W. a bisa cu el a keda traumatiza, Hues a haya e suma no admisibel pa loke W. a exigi. Hues a determina 1500 florin ta hustifica. El a impone medida di pago o sea si G.L. no paga, e lo bay sera. G.L. no tabata nada contento y a bisa cu e ta apela.

 

- Advertisement -

DUNA COMENTARIO

Please enter your comment!
Please enter your name here